Harald II av Noreg

Harald II Eiriksson (935–970) var son av kong Eirik Blodøks og soneson av kong Harald Hårfagre. Harald II var konge av Noreg frå om lag 960 til 970. Han vert ofte kalla Harald Gråfell, av norrønt Haraldr gráfeldr.

Harald II
Gunnhild eggjer sønene sine. Teikning av Christian Krogh.
konge av Noreg
Regjeringstid	960–970
Fødd	935
Fødestad	Noreg
Død	970
Dødsstad	Hals
Føregangar	Håkon I Adalsteinsfostre den gode
Etterfølgjar	Harald I Blåtann av Danmark Håkon Sigurdsson Ladejarl
Gift med	Ingen kjent
Dynasti	Hårfagreætta
Far	Eirik I av Noreg
Mor	Gunnhild kongsmor

Bakgrunn

Han var son av Eirik Blodøks og Gunnhild Ossursdotter, men voks opp hjå fosterfaren Harald Gormsson Blåtann. Han hadde åtte sysken.

Tilnamnet fekk han ifylgje Heimskringla etter ei reise til Hardanger. Der såg han ein islandsk handelsmann med mange skinn, som han ikkje fekk seld. Harald gjekk bort til han og spurde om han kunne få eit skinn av han, og det fekk han. Snart hadde alle om bord i Harald sitt skip skinnfellar. Etter dette gjekk salet av skinnfellar så bra at halvdelen som ville kjøpe skinnfell ikkje fekk.

Regjeringstid

Han overtok trona etter at han vann eit slag mot kong Håkon den gode. Slaget ved Fitjar stod om lag 960. Harald og syskena var i stendig kamp mot Håkon den Gode etter at han dreiv far deira ut av landet. Etter slaget vart Harald konge saman med fire yngre brør. Alle var som underkongar under danskekongen Harald Blåtann. Eirikssønene ville stendig ha meir makt, og prøvde å leggja under seg meir land. Dei gjekk til kamp mot Ladejarlane, som var mektige i Trøndelag, på Vestlandet og i Nord-Noreg. Danskekongen likte ikkje det, og tok parti med Ladejarlane. Harald Gråfell vart kalla til Danmark, der han vart drepen i eit bakhaldsåtak på Hals ved Limfjorden om lag 970. Dei attlevande brørne rømde etter dette landet. Danskekongen gav så makta i Noreg til Ladejarlen Håkon Sigurdsson Jarl.

Bakgrunnsstoff

Commons har multimedium som gjeld: Harald II av Noreg

• Harald Gråfelds saga i Heimskringla.
• Den norske kongerekken i Det norske kongehus.