Lee Harvey Oswald
Si Lee Harvey Oswald (Oktobre 19, 1939 - Nobyembre 24, 1963) iyo an kagggibo kan pag'asasinar kan Nobyembre 22, 1963 ki Presidente John F. Kennedy, an ika-35 presidente kan Estados Unidos, susog sa imbestigasyon na kinondukta kan limang ahensya nin gobyerno duman sa Dallas, Texas.
Si Oswald dating U.S. Marine na nagrenunsya kan saiyang lealtad sa Estados Unidos asin hayag nagkampi sa Unyon Sobyet, kan Oktobre 1959. Duman sa Unyon Sobyet, siya nag'estar nin abot Hunyo 1962 alagad uminule' mansana sa Amerika. Enot kaidto, siya inaresto sa paggadan ki J.D. Tippit, sarong pulis na opisyal, 45 minuto sana pakabadil ki Presidente Kennedy. Dangan siya inakusaran sa pag'asasinar ki Kennedy alagad sa duwang kargo inatubang saiya, pareho niya pigpahimutikan.
Pakalihis duwang aldaw, kan siya kuta ihuhubo' hale sa kwartel kan pulis pasiring duman sa preso, si Oswald binadil asin nagadan kan sarong nightclub owner na si Jack Ruby sa tahaw kaiyan an mga pangyayari pigrerekord kan mga istasyon sa telebisyon asin dakul na tawo man ngane an nagdadaralan.
Kan 1964, an Warren Commission pakatapos nin halawig na pagimbestigar, naadalan na si Oswald solo sana sa paggibo kan krimen asin tolong beses nagpaputok. An enot na pagbadil niya nalahosan an kotse kun saen lunad si Kennedy, an sarong paputok tinamaan si Kennedy asin kasabay nahagop man an gobernador kan Texas na si John Connally, asin an ikatolo nalagarto si Kennedy sa payo.[1] An konklusyon kan imbestigasyon nagsubo mansana sa resulta kan imbestigasyon na ginibo kan Federal Bureaun of Investigation, kan Secret Service asin kan Departamento nin Pulis nin Dallas.[2][3]
Sinasabi na apesar kan dakul na ebidensya naguno sa forensic, ballistic asin testigong impormasyon na nag'aandoyog sa teoriyang "solong kagbadil", sa mga pabotong giniribo, mayoriya kan mga Amerikano nagtutubod na may kakomplot si Oswald sa paggibo kan krimen mala ta kun ano-ano na an 'conspiracy theories' nagburutwa katakod kan asasinasyon ki Kennedy.[4] Kan taon 1979, sarong House Select committee an nagkondukta liwat nin imbestigasyon dapit sa pag'asasinar ki Kennedy asin an konklusyon kaini na totoo mananggad na si Oswald an nakabadil ki Kennedy alagad susog sa mga tanog kan mga putok badil, may katabang daa si Oswald sa paggibo kan krimen.[5][6]
Mga panluwas na takod
[baguhon | baguhon an source]- [1] John F. Kennedy: Presidential Library and Museum /Kinua 26-11-13
- [2] Pagromdom kan pagkagadan ni Kennedy/ Kinua 26-11-13
Toltolan
[baguhon | baguhon an source]- ↑ Warren Report, chapter 1, p. 19.
- ↑ John F. Kennedy, Dallas Police Department Collection
- ↑ John R. Tunheim (March 1, 1999). Final Report of the Kennedy Assassination Records Review Board. DIANE Publishing. p. 1. ISBN 978-0-7881-7722-4.
- ↑ "Gallop: Most Americans Believe Oswald Conspired With Others to Kill JFK". Gallup.com. Retrieved 2012-12-24.
- ↑ "Summary of Findings and Recommendations". Report of the Select Committee on Assassinations of the U.S. House of Representatives. Washington, D.C.: United States Government Printing Office. 1979. p. 3.
- ↑ House Select Committee on Assassinations Final Report, pp. 65-75.
