Shablono:Eventi
dum oktobro
50, 100 e 150 yari ante nun …
15 di oktobro 1974. La kosmosondilo Ariel 5 lansesis, de la marbordo di Kenia. Ol esis un de la Ariel-serio de sis kosmosondili di Britania ed Usa, lansita de 1962 til 1979, por savigar la cirkumajo en orbito cirkum Tero. La unesma quar tala sateliti studiis la ionosfero. Ariel 5 studiis X-radii; dum la unesma quar yari di olua funcionado, plu kam cent ciencala dokumenti produktesis pri la rezultaji. La satelito funcionis til 1980.
12 di oktobro 1924. En Tours, la Franca skriptisto Anatole France mortis. Ilua patro esis libro-vendisto, qua partikulare vendis libri pri la Franca revoluciono. Notinda skriptisti vizitis la butiko. Pos ilua eduko, Anatole helpis sua patro en la butiko. En 1876 il divenis bibliotekisto di la Franca Senato. En la komenco di ilua kariero kom skribisto il esis jurnalisto. Il skribis plura romani, de qui Le Crime de Sylvestre Bonnard (1881) ganis premio de la Académie française. Anatole France esis notinda pro ilua ironio e skeptikeso.
20 di oktobro 1874. En Danbury, Connecticut Usa, la komercisto e kompozisto Charles Ives naskis. Evante dek-e-quar yari il divenis orgenisto ye la lokala kirko. Il studiis muziko ye Universitato Yale de 1894 til 1898. Ilua kariero esis en asekurado, ed il kompozis dum semano-fini, produktante granda quanteso de muziko: simfonii ed altra orkestrala muziko, kansoni, muziko por piano, korala muziko ed altraji. Il poke interesis su pri publika pleado di ca verki. Il cesis kompozar en 1926, e la kompozuri gradope divenis konocata dum sequanta yari. En sua kompozuri il experimentis pri nekustumala ritmi, plura-tonaleso, ne-tonaleso, e ne-kustumala ensembli de instrumenti.