松赞干布

松赞干布（-650年），悉补野氏，伊是吐蕃雅鲁王朝个第33任赞普，也是吐蕃帝国个建立者，在位辰光大约莫是勒公元629年到650年。伊个阿伯是前任赞普囊日论赞。

伊本来名字叫赤松赞。“松赞干布”是伊个尊号，意思是“心胸深邃个松赞”。古代书里还有更加勿一样个叫法，像《新唐书》里有弃宗弄赞、弃苏农，《册府元龟》里个称呼译器宗弄赞、器宋弄赞、不弗弄赞，《通典》是弃苏农赞。勒伊在位期间，吐蕃个版图扩大了交关，定都拉萨，还确立了吐蕃个政治、军事、经济及法律等制度，为后首来吐蕃变成一只强盛大国打下了基础。伊通过搭仔泥婆罗（现在个尼泊尔）个联姻，提高了吐蕃个工艺技术水平；而通过跟唐朝个和亲，从唐朝引进当时先进个科学、医学跟历法，提高了吐蕃人个文化水平。据说佛教也是通过个两趟联姻开始进入西藏。拉萨牢有名个布达拉宫也是伊在位个辰光造个。

松赞干布特伊个两位王妃赤尊公主跟文成公主三家头，到现在还是老受藏族人尊敬、崇拜个。