Гуана́ка (Lama guanicoe) — млекакормячае роду ламаў сямейства вярблюдавых.
Трапляецца на сухіх паўпустынных высакагор’ях (да 5000 м) Андаў Паўднёвай Амерыкі. Жывуць невялікімі статкамі (да 20 галоў).
Даўжыня цела 180—225 см, хваста 15—25 см, вышыня 90—130 см, маса 48—96 кг. Цела ўкрыта бураватай шэрсцю (даўжыня 6—10 см). Шыя і канечнасці доўгія, тулава пакарочанае. Нараджае адно, зрэдку двух дзіцянят. Корміцца травяністай расліннасцю.
