Wie zum letschte Mol bi dr Tour de France 2008 het d Tour nit mit eme Zitfahre aagfange, sondern mit ere reguläre Etappe. Grad noch em Start isch s drbii über d Passage du Gois gange, wo mä nume bi Ebbe cha drüberfahre. Im Ziil, uf em Mont des Alouettes, het s noch em Ändi vo dr Etappe d Präsentation vo de Mannschafte gee, wo mitgmacht häi.[1] E Daag druf het s Mannschaftszitfahre rund um Les Essarts stattgfunde.
Zum d Spannig im Kampf um s grüene Liibli für e best Sprinter und Punktliibli für dr best Bärgspezialist z versterke, het s bi dr 2011er Uflag vo dr Tour de France neui Regle gee:[2]
Sprintklassemänt: Es het in jedere Etappe nume no en einzige Zwüschesprint ge, bi däm het s aber Pünkt nid nume für die erste drei Fahrer gee, sondern für alli bis zum 15 Blatz.
Bärgklassemänt: Bis denn isch s eso gsi, ass die letschti Bärgwärtig vo jedere Etappe dopplet zelt het. Das isch jetz nume no bi Bärgaakümft eso gsi und 2011 isch im Ganze viermol vorchoo.
Bi dr Tour 2011 si 22 Mannschafte, mit 9 Fahrer pro Mannschaft drbii, 18 drvo ProTour Mannschafte. Cofidis, Europcar, FDJ und Saur si Pro-continental Mannschafte, won e spezielli Iiladig überchoo hai.
Dr Alberto Contador, wo 2010 d Tour de France gwunne het und 2011 dr Giro d'Italia, isch dr grösst Favorit gsi. Anderi Fahrer, wo mä von ene dänkt het, ass si e Chance im Gsamtklassemänt chönnte haa, si dr Luxeburger Andy Schleck, wo im vorige Johr Zweite worden isch, dr Robert Gesink, dr Samuel Sánchez, dr Australier Cadel Evans, dr Jurgen Van Den Broeck and dr Italiäner Ivan Basso gsi. D Sportzitschrift L'Equipe het nume im Contador fümf Stärn gee, dr Andy Schleck het sich mit vier müesse begnüege, si Brueder Fränk und dr Cadel Evans mit drei.
Die ersti Etappe isch flach gsi, mit eme maximale Höchiunderschiid vo öbbe 250 Meter. S Ziil uf em Mont des Alouettes isch noch eme 2,2 Kilometer lange Aastiig vo dr 4. Kategorie cho. Acht Kilometer vor em Ziil het s e Massesturz gee, wo dr Contador, dr Samuel Sanchez und e baar anderi vo de beste Fahrer ufghalte het. Dr Belgier Philippe Gilbert vo Omega Pharma-Lotto het d Etappe mit drei Sekunde Vorsprung vor em Australier Cadel Evans gwunne. Dr Contador und dr Sanchez hai ei Minute und zwanzig Sekunde verlore, währed dr Cadel Evans, d Schleck Brüeder und dr Klöden nume e baar Sekunde uf en Erst verlore hai.
Die zweiti Etappe isch e churzes Mannschaftszitfahre über e sehr flache Parcours gsi. Gwunne het sä s Team Garmin-Cervélo mit vier Sekunde Vorsprung vor BMC Racing Team, Sky Procycling und Team Leopard-Trek vom Andy Schleck. HTC Highroad isch fümf Sekunde hindedrii gsi, RadioShack zäh und Rabobank zwölf. D Saxobank Sunguard vom Alberto Contador isch Achti worde mit 28 Sekunde Rückstand. Dr Thor Hushovd het s gääle Liibli übernoh, dr Evans isch Dritte worde im Gsamtklassemänt mit einere Sekunde Rückstand, d Schleck Brüeder si vier Sekunde hindedrii gsi, dr Klöden und dr Leipheimer zäh, dr Contador hingege scho 1 Minute 42 Sekunde.
Die dritti Etappe isch e flachi Etappe dr Atlantikküste nooch gsi, wo druf aagleit gsi isch, ass d Sprinter dr Siig under sich wurde usmache, und mä het nid erwartet, ass sich vil im Gsamtklassemänt wurd ändere. Scho früeh im Renne si dr Mickael Delage (FDJ), dr José Iván Gutiérrez (Team Movistar), dr Rubén Pérez (Euskaltel-Euskadi), dr Maxime Bouet (Ag2r-La Mondiale) und dr Niki Terpstra vo Quick Step usgrisse und hai e Zitlang bis zu acht Minute Vorsprung uf s Fäld gha. Nüün Kilometer vor em Ziil het sä s Peloton iigholt. Uf de letschte Kilometer het im Mark Cavendish siis Team, d HTC Highroad, dr Don agee und d Fahrer vo Garmin, dr Thor Hushovd und dr Tyler Farrar, hai sich ihne aagschlosse. Dr Cavendish het aber die letschti Kurve nid guet gnoh, dr Hushovd het aagfange für e Farrar dr Sprint vorbereite, und dä het denn d Etappe au gwunne. Dr Hushovd het die gliich Zit überchoo und siis gääle Liibli verdeidigt. Dr spanisch Meister José Joaquin Rojas vo Movistar het am meiste Sprintpünkt gsammlet und s grüene Liibli übercho. Dr Mickael Delage vo FDJ isch zum kämpferiste Fahrer gwehlt worde.
Die vierti Etappe isch e chli hügelig gsi mit dr Cote de Laz noch 79 Kilometer, eme Aastiig vo dr vierte Kategorii. Intressant isch aber vor allem dr Hügel (3. Kategorii) vor em Ziil gsi, wo Expärte erwartet hai, ass dr Contador wurd zeige, was er cha. Das het er denn au gmacht, het bim Aastiig d Füehrig übernoh, het aber Fahrer wie dr Evans und dr Fränk Schleck nid chönne distanziere. Bim Ändspurt isch dr Evans vorus und het dr Contador um e baar Santimeter gschlage. Die zwei Pünkt, wo s gee het, hai im Evans glängt, zum Erste im Bärgklassemänt z wärde. Dr Hushovd het sich usgezeichnet gschlage, het sich nid lo abhänke und het so sis gääle Liibli verdeidigt. Dr Jérémy Roy vo FDJ, wo nüün Kilometer noch em Start mit vier andere Fahrer em Fäld drvoo gfahre und nume e baar Kilometer vor em Ziil am Mûr-de-Bretagne iigholt worden isch, isch mit dr Roote Nummere uszeichnet worde.
D Etappe isch flach gsi mit eme Aastig vo dr vierte Kategorii noch 45 Kilometer. E Hufe Fahrer si umgheit, drunder dr Bradley Wiggins (Sky), dr Levy Leipheimer (RadioShack). Denn si dr Janez Brajkovic (RadioShack) und dr Robert Gesink (Rabobank) und anderi Fahrer in Grabe grutscht. E baar Kilometer noch däm isch dr Alberto Contador (Saxo Bank - Sungard) umgflooge, und het nid grad glücklig usgseh, won er mit eme verrissnige Liibli ufgstanden isch und sich het müesse aastränge zum ins Fäld zruggchoo. Denn het e Döff dr Niki Sörensen (Saxo Bank - Sungard) umgworfe und spöter isch au dr Tom Boonen (Quick Step) uf em Pflaster glandet. Usser dene bekannte Fahrer het s aber no meh umglitzt.
Dr Cavendish het dr Ändspurt gwunne, nochdäm zerst dr Boasson Hagen und denn dr Hushovd e chli z früeh mit sprinte aagfange hai und sich dr Cavendish im Gilbert het chönne aahänke und dä denn churz vor dr Ziillinie het chönne überhole. Dr Hushovd as Zähnte blibt Erste im Gsamtklassemänt, drfür het dr Gilbert in dere Etappe acht Sprintpünkt gsammlet und nimmt im Rojas s grüene Liibli wäg.
Das isch die lengsti Etappe gsi mit e baar Hügel und zwei Aastig vo dr dritte Kategorii, d Côte de Saint Michel de Montjoie (bim 99. km) und d Côte du Bourg d' Ouilly (156 km), und eine vo dr vierte, d Côte du Billot (197 km).
Dr Lieuwe Westra vo Vacansoleil-DCM isch usgrisse und spöter si dr Johnny Hoogerland (Vacansoleil-DCM), dr Anthony Roux, dr Leonardo Duque und dr Adriano Malori zuen em gstoosse. Ihre Vorsprung isch bis uf 12 Minute gwachse, und dr Hoogerland het Pünkt für s Bärgklassemänt gsammlet. Öbbe sächzig Kilometer vor em Schluss het er sich zsämme mit em Roux und em Duque vom Peloton lo iihole. Dr Westra und dr Malori hai witer gmacht, bis s Fäld dr Malori as letschte drei Kilometer vor em Ziil iigholt het.
Dr Dag isch verrägnet gsi und es het e baar Stürz gee, vier Kilometer vor em Ziil isch dr Levi Leipheimer in e Leitblanke iinegrutscht und umgheit, und er het sich denn müesse aastränge, zum dr Zitverlust so chlii wie möglig z halte. Dr Geraint Thomas het em Norwäger Edvald Boasson Hagen dr Ändspurt vorbereitet, wo dä denn souverän vor em Australier Goss und sim Landsmaa Hushovd gwunne het.
Dr Hushovd het s Gääle Liibli bhalte, dr Gilbert het s Grüene Liibli verdeidigt, dr Evans het s Bärgliibli an dr Johnny Hoogerland abgee, und dr Geraint Thomas vo Sky isch immer no im Wiisse Liibli vom beste Nochwuchsfahrer.
Bi dere Flachetappe het s keini Pünkt für s Bärgklassemänt gee, nume Pünkt für d Sprinterrangliste bi Buzençais, 25 Kilometer vor em Ziil. Es het zwar nit grägnet, aber dr Wind isch mänggisch zimlig stark gsi.
Scho churz noch em Start isch dr Yannick Talabardon vo Saur-Sojasun usgrisse und s het sich umen ume e Gruppe vo vier Fahrer bildet, wo bis zu acht Minute Vorsprung uf s Peloton uusegfahre hai. Uf s Ändi vo dr Etappe zue het s zwei Massestürz gee. Dr Bradley Wiggins het sich öbbis broche und isch in s Spital iigliferet worde, und anderi Fahrer, wie dr Levi Leipheimer, dr Chris Horner und dr Ryde Hesjedal hai vil Zit verlore. Dr Contador, dr Evans und d Schleck Brüeder hingege si im Peloton gsi, wo die vier Usriisser drizäh Kilometer vor em Ziil iigholt het.
Bim Ändspurt, wo dr Tony Martin iigleitet het, het dr Mark Cavendish, wo hinder sim Teamkolleg Mark Renshaw härgfahre isch, dr Alessandro Petacchi und dr André Greipel gschlage.
Dr Hushovd isch bim Sprint mit drbii gsi und het s Gääle Liibli verdeidigt. Dr José Joaquín Rojas het im Philippe Gilbert s Grüene Liibli wider abgnoh, im Bärgklassemänt het sich nüt gänderet, aber bi de Nochwuchsfahrer het dr Geraint Thomas s Wiisse Liibli an dr Robert Gesink verlore, won er, wie die ganzi Mannschaft vo Sky, uf si Teamleader Wiggins, wo gstürzt gsi isch, gwartet het für zum en wider ins Fäld zruggzfüehre.
Die erste sächzig Kilometer vo dr Etappe si zimlig flach gsi, aber vo denn aa isch s die ganzi Zit e chli uufegange, zerscht en Aastiig vo dr 4. Kategorii, fufzig Kilometer druf isch s d Cote du Rocher des Trois Tourtes (4. Kat.) uufegange, bim Kilometer 164 isch dr höggst Punk vom Col de la Croix Saint-Robert (2. Kat., 1451 m.ü.M.) gläge und noch ere Abfahrt vo öbbe fufzäh Kilometer isch dr letscht Aastig uf Super-Besse Sancy cho, wo s Ziil gsi isch.
Im letschte Aastig uf d Super-Besse hai d Usrisser um dr Rui da Costa brobiert, sich s Fäld vom Hals z halte und hai sich gegesitig die ganz Zit aagriffe, bis zum Schluss keine meh mit em da Costa het chönne mithalte und dä isch elei dr Bärg uufegfahre. Hinder ihm het dr Winokurow meh as e halbi Minute uf s Peloton mit em Hushovd uusegfahre und isch e e zitlilang s virtuelle Gääle Liibli gsi. Aber es het em an dr Usduur gfehlt, si Aasträngig bis zu dr Ziillinie duurezhalte. Im Hauptfäld hai nämlich dr Contador, dr Evans und d Schleck Brüeder afo Tämpo mache und churz vor em Ziil hai si dr Winokurow überholt.
Dr Thor Hushovd isch mit em Hauptfäld aachoo und isch eso im Gääle Liibli bliibe. Dr Philippe Gilbert het mit eme Aagriff in de letschte Meter nit nume drei Sekunde uf s Gääle Liibli gwunne, sondern het au gnueg Pünkt gsammlet, zum em Rojas, wo mit dr füehrende Gruppe nid het chönne mithalte, s Grüene Liibli wider abzneh und si Vorsprung uf fufzäh Pünkt uszbaue. Dr Johnny Hoogerland het d Bei nid gha, für zum im Bärgklassemänt si erste Blatz z verdeidige und dr Van Garderen het s Bärgliibli übernoh.
Die erste vierzig Kilometer si zimlig flach ufegange, denn het aber mit em Aastig of e Cote de Massiac (3. Kategorii) en Achterbahnfahrt aagfange, wo bim hundertste Kilometer uf em Pas de Peyrol (2. Kategorii) si höggst Punkt (1589 m.ü.M) gha het. Sächzäh Kilometer druf isch s über e Col du Perthus (2. Kat.) gange, noch elf wiitere Kilometer über e Col de Cère (3. Kat.), denn über d Chevade (3. Kat.), druf zimlig stotzig uufe uf e Prat de Bouc (2. Kat.) und denn abwärts bis zum Aastiig zum Châteu d' Aleuze (4. Kat.), denn wiiter abwärts bis Saint-Flour, wo s zum Dessert non e chliine vierte Kategorii Bärg uufe zum Ziil gee het, und wo dr Thor Hushovd, wo bis denn dapfer mitgstramplet het, nüm mitchönne het.
Dr Daag het mit Rääge aagfange und wo dä ufghört het, isch d Strooss no lange füecht und glitschig bliibe. Das het zu Massestürz gfüehrt und siibe Fahrer hai s Renne müesse ufgee, dr Alexander Winokurow mit eme brochene Bei, dr Amerikaner David Zabriskie, d Belgier Jurgen van den Broeck und Frederik Willems, dr Holländer Wouter Poels, dr Russ Pavel Brutt und d Spanier Juan Manuel Garate und Amets Txurruka.
E Fümfergrubbe, dr Juan Antonio Flecha, dr Thomas Voeckler, dr Johnny Hoogerland, dr Luis León Sánchez und dr Sandy Casar, isch usgrisse und het alli Bärgpünkt überchoo. Dr grösst Deil von ene, 18 Pünkt, het dr Hoogerland gsammlet, wo Erste in dr Bärgrangliste worden isch. Drissig Kilometer vor em Ziil het en Auti vom Färnsehe dr Flecha und dr Hoogerland aagfahre. Si hai schlussändlig zwar chönne wiiterfahre, si aber hinder s verfolgende Peloton zruggfalle. Säll het die drei Fahrer in dr Spitzegrubbe nüm chönne iihole und so hai die drei dr Etappesiig under sich usgmacht, wo dr Sánchez vor em Voeckler im Spurt gwunne het.
Dr Vorsprung, wo dr Voeckler gha het uf s Peloton, het em glängt, s Gääle Liibli mit eme Zitguethabe vo meh as zwei Minute uf alli Favorite z überneh. Dr Philippe Gilbert het si Vorsprung im Sprinterklassemänt usbaut und dr Gesink het s Wiisse Liibli verdeidigt. Bi de Mannschafte het Europcar d Füehrig übernoh, vor Leopard-Trek und Radioshack.
Das isch e zimlig churzi Etappe gsi, mit Aastiig, wo nid allzu aaspruchsvoll gsi si, ein vo dr dritte Kategorii bim 62. Kilometer, ein vo dr vierte acht Kilometer druf, denn wider eine vo dr dritte Kategorii bim 99. Kilometer und fufzäh Kilometer vor em Ziil en andre vo dr vierte Kategorii. Das isch liicht gnueg gsi, ass s Peloton siini Sprinter nid underwägs verlore het und die hai dr Siig denn au under sich usgmacht, dr Greipel vor em Cavendish, em Rojas und em Hushovd.
Zäh Kilometer vom Start isch e Sächsergrubbe usgriss und het e Vorsprung vo vier Minute uusegfahre, bis si vor em letschte Aastiig igholt worde si. Denn hai s au e baar anderi, drunder dr Tony Martin, dr Thomas Voeckler und dr Philippe Gilbert brobiert, si si aber churz vor em Ziil iigholt worde.
Im Gsamtklassemänt het sich nüt Wichdigs veränderet, und au d Rangliste vo de Nochwuchsfahrer het sich nid grooss veränderet. Dr Gilbert het mit 226 Pünkt s Grüene Liibli vor em Rojas (209) und em Cavendish (197) verdeidigt, im Hoogerland siis Punketete Liibli isch nie in Gfohr gsi, so wenig Pünkt im Bärgklassemänt het s gee und s Team Europcar het wiiter die gääle Nummere uf em Buggel.
Die Etappe isch mit zwei Aastiig, wo s Pünkt gee het drfür, zimlig flach und drzue au no ehnder churz gsi. E Sächsergruppe um e Lars Boom het das usgnützt, isch vorusgfahre und het die meiste Pünkt underwägs iigsammlet. Dr Cavendish im Peloton het sich vor em Sprint guet blatziert und nüün Pünkt überchoo, was zsämme mit de 45 vom Ändspurt, won er klar gwunne het vor em Greipel und em Farrar, glängt het, s Grüene Liibli überzchoo. Dr Rojas het au guet abgschnitte in de Sprint, so dass dr Gilbert uf e dritt Blatz im Sprinterklassemänt zruggfallen isch. Suscht het sich nit vil veränderet. Dr Voeckler isch in Gääl bliibe und dr Hoogerland het s Bärgliibli bhalte.
Dasch e schweri Etappe gsi mit eme 1. Kategorii Aastiig uf la Hourquette d’Ancizan und zwei Hors Categorie uf e Col du Tourmalet und denn zum Ziil uf Luz Ardiden. Die ersti Helfti vo dr Etappe isch ehnder flach gsi mit eme Sprint z Sarrancolin won e sächschöpfigi Ussriissergrubbe die meiste Punkt für sich beaasprucht het, und wo denn s Fäld duurechoo isch, isch dr Cavendish vor em Rojas und em Gilbert gsi und het so s Grüene Liibli vorläufig für sich gsicheret.
Dr Voeckler het mit dr Favoritegruppe bis fast ins Ziil chönne mithalte, het nume fufzig Sekunde uf dr Samuel Sánchez, dr Etappenersti, verlore und eso siis Gääle Liibli erfolgriich verdeidigt. Dr Contador het d Aagriff, wo d Schleck Brüeder gegen ihn gfüehrt hai zletscht nüm chönne abwehre und het non emol Zit uf die andere Favorite verlore.
Im Bärgklassemänt het dr Sánchez 40 Pünkt für dr Aastiig uf Luz Ardiden überchoo und drmit s Liibli mit de rote Pünkt. Bi de Nochwuchsfahrer hai sich dr Kreuziger und dr Thomas wacker gschlage, hai aber schlussändlig d Chraft nüme gha zum Mithalte und dr Franzos Arnold Jeannesson het s Wiisse Liibli überchoo.
Die erste nünzig Kilometer si hügelig gsi, mit eme Aastiig vo dr Dritte und eim vo dr vierte Kategorii. Erst denn isch z Bielle dr Zwüschesprint choo und churz druf isch s uufe gange uf dr Col d’Aubisque, e 16,4 km langen Aastiig mit ere Stiigig vo 7,1 %. Denn isch s vierzig Kilometer meistens abwärts gange und uf s Ziil zue isch e flachi Strecki cho vo zäh Kilometer.
En Usriissergrubbe vo zäh Maa, wo sich noch em Côte de Cuqueron bildet het, het bis zu siibe Minute Vorsprung uf s Fäld uusegfahre isch denn aber uusenandergheit. Bi dr Uffahrt uf e Aubisque het dr Thor Hushovd meh as zwei Minute uf e Vorderst, dr Jérémy Roy verlore, und au dr Montcoutié isch vor ihm über e Spitz gfahre. Denn het dr Norwäger aber en usgezeichneti Abfahrt aanegleit, dr Moncoutié iigholt und zsämme mit däm d Distanz zum Roy verchliineret. Uf dr flache Strecki vor em Ziil het er dä diräkt aagriffe, en überholt und distanziert und d Etappe mit zäh Sekunde vor em Montcoutié und 26 vor em Roy gwunne.
Im Gsamtklassemänt isch dr Voeckler immer no Erste, dr Philippe Gilbert het si Position verbesseret, won er uf de letschte Kilometer em Peloton drvo gfahren isch und so under die erste Zäh cho isch. Dr Mark Cavendish het s Grüene Liibli verdeidigt, dr Roy isch mit siiner Leistig uf em Aubisque in s Bärgliibli gfahre und dr Jeannesson isch immer no dr best Nochwuchsfahrer.
Rangliste vo dr 13. Etappe
Fahrer
Land
Team
Zit
1
Thor Hushovd
Flagge Norwegens
GRM
3h 47' 36"
2
David Moncoutié
Flagge Frankreichs
COF
+ 10"
3
Jérémy Roy
Flagge Frankreichs
FDJ
+ 26"
4
Lars Bak
Flagge Dänemarks
THR
+ 5' 00"
5
Jérôme Pineau
Flagge Frankreichs
QST
+ 5' 02"
6
Edvald Boasson Hagen
Flagge Norwegens
SKY
+ 5' 03"
7
Vladimir Gusev
Flagge Russlands
KAT
+ 5' 08"
8
Alessandro Petacchi
Flagge Italiens
LAM
+ 5' 16"
9
Maarten Tjallingii
Flagge der Niederlanden
RAB
+ 5' 16"
10
Philippe Gilbert
Flagge Belgiens
OLO
+ 6' 48"
Gsamtklassemänt noch dr 13. Etappe
Fahrer
Land
Team
Zit
1
Thomas Voeckler
Flagge Frankreichs
EUC
55h 49' 57"
2
Fränk Schleck
Flagge Luxemburgs
LEO
+ 1' 49"
3
Cadel Evans
Flagge Australiens
BMC
+ 2' 06"
4
Andy Schleck
Flagge Luxemburgs
LEO
+ 2' 17"
5
Ivan Basso
Flagge Italiens
LIQ
+ 3' 16"
6
Damiano Cunego
Flagge Italiens
LAM
+ 3' 22"
7
Alberto Contador
Flagge Spaniens
SBS
+ 4' 00"
8
Samuel Sánchez
Flagge Spaniens
EUS
+ 4' 11"
9
Philippe Gilbert
Flagge Belgiens
OLO
+ 4' 35"
10
Tom Danielson
Flagge der Vereinigten Staaten von Amerika
GRM
+ 4' 35"
14. Etappe: Saint-Gaudens — Plateau de Beille, 168.5 km
Uf dere Etappe het s ei Uffahrt vo dr dritte, zwei vo dr zweite und zwei vo dr erste Kategorii gee, und s Ziil isch e Bärgaakumft gsi noch eme Aastig vo dr Hors Catégorie. Dr Zwüschesprint isch zäh Kilometer noch em erste Bärg, em Col de Portet-d'Aspet, choo.
Churz vor em Zwüschesprint isch e Grubbe mit em Sandy Casar usgrisse und bis zu fümf Minute vorusgsi, aber eine noch em andere het ufgee, bis am letschte Aastiig schliesslig nume no dr Casar übrigbliiben isch. Dr Jelle Vanendert isch im obere Deil vom letschte Bärg em Peloton drvo gfahre, het dr Casar überholt, wo denn dr Kampf ufgee het, und isch mit eme Vorsprung vo 48 Sekunde uf s Gääle Liibli am Ziil aachoo. Dr Samuel Sánchez, wo brobiert het ihn no iizhole, isch bis uf 26 Sekunde an en aanechoo, s het aber nume no für e zweite Blatz glängt. D Favoritegrubbe mit em Gääle Liibli isch bis zum Schluss zsämmebliibe. D Schleck Brüeder hai im Voeckler und em Contador ihri Reaktione brüeft und vor allem dr Voeckler het sich mit vil Energii verdeidigt. Erst ganz am Schluss het sich dr Andy Schleck e chli chönne lööse, das het em aber nume e Vorsprung vo zwei Sekunde iibrocht.
Dr Voeckler und dr Cavendish hai ihri Liibli chönne bhalte. Dank siim erste Blatz uf em Plateau de Beille het dr Vanendert s Liibli mit de roote Pünkt eroberet und dr Rigoberto Urán isch dr best blazierti Jungfahrer worde. D Mannschaft vo de Schlecks, s Team Leopard-Trek, het jetzt mit sächs Sekunde Vorsprung vor em Voeckler siim Team Europcar s Teamklassemänt afo füehre.
Dr einzig Ufstiig uf dere Flachetappe isch die viert Kategorii Côte de Villespassans bim 82 Kilometer gsi. Dr Zwüschesprint isch bi Montagnac gsi, fast fufzig Kilometer vor em Ziil.
Die meiste Pünkt bim Zwüschesprint si an d Usrisser gange, drei Franzose: dr Mickaël Delage, dr Samuel Dumoulin und dr Anthony Delaplace, e Russ: dr Mikhail Ignatyev, und e Holländer: dr Niki Terpstra, wo denn e Vorsprung vo weniger as zwei Minute uf s Peloton gha hai. Im Fäld het dr Mark Cavendish vor em Jose Joaquin Rojas und dr Philippe Gilbert gfüehrt. E baar Kilometer vor em Ziil si nume no dr Terpstra und dr Ignatyev vorus gsi, s Team vom Cavendish het s Tempo gsteigeret und as Letschte het dr Terpstra ufgee. Dr Mark Renshaw het dr Cavendish aagfüehrt und dä het d Etappe knapp vor em Tyler Farrar und am Alessandro Petacchi gwunne.
In de Rangliste het sich nüt Wältbewegends veränderet, und dr Niki Terpstra isch zum kämpferiste Fahrer gwehlt worde.
Rangliste vo dr 15. Etappe
Fahrer
Land
Team
Zit
1
Mark Cavendish
Flagge des Vereinigten Königreichs
THR
4h 20' 24"
2
Tyler Farrar
Flagge der Vereinigten Staaten von Amerika
GRM
s.t.
3
Alessandro Petacchi
Flagge Italiens
LAM
s.t.
4
Daniel Oss
Flagge Italiens
LIQ
s.t.
5
José Joaquín Rojas
Flagge Spaniens
MOV
s.t.
6
Ben Swift
Flagge des Vereinigten Königreichs
SKY
s.t.
7
Gerald Ciolek
Flagge Deutschlands
QST
s.t.
8
Tony Gallopin
Flagge Frankreichs
COF
s.t.
9
Francisco Ventoso
Flagge Spaniens
MOV
s.t.
10
Sébastien Hinault
Flagge Frankreichs
ALM
s.t.
Gsamtklassemänt noch dr 15. Etappe
Fahrer
Land
Team
Zit
1
Thomas Voeckler
Flagge Frankreichs
EUC
65h 24' 34"
2
Fränk Schleck
Flagge Luxemburgs
LEO
+ 1' 49"
3
Cadel Evans
Flagge Australiens
BMC
+ 2' 06"
4
Andy Schleck
Flagge Luxemburgs
LEO
+ 2' 15"
5
Ivan Basso
Flagge Italiens
LIQ
+ 3' 16"
6
Samuel Sánchez
Flagge Spaniens
EUS
+ 3' 44"
7
Alberto Contador
Flagge Spaniens
SBS
+ 4' 00"
8
Damiano Cunego
Flagge Italiens
LAM
+ 4' 01"
9
Tom Danielson
Flagge der Vereinigten Staaten von Amerika
GRM
+ 5' 46"
10
Kevin De Weert
Flagge Belgiens
QST
+ 6' 18"
16. Etappe: Saint-Paul-Trois-Châteaux — Gap, 162.5 km
Bi dere Etappe isch s, usser zwei lengere Abfahrte uf Serre und uf Gap, bis elf Kilometer vor em Ziil die ganz Zit ufegange, so dass sogar die zweiti Kategorii Uffahrt uf e 1268 Meter hochi Col de Manse de beste Fahrer schwer worden isch. Drzue isch no cho, ass au d Abfahrt uf s Ziil zue technisch nit eifach gsi isch und dr Räge d Strooss nass gmacht het, so dass d Gfohr bestande het z stürze. Die meiste Fahrer si denn au ehnder vorsichtig gsi und e baar, wie dr Andy Schleck hai wäge däm Zit verlore.
En Usrissergrubbe, drunder dr Thor Hushovd, dr Edvald Boasson Hagen, dr Tony Martin und dr Mikhail Ignatyev, het am Col de Manse meh as fümf Minute Vorsprung uf d Grubbe vom Gääle Liibli gha. Dr Hushovd, wo d Etappe im Ändspurt gegen e Boasson Hagen gwunne het isch au am Ziil no meh as vier Minute vor de erste Favorite aachoo. In dr Grubbe vom Gääle Liibli het dr Contador dr Haber gstoche und er het aagriffe, bim dritte Mol isch s em glunge, dr Voeckler und d Schleck Brüeder z distanziere. Dr Cadel Evans und dr Samuel Sanchez aber hai sich ihm chönne aahänke, dr Evans isch denn den andre beide drvo gfahre, die hai aber dr Abstand zun em am Ziil uf drei Sekunde chönne verchürze. Dr Voeckler und dr Fränk Schleck hai ihre Verlust uf en Evans uf 21 Sekunde chönne beschränke, dr Andy Schleck het aber 69 Sekunde uf en verlore.
In de Rangliste het sich bi de Mannschafte öbbis do: d Garmin-Cervélo isch wider zum flinkste Team worde.
Bi dr 17. Etappe het d Tour en Abstächer uf Italie gmacht. D Strecki isch noch sächzig Kilometer bärgig worde, mit 2 Ufstiig vo dr dritte Kategorii, eim vo dr zweite uf e Montgenèvre, fufzäh Kilometer spöter isch d Sestrière (1. Kategorii) dra gsi, denn isch s lang abwärts gange zum italiänische Dorf Villar Perosa, denn wider ufe uf e Pramartino (2. Kategorii) und denn e gföhrligi Abfahrt zum Ziil. Dr Zwüschesprint isch z Villar Saint Pancrace gsi bim 76. Kilometer.
Meh as e Dotzed Fahrer si vor dr Favoritegrubbe uf e Pramartino uufegfahre, drunder dr Sylvain Chavanel, dr Sandy Casar und dr Edvald Boasson Hagen, wo denn de andere drvogfahren isch, d Abfahrt mit Bravour bewältigt und in de letzte zwei Kilomter sis eignige, brivate Zitfahre verastaltet het. Er het d Etappe mit vierzig Sekunde Vorsprung vor em Bauke Mollema gwunne. Anderi, wie dr Jonathan Hivert, wo churz hinder em Hagen gsi isch, si nid ganz so glanzvoll gfahre. Dr Hivert isch einisch bin ere Kurve vo dr Strooss abchoo und e chli wiiter unde het er non e Kurve nid verwütscht und isch in e Autiparkblatz iinegfahre. Komischerwiis isch genau s Gliiche au em Thomas Voeckler bassiert, won er e baar Minute spöter an dene Ört duurecho isch, was en wärtvolli Sekunde im Gsamtklassemänt kostet het.
Dr Alberto Contador het die andere Favorite scho bim Ufstiig aagrife und isch denn zsämme mit em Sami Sanchez in usgezeichnetem Stil aabe gfahre und het schwer gschafft, zum dr Evans und d Schlecks z distanziere. Zerst het s no usgseh het, ass es em wurd groote. Die andere hai aber nid ufgee und hai die beide Spanier bim Ziil wider iigholt gha.
Das isch e lengeri Etappe gsi mit eme Zwüschesprint im italiänische Verzuolo und drei Bärgbass vo dr Hors Catégorie, dr erst dr Agnel zrugg uf Frankriich, denn dr Izoard und zum Schluss dr Galibier, wo au s Ziil druf gsi isch.
Dr Andy Schleck, wo in ere Usriissergrubbe gsi isch, het d Etappe gwunne und mit ere dr Sonderbriis Souvenir Henri Desgrange übercho. Er isch vo dr Favoritegrubbe dr Galibier uufe gjagd worde, aber nume dr Cadel Evans het dört gschafft. Dr Fränk Schleck het churz vor em Ziil aagriffe und em Evans acht Sekunde abgnoh und isch Dritte im Gsamtklassemänt bliibe noch em Thomas Voeckler, wo siis Gääle Liibli knapp verdeidigt het, und em Andy Schleck. Dr Alberto Contador het am Schluss nüm mitmööge und het fast vier Minute uf e Andy Schleck verlore.
Dr Lengi nooch isch die Etappe mit 109,5 Kilometer churz gsi, aber s het din noch em Ufstiig uf e Col du Télégraphe (1.Kategorii) non e Ufstiig uf e Galibier (Hors Catégorie) gha, aber das mol vo dr schwiirige Site. Es isch oobe nid über dr Bass sondern dur e Tunnel gange, wo uf ere Höchi vo 2556 Meter lit, denn isch s fast fufzig Kilometer bärgab gange uf Le Bourg d'Oisans, wo dr Zwüschesprint stattgfunde het. Denn isch s uf d Alpe d'Huez (Hors Catégorie) ufegange, wo s Ziil gsi isch.
In dere Etappe het sich dr Voeckler ändlig müesse gschlaage gee. Wenn er dr Vorsprung, wo dr Andy Schleck zsämme mit em Contador uf em Galibier uusegfahre het, bi dr Abfahrt no het chönne verchlinere, het en d Uffahrt uf d Alpe d'Huez fertig gmacht. 3 Minute 22 Sekunde het er verlore uf e Pierre Rolland, wo d Etappe und gliichzitig s Wiisse Liibli gwunne het, im Vergliich zu de 57 Sekunde, wo dr Cadel Evans, dr Damiano Cunego, dr Andy und dr Fränk Schleck uf e Rolland verlore hai. Dr Sami Sánchez (+ 14 Sekunde) und dr Alberto Contador (+ 23 Sekunde) si überraschend stark gsi und hai dr zweit und dr dritt Blatz beleit. D Pünkt im Bärgklassemänt, wo dr Sánchez in dere Etappe gsammlet het, hai em s Liibli mit de rote Pünkt verschafft.
Dr Tony Martin het s Zitfahre uf dr gliiche Strecki bi dr Dauphiné vor eme Monet gwunne und au bi dr Tour de France isch er dr Best gsi. Aber dr Cadel Evans, s neue Gääle Liibli, het nume siibe Sekunde uf en verlore und so wider bewiise, ass er nit nume en usgezeichnete Bärgfahrer isch, sondern au Wältklass bim Zitfahre. Im Andy Schleck het si 17. Blatz nid glängt, zum s Gääle Liibli z verdeidige und nimmt jetzt, wie scho in de letschte zwei Johr, dr zweit Blatz im Gsamtklassemänt ii. Si Brueder Fränk isch Dritte bliibe, und dr Thomas Voeckler het mit eme 13. Blatz überrascht und isch immer no Vierte. Dr Alberto Contador (Dritte) und dr Samuel Sánchez (Sibte) hai wider e guete Daag gha und hai ihri Zit im Vergliich zu de Schlecks chönne verbessere und dr Damiano Cunego vom fümft uf e sibt Blatz im Gsamtklassemänt verdrängt, aber zu meh het s nid glängt.
Die letscht Etappe isch nume 95 Kilometer lang gsi und isch z Baris uf de Champs-Èlisées z Änd gange. E Grubbe vo sächs Fahrer isch uf de Champs-Èlisées usgrisse, isch aber nie über e Vorsprung vo meh as öbbe fufzig Sekunde choo. Im Mark Cavendish si Mannschaft het zerscht anderi lo schaffe und erst in dr letschte Runde im Cavendish si Ändspurt vorbereitet, wo dä denn au mit ere Velolengi vor em Edvald Boasson Hagen gwunne het.
Frankriich
Italie
Gääls Liibli
Grüens Liibli
Liibli mit de Pünkt
Wisses Liibli
Philippe Gilbert
Team Garmin-Cervélo
Thor Hushovd
Cadel Evans
Mark Cavendish
Ruy Alberto Faria da Costa
Luis León Sánchez Gil
André Greipel
Andy Schleck
