昂船洲

昂船洲（港府拼音：Ngong Shuen Chau；英文：Stonecutters' Island、Stonecutters Island或Stone Cutters Island），異字昻船洲，又叫仰船洲，《北京條約》誤寫盎船洲，亦有圖誤譯溫珍洲，係香港一島，喺九龍西面，維多利亞港北部。西九龍填海之故，家下同九龍大陸連埋。島北主要係船廠，南面係軍事重地，而西面就係葵涌貨櫃碼頭。

昂船洲

史

北京條約有昂船洲，不過寫盎船洲

廣東話昂同仰，都係讀ngong2（粵拼），兩寫都解向上。第二種講法係島形似船底向上，所以叫昂船。

英國人來到香港水域，就叫呢個島做Stonecutters' Island。個名反映九龍一帶採石畀香港島維城、廣州唔同地方起屋嘅歷史。個島曾經開過石塘，好多人打石。大清咸豐十年（1860年），按《北京條約》割讓九龍半島畀英國，昂船洲都包埋響入面。英國人開昂船洲做游水勝地。因為同大陸隔籬，昂船洲亦都有唔少軍事設施，直到家下都係。

響日本佔領香港前夕，個島由英國陸軍接管，昂船洲亦都佈有炮臺，向北用來抵擋日軍。不過醉酒灣防綫守唔住，1941年12月11號，昂船洲畀日軍炮轟，好多軍人受傷，附近碼頭唔少商船都打沉。最後頂唔順要撤去香港島。

1984年英國同中華人民共和國，達成主權移交協議。其中香港島中環添馬艦海軍基地塊地，會交返畀香港政府，而個海軍基地就搬去昂船洲。1997年7月1號之後，中國人民解放軍就接管呢個基地。