26. janúar

26. janúar er 26. dagur ársins samkvæmt gregoríska tímatalinu. 339 dagar (340 á hlaupári) eru eftir af árinu.

Atburðir

• 1340 - Játvarður 3. Englandskonungur var lýstur konungur Frakklands.
• 1531 - Jarðskjálfti skók Lissabon, þúsundir fórust.
• 1569 - Eiríkur 14. Svíakonungur var formlega settur af og Jóhann 3. útnefndur konungur Svíþjóðar.
• 1644 - Þingherinn sigraði konungssinna í orrustunni við Nantwich.
• 1666 - Frakkland sagði Englandi stríð á hendur til stuðnings Hollandi.
• 1679 - Svíar sömdu um frið við Heilaga rómverska ríkið í Nijmegen.
• 1699 - Pólsk-litháíska samveldið, Feneyjar og Austurríki gerðu Karlowitz-sáttmálann við Tyrkjaveldi þar sem Tyrkir létu eftir stóran hluta af löndum sínum í Austur-Evrópu og á Balkanskaga.
• 1736 - Stanislás 1. Póllandskonungur sagði af sér.
• 1785 - Benjamin Franklin skrifaði bréf til dóttur sinnar og lýsti vonbrigðum sínum með að skallaörninn skyldi vera valinn sem þjóðartákn Bandaríkjanna. Sjálfur vildi hann sjá villta kalkúninn.
• 1788 - Fyrsta nýlenda Evrópumanna í Ástralíu var stofnuð, fanganýlendan sem síðar hlaut nafnið Sydney.
• 1837 - Michigan var tekið inn sem 26. sambandsríki Bandaríkjanna.
• 1866 - Ísafjörður fékk kaupstaðarréttindi. Þá bjuggu þar 220 manns.
• 1894 - Hið íslenska kvenfélag var stofnað í Reykjavík.
• 1904 - Kvenfélagið Hringurinn var stofnað í Reykjavík.
• 1906 - Verkamannafélagið Dagsbrún í Reykjavík var stofnað.
• 1924 - Petrograd (Sankti Pétursborg) fékk nafnið Leníngrad.
• 1953 - Neytendasamtökin voru stofnuð á Íslandi.
• 1955 - Aftakaveður grandaði tveimur breskum togurum út af Vestfjörðum og fórust 40 menn af þeim. Togarinn Egill rauði strandaði undir Grænuhlíð og fórust 5 menn en 29 var bjargað.
• 1956 - Guðrún Pálsdóttir, ekkja Héðins Valdimarssonar, gaf Dagsbrún bókasafn eiginmanns síns.
• 1965 - Hindí varð opinbert tungumál Indlands.
• 1970 - Handknattleiksfélag Kópavogs var stofnað.
• 1970 - Simon & Garfunkel sendu frá sér breiðskífuna Bridge Over Troubled Water.
• 1979 - Sjónvarpsþáttaröðin The Dukes of Hazzard hóf göngu sína á CBS.
• 1980 - Ísrael og Egyptaland tóku upp stjórnmálasamband.
• 1982 - Mauno Koivisto var kjörinn forseti Finnlands.
• 1983 - Lotus 1-2-3 kom út fyrir IBM PC-samhæfðar tölvur.
• 1988 - Söngleikurinn Óperudraugurinn hóf göngu sína á Broadway.
• 1991 - Borgarastyrjöldin í Sómalíu: Stjórn Siad Barre hrökklaðist frá völdum.
• 1992 - Boris Jeltsín tilkynnti að Rússland myndi hætta að beina kjarnavopnum á bandarískar borgir.
• 1993 - Václav Havel var kosinn fyrsti forseti Tékklands.

• 1998 - Lewinsky-hneykslið: Bill Clinton neitaði að hafa átt í kynferðislegu sambandi við Monicu Lewinsky.
• 1998 - Compaq keypti Digital Equipment Corporation.
• 2000 - World Wide Web Consortium (W3C) mælti með XHTML 1.0-staðlinum.
• 2001 - Þúsundir fórust þegar jarðskjálfti reið yfir Gujarat á Indlandi.
• 2009 - Geir Haarde baðst lausnar fyrir ráðuneyti sitt.
• 2009 - Alþjóðlegi sakamáladómstóllinn í Hag réttaði yfir kongóska skæruliðaleiðtoganum Thomas Lubanga.
• 2010 - Bílasprengja sprakk við innanríkisráðuneytið í Bagdad með þeim afleiðingum að 17 létust.
• 2021 - Kaja Kallas varð forsætisráðherra Eistlands.

Fædd

• 1592 - Shah Jahan, Mógúlkeisari (d. 1666).
• 1795 - Policarpa Salavarrieta, nýgrenadísk saumakona (d. 1817).
• 1811 - Robert Scott, textafræðingur (d. 1887).
• 1852 - Pierre Savorgnan de Brazza, ítalsk-franskur landkönnuður (d. 1905).
• 1862 - Ólafur Davíðsson, íslenskur þjóðfræðingur (d. 1903).
• 1867 - Þorsteinn Gíslason, íslenskt skáld (d. 1938).
• 1880 - Douglas MacArthur, bandarískur hershöfðingi (d. 1964).
• 1893 - Valtýr Stefánsson, íslenskur ritstjóri (d. 1963).
• 1904 - Seán MacBride, írskur stjórnmálamaður (d. 1988).
• 1918 - Nicolae Ceausescu, forseti Rúmeníu (d. 1989).
• 1925 - Joan Leslie, bandarísk leikkona (d. 2015).
• 1925 - Paul Newman, bandarískur leikari (d. 2008).
• 1935 - Friðrik Ólafsson, íslenskur stórmeistari í skák.
• 1945 - Jeremy Rifkin, bandarískur félagsfræðingur.
• 1953 - Anders Fogh Rasmussen, danskur stjórnmálamaður.
• 1955 - Eddie Van Halen, hollenskur tónlistarmaður (d. 2020).
• 1958 - Ellen DeGeneres, bandarísk leikkona og uppistandari.
• 1961 - Wayne Gretzky, kanadískur íshokkíleikari.
• 1963 - José Mourinho, portúgalskur knattspyrnustjóri.
• 1963 - Andrew Ridgeley, breskur tónlistarmaður.
• 1965 - Kevin McCarthy, bandarískur stjórnmálamaður.
• 1970 - Bjarni Benediktsson, íslenskur stjórnmálamaður.
• 1971 - Aygun Kazimova, asersk söngkona.
• 1973 - Sólveig Arnarsdóttir, íslensk leikkona.
• 1973 - Brendan Rodgers, norðurírskur knattspyrnustjóri.
• 1987 - Gojko Kačar, serbneskur knattspyrnumaður.

Dáin

• 1188 - Eysteinn Erlendsson erkibiskup í Niðarósi.
• 1630 - Henry Briggs, enskur stærðfræðingur (f. 1556).
• 1697 - Georg Mohr, danskur stærðfræðingur (f. 1640).
• 1795 - Johann Christoph Friedrich Bach, þýskur tónsmíðandi (f. 1732).
• 1823 - Edward Jenner, enskur læknir (f. 1749).
• 1947 - Gústaf Adólf erfðaprins (f. 1906).
• 1979 - Nelson Rockefeller, ríkisstjóri New York og varaforseti Bandaríkjanna (f. 1908).
• 1979 - Bart McGhee, bandarískur knattspyrnumaður (f. 1899).
• 2009 - Sigurður Samúelsson, íslenskur hjartalæknir (f. 1911).

Hátíðis- og tyllidagar

• Þjóðhátíðardagur Ástralíu