Nicole Hosp

Nicole Hosp (fødd 6. november 1983) er ein austerriksk tidlegare alpin skirennar frå Ehenbichl i Tirol. Ho vann verdscupen i alpine greiner 2007 og vart verdsmeister i storslalåm same sesongen, samt i lagøvinga i 2013 og 2015. I åra frå 2003 til 2015 sikra ho seg i alt 12 medaljar i ulike verdsmeisterskap og olympiske leikar; tre gull-, fem sølv- og fire bronsemedaljar.

Nicole Hosp
Statsborgarskap	Austerrike
Fødd	6. november 1983 (41 år) Ehenbichl
Idrett	alpint
Tok del i	Alpint under Vinter-OL 2014 – Super-G kvinner, Alpint under Vinter-OL 2006 – Slalåm kvinner, Alpint under Vinter-OL 2014 – Kombinasjon kvinner
Utmerkingar	ærestegn i sølv av Ærestegnet for fortjenester

Aktiv

Hosp debuterte i den alpine verdscupen i eit slalåmrenn i Garmisch-Partenkirchen 18. februar 2001. Den 26. oktober 2002 vann ho storslalåmrennet i sesongopninga i Sölden. Under VM i alpine greiner 2003 i St. Moritz tok ho sølvmedaljen i kombinasjonen og bronsen i slalåm-tevlinga. Ved alpint-VM 2005 i Santa Caterina vart ho nummer fem i storslalåm, og deltok i slalåm for Austerrike i lagtevlinga, noko som enda med sølvmedalje.

Ho var lenge spesialist i dei tekniske øvingane, slalåm og storslalåm, men 20. januar 2006 deltok ho for fyrste gong i eit verdscuprenn i super-G, og enda på tredjeplass. Under Vinter-OL 2006 tok ho sølv i slalåm, svenske Anja Pärson vann gullet.

I VM i alpine greiner 2007 i Åre vart Hosp verdsmeister i storslalåm, og tok bronsemedaljen i utfor. Gjennom 2007-sesongen viste ho seg som verdas beste kvinnelege alpinist og tok heim verdscup-pokalen for 2007 med 1572 poeng, 90 fleire poeng enn landskvinna Marlies Schild.

Etter Hosp vart kneskadd i Aspen i Colorado i slutten av november 2008, skulle det gå fleire sesongar før ho atter kunne måle seg mot verdseliten. Under VM i alpine greiner 2013 i Schladming deltok ho på Austerrike sitt sigerrike mannskap i lagøvinga, og ho kom på tredjeplass i superkombinasjonen. Også under Vinter-OL 2014 i Sotsji tok ho ein bronsemedalje, då i super-G.

Den 30. november 2014 sigra Hosp i sitt 12. renn i verdscupen, nærare sju år etter den forrige rennsigeren. Ho vann då slalåmrennet i Aspen, nesten på dagen seks år etter ho vart skadd same staden. I VM i alpine greiner 2015 kneip ho sølvmedaljen i den alpine kombinasjonen og tok gull i lagøvinga. Ved sesongslutt la ho opp som skirennar.

Kjelder

• Sportsboken, aktuelle årgangar

• Denne artikkelen bygger på «Nicole Hosp» frå Wikipedia på tysk, den 4. desember 2014.