Pebostría de Berchtesgaden

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficcos necesarios y sacando dimpués ista plantilla.

Pebostría de Berchtesgaden Fürstpropstei Berchtesgaden
← 1194 — 1803 →
Situación de Pebostría de Berchtesgaden Pebostría en 1789
Capital	Berchtesgaden
Idioma oficial  • Atros idiomas	Alemán y latín Bavaro
Relichión	Catolica
Gubierno	Prencipau
Prencipe-pebostre  • 1559  • 1803	Wolfgang II Griestätter Joseph Konrad von Schroffenberg
• Establimiento	1102
• Dentra en l'imperio	1194
• S'une a o cerclo bavaro	1500
• Prencipe-pebostre	1559
• Union a o reino de Bavera	1810
Población	10.000 hab.
Moneda	Talero de Berchtesgaden

A Pebostría de Berchtesgaden u Prencipau pebostral de Berchtesgaden estió una churisdicción territorial d'orichen eclesiasticco, creyada por a Orden de Sant Agostín, que s'estendillaba por o territorio de Berchtesgaden, que actualment se troba aintro d'o districto de Berchtesgadener Land en l'Alta Bavera, Alemanya.

Historia

O monesterio, adedicau a Sant Pero y Sant Chuan Baptista, fue establiu en 1102 por una comunidat de monches agustinians procedents de Sulzbach por deseyo d'a condesa Irmgard de Sulzbach, filla d'o conde-palatín Kuno I de Rott. Dimpués d'a suya muerte, o suyo fillo Berenguer de Sulzbach y o suyo fillastro Kuno de Horburg s'encargoron d'establir o monesterio.

O territorio d'a pebostría incluyiba toda a val de Berchtesgaden, que corresponde a o que hue serían os municipios de Berchtesgaden, Bischofswiesen, Marktschellenberg, Ramsau bei Berchtesgaden y Schönau am Königssee, encara que ocasionalment a suya churisdicción s'estendilló sobre bellas arias situadas difuera d'iste territorio. Por ixas envueltas os centros d'o prencipau yeran os mercaus de Berchtesgaden y Schellenberg y a vicaría de Ramsau, mientres que o territorio s'organizaba en unidaz administrativas ditas Gnotschaften.

A localización d'o monesterio yera un punto estratechicco de gran importancia, amán d'os depositos de sal de Berchtesgaden y entre os territorios d'os suyos vecins mas poderosos, Bavera y Salzburgo, lo que le permitiba actuar como estau tampón en beneficio propio. D'atra man cal considerar a situación cheografica d'a val, rodiada de grans monts que la feban cuasi inaccesible por toz os costaus difuera d'un unicco punto por o norte. Istas circunstancias facioron que a pebostría tenese pocas dificultaz ta mantener a suya independencia y en 1194 se convirtió en una abadia imperial. En 1380 o pebostre fue nombrau prencipe de l'Imperio (Reichsfürste), y en 1559 obtiene o dreito de posar-se en o Reichstag como prencipe-pebostre, un títol comparable a o de prencipe-bispe.

Por un regular o títol de prencipe-pebostre yera poseyiu conchuntament con atros de l'alta cherarquía eclesiastica y a sobén os pebostres viviban difuera d'o territorio d'a suya churisdicción.

Entre 1802 y 1803 a pebostría y os suyos territorios fuoron secularizaus en o marco d'a Reichsdeputationshauptschluss (en aragonés Gran secularización alemana) y pasoron en 1805 a o Electorato de Salzburg en Austria y en 1810 a Bavera. Os edificios monastics fuoron emplegaus mientres bels anyos como caserna pero en 1818 o monesterio se convirtió en residencia d'a familia reyal bavara, a dinastía Wittelsbach, que lo utilizó como palacio de verano.

En rematar a monarquía bavara, o monesterio fue considerau como parti d'os fundos personals d'os Wittelsbach (Wittelsbacher Ausgleichsfond). Actualment bellas salas d'o palacio son ubiertas a o publicco, mientres que atras encara son utilizadas por os hereus d'os Wittelsbach. A ilesia d'o monesterio funciona como ilesia parroquial d'a localidat.

Vinclos externos

• Se veigan as imáchens de Commons sobre Pebostría de Berchtesgaden.
• (de) Klöster in Bayern (Monesterios de Bavera)
• Mapa de Bavera de 1789 que amuestra o Pebostría de Berchtesgaden

• Datos: Q683488
• Multimedia: Berchtesgaden Provostry / Q683488