Coimbra

Cordenadas: 40° 15' N 08° 27' O

**Coimbra**

Brason	Bandeira
Coimbra bista de l Mondego

Gentílico	Coimbrense, Conimbricense, Coimbron
Ária	319,41 km²
Populaçon	143 396 hab. (2011)
Densidade populacional	Nun çponible
N.º de freguesies	31
Fundaçon de l munecípio (ó foral)	1111
Region	Centro
Subregion	Baixo Mondego
Çtrito	Coimbra
Antiga porbíncia	Beira Litoral
Ourago	Santa Isabel de Aragon, Reina de Pertual, (Reina Santa Isabel)
Feriado municipal	4 de júlio
Código postal	3000 Coimbra
Andereço de ls Paços de l Cunceilho	Praça 8 de Maio 3000-300 Coimbra
Sítio oufecial	www.cm-coimbra.pt
Andereço de correio eiletrónico	geral@cm-coimbra.pt
Munecípios de Pertual

Coimbra OTE ye ua cidade pertuesa, capital de l Çtrito de Coimbra, la maior cidade de la region Centro de Pertual i situada na sub-region de l Baixo Mondego, cun cerca de 143 396 habitantes.^[1] Sendo l maior núcleo ourbano, ye centro de refréncia na region de las Beiras, Centro de Pertual cun mais de dous milhones d'habitantes.

Cidade storicamente ounibersitária, por causa de la Ounibersidade de Coimbra, fundada an 1290, cunta atualmente cun cerca de 30 mil studantes.

Banhada pul Riu Mondego, Coimbra ye sede dun munecípio cun 319,41 Km² de ária i cerca de 143 052 habitantes (2011), subdebidido an 31 freguesies.

L munecípio ye lemitado a norte pul munecípio de Mialhada, a leste por Penacoba, Bila Nuoba de Poiares i Miranda de l Corbo, a sul por Cundeixa-la-Nuoba, a oeste por Montemor-l-Bielho i a noroiste por Cantanhede.

Ye cunsidrada ua de las mais amportantes cidades pertuesas, debido l'anfraestruturas, ourganizaçones i ampresas para para alhá de la sue amportança stórica i prebilegiada posiçon geográfica ne l centro de la spina dorsal de l paíç. Coimbra ye tamien refréncia nas árias de l Ansino i de la Salude.

L feriado municipal ocorre a 4 de Júlio, an mimória de la Reina Santa Isabel, padroeira de la cidade.

Fui Capital Nacional de la Cultura an 2003 i ye ua de las cidades mais antigas de l paíç, tenendo sido capital de l Reino, i apersenta cumo percipal ex-libris la sue Ounibersidade, la mais antiga de Pertual i de ls países de léngua pertuesa, i ua de las mais antigas de la Ouropa.

Stória

Cidade de rues streitas, pátios, scadinhas i arcos mediebales, Coimbra fui brício de nacimiento de seis reis de Pertual, de la Purmeira Dinastie, assi cumo de la purmeira Ounibersidade de l Paíç i ua de las mais antigas de la Ouropa.

Ls Romanos chamórun a la cidade, que se arguia pula colina subre l Riu Mondego, Aemeniun. Mais tarde, cul oumiento de la sue amportança passou a ser sede de Diocese, sustituindo la cidade romana de Cunímbriga, donde deribou l sou nuobo nome. An 711 ls mouros chegórun a la Península Eibérica i la cidade passa a chamar-se Kulūmriyya, tornando-se nun amportante antreposto comercial antre l norte crestiano i l sul árabe, cun ua fuorte quemunidade moçárabe. An 871 torna-se Cundado de Coimbra mas solo an 1064 la cidade ye defenitibamente reconquistada por Fernando Magno de Lion.

Coimbra renace i torna-se la cidade mais amportante ambaixo de l riu Douro, capital dun basto cundado gobernado pul moçárabe Sesnando. Cul Cundado Portucalense, l conde D. Anrique i la reina D. Tereza fázen deilha la sue residéncia, i benerie a ser na sigurança de las sues muralhas qu'eirie nacer l purmeiro rei de Pertual, D. Fonso Heinriques, que faç deilha la capital de l cundado, sustituindo Guimarães an 1129 (ye aliás esta mudança de la capital pa ls campos de l Mondego que se benerá a rebelar bital para biabelizar l'andependéncia de l nuobo paíç, a todos ls nibles: eiquenómico, político i social). Culidade que Coimbra cunserbará até 1255, quando la capital passa a ser Lisboua.

Ne l seclo XII, Coimbra apersentaba yá ua strutura ourbana, debedida antre la cidade alta, zeignada por Alta ó Almedina, adonde bebian ls aristocratas, ls clérigos i, mais tarde, ls studantes, i la Baixa, de l comércio, de l'artesanato i de ls bairros ribeirinhos populares.

Zde meados de l seclo XVI que la stória de la cidade passa a girar an torno a la stória de la Ounibersidade de Coimbra, sendo solo yá ne l seclo XIX que la cidade se ampeça a spandir para para alhá de l sou casco muralhado, que chega mesmo a zaparecer cula reformas liebadas a cabo pul Marqués de Palumbar.

La purmeira metade de l seclo XIX traç tiempos defíceles para Coimbra, cula acupaçon de la cidade pulas tropas de Junot i Massena, durante l'ambason francesa i, mais tarde, la stinçon de las ordes relegiosas. Inda assi, na segunda metade d'uitecientos, la cidade benerie a recuperar l splendor perdido – an 1856 surge l purmeiro telégrafo eilétrico na cidade i l'eiluminaçon a gáç, an 1864 ye einougurado l camino-de-fierro i 11 anhos depuis nace la puonte férrea subre las augas de l riu Mondego.

Cula Ounibersidade cumo refréncia inultrapassable, desta surge mobimientos studantis, de cariç quier político, quier cultural, quier social. Muitos desses mobimientos i antidades nun rejistiran al passar de ls anhos, mas outros inda hoije resisten cun bigor al passar de ls anhos. De la Ounibersidade surgiran i resisten inda hoije an plena atebidade purmeiro l Orfeon Académico de Coimbra, an 1880, l mais antigo coro de l paíç, la própia Associaçon Académica de Coimbra, an 1887, i la Tuna Académica de la Ounibersidade de Coimbra, an 1888. Cul passar de ls anhos, einúmaros outros ourganismos fúrun surgindo. Cun persença an trés seclos i un peso social i cultural eimenso, l Orfeon Académico de Coimbra repersentou l paíç un pouco por to l mundo, an todos ls cuntinentes, liebando la música coral pertuesa i l Fado de Coimbra a to l mundo.

A 26 de Abril de 1919 fui feita Oufecial de la Orde Melitar de la Torre i Spada, de l Valor, Lealdade i Mérito.^[2]

Alcaides de Coimbra i Persidentes de la Cámara Municipal

Gabriel Ponce de Leon de Lancastre
Gonçalo Mendes de Basconcelos
Martin de Freitas
D. Pedro Pais de la Silba
Basco Fonso ó Basco Mouro
Vasco Pais
Manuel Machado Partido Socialista
Carlos Encarnação Partido Social Democrata
João Paulo Barbosa de Melo Partido Social Democrata

Eiboluçon demográfica

Populaçon de l cunceilho de Coimbra (1801 – 2011)
1802	1849	1900	1930	1960	1981	1991	2001	2011
46 343	32 517	54 105	76 494	106 404	138 930	139 052	146 317	143 396^[3]

Eiducaçon

Por bastantes bezes, Coimbra ye chamada de "Cidade de l Coincimiento" ó "Cidade de ls studantes", percipalmente por tener ua de las mais antigas i prestigiadas ounibersidades de la Ouropa – la Ounibersidade de Coimbra (UC) ye l'heirdeira de l Studo Giral solicitado al Papa pul Rei D. Dinis i por un cunjunto de prelados pertueses an 1288, i que benerie a oubter cunfirmaçon pontifícia an 1290, tenendo-se stablecido einicialmente an Lisboua. Passado ua itineráncia atribulada antre Lisboua i Coimbra durante ls seclos XIII i XIV, l'ounibersidade benerie a stablecer-se stabelmente an Coimbra an 1537, tenendo l Rei D. João III cedido l própio paço rial pa las anstalaçones. Estas anstalaçones fúrun adquiridas pula Ounibersidade ne l reinado de Filipe I, sendo zde anton coincidas por Paço de las Scuolas. Ne ls dies corrientes, la Ounibersidade de Coimbra ten aprossimadamente 21 000 alunos, cuntando cun alguns de ls mais seletibos i eisigentes porgramas académicos de l paíç, un eilebado númaro d'ounidades d'ambestigaçon acraditadas, i tenendo cerca de 10% d'alunos strangeiros de 70 nacionalidades defrentes, sendo assi la mais anternacional de las ounibersidades pertuesas.

Neste momiento to la Alta Ounibersitária i Rue de la Sofia (adonde la Ounibersidade naciu) stan an porcesso de modernizaçon ne l ámbito de la candidatura de la Ounibersidade de Coimbra a Património Mundial de la Houmanidade de la UNESCO. To la Alta bai sofrer ua anterbençon que la bai tornar mais aprazible, mais guapa i mais dinámica. Ye tamien ende que bai nacer l Tribunal Ounibersitário Ouropeu, nua eniciatiba inédita na Ouropa.

Ye tamien an Coimbra qu'eisiste la mais antiga i maior associaçon de studantes de l paíç – la Associaçon Académica de Coimbra fundada la 3 de nobembre de 1887. Esta ourganizaçon repersenta todos ls alunos de la UC.

Para para alhá de la bien coincida Ounibersidade de Coimbra culas sues 8 faculdades, eisisten muitas outras scuolas i anstitutos d'ansino superior públicos (cumo l Anstituto Politécnico de Coimbra i la Scuola Superior de Anfermaige de Coimbra) i pribados (Scuola Ounibersitária Basco de la Gama, Anstituto Superior Miguel Torga, Anstituto Superior Bissaya Barreto (ISBB), Scuola Ounibersitária de las Artes de Coimbra), l que faç cun que la cidade tenga un total de cerca de 35 000 studantes de l'ansino superior.

Para seguir studos superiores, Coimbra fui durante seclos, scolhida por un ancho númaro de moços de todos ls cantos de Pertual por ser la única ounibersidade Pertuesa. Inda hoije, anque de l'eisisténcia dua basta rede d'ansino superior an Pertual, la cidade goza d'algun desse statuto heirdado de l passado, a que nun ye alheia la dibersificada ouferta ne ls bários campos d'eiducaçon, mas tamien la reconhecida culidade i prestígio de la maiorie de ls cursos de la stórica i amblemática Ounibersidade de Coimbra, assi bien cumo l sou famoso ambiente studantil i la basta tradiçon académica que le stá associada.

La cidade ten tamien un basto númaro de scuolas públicas i pribadas d'ansino básico i secundairo, sendo alguas, de las melhores ne l ranking nacional – Scuola Secundária Anfanta Dona Marie (a melhor de l paíç an ansino público), Scuola Secundária de Abelar Vrotero (pública), Coleijo de San Teotónio (ansino pribado), Coleijo Reina Santa Isabel (ua de las melhores la nible nacional ne l'ansino pribado), Scuola Secundária José Falcon (pública), Scuola Secundária de Don Duarte (pública), Scuola Secundária de Don Dinis (pública) i la Scuola Secundária de la Quinta de las Flores (pública).

Clima

Coimbra apersenta un clima mediterránico d'acuordo cula classeficaçon climática de Köppen-Geiger. Ne l Ambierno las temperaturas barian antre 15°C diurnos i 5º noturnos ne l més mais friu, podendo beirar ls 0º an bagas de friu, al passo que ne l Berano las temperaturas oscilan antre ls 29°C diurnos i 16º noturnos podendo chegar als 40°C i até mesmo ultrapassar. Las maior i menor temperaturas registadas an Coimbra ne l periodo 1971-2000 fúrun 41,6°C i -4,9°C. Mas,hai registos de -7.8°C an 1941 i 42,5°C an 1943. fuonte: Anstituto de Meteorologie Modelo:Clima Coimbra

Cultura i lazer

L grande spácio museológico de Coimbra por eiceléncia ye l Museu Nacional de Machado de Castro junto a la Sé Nuoba, anstalado ne l'antigo Paço Eipiscopal de la cidade. Cunsidrado un de ls mais amportantes museus de l paíç, ten coleçones amportantes de pintura, scultura, ouribesarie, cerámica i téxteis.

A ounibersidade ten tamien coleçones museológicas de ralo balor, çtacando-se las coleçones de strumientos científicos de ls seclos XVIII i XIX de l Museu de Física, i las coleçones de Antropologie, Zologie, Botánica i Mineralogie de l Museu de Stória Natural. Recentemente, estas coleçones fúrun agrupadas ne l Museu de la Ciéncia de la Ounibersidade de Coimbra, que ye assi un de ls núcleos museológicos de ciéncia mais amportantes la nible ouropeu.

Coimbra ye tamien ua cidade d'arte, eisisten 31 galeries d'arte spalhadas por to la cidade, que recebírun mais de 200 000 bejitantes an 2003, segundo dados de l INE.

Música

Mosteiro de Santa Clara la Bielha, Coimbra.

Anquanto ua de las purmeiras capitales de Pertual i sede de la mais antiga ounibersidade Pertuesa, Coimbra ten sido al longo de ls seclos un amportante centro musical. Storicamente, la Sé Nuoba, l Mosteiro de Santa Cruç (fundado por D. Fonso Heinriques) i la Ounibersidade (cun aula de música zde 1323) custituíran ls percipales centros de porduçon i prática musical. D. Pedro de Cristo i Carlos Seixas son refréncias cimeiras na música pertuesa, la que se juntan ls nomes de D. Pedro da Esperança, D. Francisco de Santa Maria, D. Heliodoro de Paiva, Fernão Gomes Correia, Vasco Pires, Mateus de Aranda, Pedro Thalésio ó José Maurício.

L fado de Coimbra stá antimamente ligado a las tradiçones académicas i carateriza-se por ua guitarra cun ua strutura, cunfiguraçon i afinaçon própia. Nomes cumo Adriano Correia de Oliveira i Zeca Afonso, cantores i poetas de la resisténcia a la ditadura, rebolucionórun la música tradecional pertuesa. Ye inda ligado al Fado de Coimbra que tenemos la mais amblemática casa de Fados; L Centro Cultural àCapella. Nua antiga capielha de l Séc. XIV, reúnen-se todas las nuites ls melhores musiqueiros de l'atualidade fadística! Nuno Correia de la Silba, Ricardo Dias, Nuno Botelho, Bruno Costa i outros dan-mos l que l fado ten de melhor!

Na música ligeira cuntemporánea, particularmente an géneros cumo l rockabilly i l blues, surge bários nomes associados a Coimbra. Desses son eisemplos JP Simões, Legendary Tiger Man (Paulo Furtado, bocalista de ls WrayGunn), ls WrayGunn i ls Bunnyranch.

Atualmente, la cidade çpone de bários centros de formaçon an música, als mais dibersos nibles, çtacando-se l Cunserbatório de Música de Coimbra, la Scuola Diocesana de Música Sacra i la Licenciatura an Studos Artísticos de la Faculdade de Letras de la Ounibersidade de Coimbra.

Coimbra ye inda cunsidrada ua "cidade de coros", debido al eilebado númaro deste tipo de formaçon na cidade. Çtacan-se, antre ls coros académicos, l Orfeon Académico de Coimbra, l Coro Misto de la Ounibersidade de Coimbra i l Coro de la Capielha de la Ounibersidade de Coimbra. Outros agrupamientos atibos son l Coro de ls Antigos Orfeonistas de la Ounibersidade de Coimbra, l Coro D. Pedro de Cristo, l Choral Poliphonico de Coimbra i l Coro Aemeniun.

La nible de l reportório i/ó de la formaçon, hai inda grupos mais specializados cumo la Capielha Griegoriana Psalteriun, l Coro Box Etherea, l Grupo Bocal Ad Libitun ó l Coro de ls Pequeinhos Cantores de Coimbra.

L Orfeon Académico de Coimbra(OAC) ye un de ls mais eilustres repersentantes de la cidade, de la Ounibersidade i de la Academie. Ne ls sous 130 anhos de stória, ten mantido ua persença reconhecida ne l panorama de la cidade i de l paíç. Ye l coro mais antigo de Pertual, an atebidade i un de ls mais antigos de la Ouropa.

Por este ourganismo, mais antigo que la própia Associaçon Académica de Coimbra, passórun einúmaros nomes de relebo de la bida cultural, política i social de l paíç. Ícones de la Cançon de Coimbra cumo Luiz Goes, José Afonso, Fernando Machado Soares, Sutil Roque i Fernando Rolim, citando solo alguns, fazirun parte de l OAC.

Até 1974 era un coro sclusibamente masculino, tenendo nesse anho ampeçado a admitir eilemientos femeninos de modo a melhor se adatar a la rialidade studantil.

L OAC ye coincido pulas einúmaras digressones que fizo puls 4 cuntinentes. Para para alhá desso, yá repersentou Pertual al mais alto nible ne l Festibal Ouropália 91, na Spo'98, na UNESCO, i fui l purmeiro coro pertués a cantar na Basílica de S. Pedro.

Hoije cuntina la sue atebidade cun cerca de 50 coralistas, studantes de Coimbra, i cuntina a liebar la música coral, la cançon de Coimbra (Fado de Coimbra), i la música popular a to l paíç i al strangeiro.

Por outro lado, l papel de a mulhier na música de la Ounibersidade de Coimbra fui reconhecido an 1956 pul Coro Misto de la Ounibersidade de Coimbra (CMUC), l coro misto, an atebidade, mais antigo de la Academie.

De fato, nun se permitie até ende a las mulhieres la participaçon an grupos musicales, tenendo l Coro Misto de la Ounibersidade de Coimbra sido pioneiro.

Al longo de ls sous 50 anhos de stória, l CMUC serbiu d'eisemplo als outros coros ounibersitairos, ls quales acabórun por se render al peso de a mulhier na Ounibersidade i se tornar mistos.

Hoije, l Coro Misto de la Ounibersidade de Coimbra ye cumpuosto por cerca de 70 eilemientos i çtingue-se de ls restantes coros de la cidade pula dibulgaçon de la música de Coimbra, ampenhando-se na promoçon de cumpositores de la cidade de Coimbra, para alhá de l típico repertório de música popular i erudita, nacional i strangeira.

De çtacar l recén eiditado CD "Miserere", que reúne l'obra de Francisco Lopes de Macedo i de José Maurício, la purmeira de las quales nun fui cantada zde l seclo XIX.

Outro ícone ancontornable de la cena musical, cultural i académica conimbricense ye la Orxestra Pitagórica. Nun solo pula sue antiguidade, mas, subretodo, por repersentáren aqueilho que de mais genuíno debe haber nun studante de Coimbra: sprito crítico, eirreberéncia i mui buona çposiçon, este ye un grupo que marca, de forma andelébel, la passaige de ls studantes por Coimbra. Datan de l final de l seclo passado las purmeiras atuaçones de la Orxestra Pitagórica. An 1981, pouco depuis de la fundaçon de la Seçon de Fado de la Associaçon Académica de Coimbra, ressurge cul oubjetibo primordial de prencher un lacuna mui grabe an tenermos académicos, ó seia, l de nun haber naide capaç de dezir cousas series a rir, l qu'eiquibale a dezir que l'eirreberéncia académica yá nun se manifestaba genuinamente, esto ye, que l'estudante habie squecido l que de mais sério hai: l'alegrie i l sprito académico.

Assi, pa l Sarau de la Queima de las Fitas de 1981, reorganizou-se la Orxestra Pitagórica, retomando l'agrupamiento qu'habie, an tiempos, eisistido ne l teta de l'academie. Dotada de strumientos sérios cumo biuolas, acordeon, cabaquinhos i bandolines, etc… i de strumientos seríssemos cumo sanitas, senhales de trasito, outoclismos, cántaros, chapéu de chuba de cascables, etc. …, la Orxestra Pitagórica lançou al público l sou repertório cénico i musical de cariç bincadamente "gargalhorico" i popular, dando l toque studantil l'alguas pitorescas músicas que popularmente son entoadas por esse Pertual para alhá. De ls sous radadeiros 25 anhos de bida, sin anterrupçones, la Orxestra Pitagórica yá calcorreou to este Pertual de norte la sul, ilhas, i bários porgramas de telebison. Alhá por fura, Spanha, Fráncia, Eitália, Cuba i República Domenicana, fúrun ls países bejitados. Por dues bezes benceu l zaparecido festibal Grito Académico Super Vock, que solo tubo trés eidiçones. Yá eiditou un trabalho fonográfico chamado "A2+B2=C2" quando comemorou l sou purmeiro centenairo. Ten un DVD al bibo que, anquanto nun ye eiditado, puode ser bisto ne l Youtube .com.

Triato

Triato Académico Gil Bicente
Triato de ls Studantes de la Ounibersidade de Coimbra (TEUC)
Círclo de Ampeçaçon Teatral de la Academie de Coimbra (CITAC)
Cena Lusófona
La Scuola de la Nuite
L Teatron
Ancerrado para Obras
Bonifrates
Camaleon
Marionet
Teatrar - Arzila
Loucomotiba - Grupo Triato Tabeiro
Grupo Triato de l CPT de Sobral de Ceira - Ceira

Habitantes famosos

D. Fonso Heinriques, purmeiro rei pertués (1139), fundador de l Reino de Pertual. Stá sepultado na Eigreija de Santa Cruç, an Coimbra. L local de nacimiento cuntina ua ancógnita (Guimarães, Biseu ó Coimbra).
D. Sancho I, segundo rei pertués (1185), filho de D. Fonso Heinriques. Naciu i stá sepultado na Eigreija de Santa Cruç, an Coimbra.
D. Fonso II, terceiro rei pertués (1211), naciu i morriu an Coimbra.
D. Sancho II, quarto rei de Pertual, naciu an Coimbra la 8 de setembre de 1209,
D. Fonso III, quinto rei pertués, naciu an Coimbra la 5 de maio de 1210, sendo armano mais nuobo de Sancho II..
Santo António de Lisboua, santo católico (Lisboua, 15 d'agosto de 1195 — Pádua, 13 de júnio de 1231).
Reina Santa Isabel, reina de Pertual i santa católica (Saragoça, 1271 — Stremoç, 4 de júlio de 1336).
D. Pedro I, rei de Pertual (1357) i D. Inés de Castro, coronada reina postumamente, protagonistas de la mais romántica tragédia pertuesa na Quinta de las Lágrimas, an Coimbra. Ancontran-se sepultados frente la frente ne l Mosteiro de Alcobaça.
Joaquim António de Aguiar, purmeiro-menistro.
[[Pedro Nunes (matemático)|Pedro Nunes] ], famoso matemático de l seclo XVI.
Cristóvão Clávio, matemático de l seclo XVI.
José de Anchieta, houmanista i gramático de l seclo XVI.
Carlos Seixas, proeminente cumpositor de l seclo XVIII.
D. Pedro de Cristo, cumpositor de l seclo XVI.
Machado de Castro, scultor de l seclo XVIII.
Miguel Torga (1907 - 1995), médico, scritor i poeta.
Carlos Paredes (1925 - 2004), músico pertués.
Zeca Afonso (1929-1987), cantor.
Irmã Lúcia (1907 - 2005), freira carmelita i pastora de Fátima.
António Almeida Santos, Persidente de la Assemblé de la República Pertuesa.
Vital Moreira, cabeça de lista de l PS a las eileiçones ouropeias de 2009.
Sérgio Conceição, futebolista.
Luís de Matos, mágico.
André Sardet, cantor.
Carlos Damas, biolenista.
Bruno Santos, studante, misson honrosa.
Pedro Tochas, comediante i ator.
Bruno Aleixo (1957 -), apersentador de telebison.
José Eduardo Rosa Vale e Castro, futebolista.
Diana Pereira, modelo
Pedro Passos Coelho, atual Purmeiro-Menistro.
Miguel Carepa, studante, pŕeimio nobea.
Antero de Quental (1842 - 1891), poeta i filósofo. «Assi este home, an cuja alma iban enegrecendo las nubres dua áspara tormenta anteletual, era inda para todos, nesses tiempos de Coimbra, «de l'ancantada i fantástica Coimbra» d'anton, un biçoso camarada, cheno de suberáncia i fantasia, apaixonado i luminoso, nobre i amigo de ls homes, ambebendo ls uolhos francos na beleza de las cousas, i tumultuosamente sperando que de la reboluçon i de la filosofie altos benes benissen a la Tierra.» (Eça de Queirós, Un Génio Que Era Un Santo, In Memorian, 1896)

Spácios d'antresse

Coimbra ye ua cidade romántica, tenendo coincido ne ls amores proibidos de l rei Don Pedro i Dona Inés un de ls sous eipisódios mais marcantes.

Fiestas Académicas

Para para alhá de las fiestas de la cidade ó de la Reina Santa, na purmeira sumana de Júlio (centradas an torno de l feriado municipal a 4 de Júlio, fiesta de la Reina Santa Isabel), ‎Coimbra ye tamien coincida pulas fiestas i tradiçones académicas.

La purmeira de las dues fiestas ye la Latada ó la Fiesta de las Latas i amposiçon de las ansígnias, qu'acuntece ne l'ampeço de l'anho scolar, para dar las buonas benidas als nuobos studantes (calouros ó nobatos). Las Latadas ampeçórun ne l seclo XIX quando ls studantes sprimian ruidosamente la sue alegrie pul termo de l'anho letibo an Maio. Outelizában para esso todos ls oubjetos que porduzissen bruído, nomeadamente latas. Fui a partir de ls anhos 1950/60 que las Latadas passórun a ocorrer, nun ne l termo de l'anho letibo, mas si ne l'ampeço, coincidindo cula abiertura de la Ounibersidade i la chegada de la populaçon scolar de bacanças, l que daba a la cidade un clima eiminentemente académico. Atualmente ls calouros, ancorporados ne l corteijo, besten ua fantasia pessonal culas quelores de la sue faculdade ó la batina birada de l'abesso, trasportando cartazes cun legendas de cuntenido crítico, alusibos a la bida scolar ó nacional. Ls calouros seguen an dues filas paralelas, culs padrinos que dében tener un cumportamiento dino dun studante de Coimbra, dando l'eisemplo als nobatos que se stan l'ampeçar na Praxe Académica. Ne l fin de l corteijo nas rues de la cidade, ls nuobos studantes son batizados ne l riu Mondego: "Ego te baptizo in nomine solemnissima praxis".

La segunda fiesta ye la Queima de las Fitas, bastante mais amportante que la purmeira, sendo la maior fiesta studantil de la Ouropa,^{[sin fuontes?]} ten lugar ne l fin de l segundo semestre, mais cuncretamente ne l'ampeço de l més de Maio, ampeçando na nuite de quinta-feira para sesta-feira cula Serenata Monumental nas scaleiras de la Sé Bielha. Ye la maior fiesta studantil de to la Ouropa i ten la duraçon de 8 dies, un die para cada faculdade de l'ounibersidade (Letras, Dreito, Medecina, Ciéncias i Tecnologies, Framácia, Eiquenomie, Psicologie i Ciéncias de la Eiducaçon i Eiducaçon Física i Ciéncias de l Çporto) i Antigos Alunos. Anque eisistiren mais fiestas de l género an outras cidades, l'aparecimiento de la Queima de las Fitas ampeçou an 1899 an Coimbra, fazendo assi cun que seia única ne l paíç. Eilha ye la spluson delirante de la Academie, cunsistindo pa ls Quartanistas Fitados i Beteranos, na solenizaçon de la radadeira jornada ounibersitária ó seia, l derradeiro trajeto de bibéncia coimbrana. Ls festeijos de la Queima de las Fitas cunsisten subretodo ne l sou porgrama tradecional, cumpuosto por: Serenata Monumental, Sarau de Gala, Beile de Gala de las Faculdades, Garraiada (Figueira de la Foç), Benda de la Pasta (receitas pa la Casa de Anfáncia Dr. Elísio de Moura), "Queima" de l Grelo (que dou l nome a la fiesta) i Corteijo de ls Quartanistas, Xá Beilçante i las inda chamadas Nuites de l Parque.

Monumientos

Trasportes

Aéreo

La cidade inda nun ten aeroporto, çpondo simplesmente dun aeródromo municipal qu'assegura alguas ligaçones de ámbito regional (Aeródromo Bissaya Barreto) i ligaçon marítima, grácias a la prossimidade cul porto de la Figueira de la Foç, que ye l porto que sirbe la cidade de Coimbra.

La nible d'aeroportos anternacionales, aquel que se ancontra mais próssimo ye l Aeroporto de l Porto, Francisco Sá Carneiro ó, de Piedras Rubras, a cerca de 130 Km. L Aeroporto de Lisboua ancontra-se a 190 Km. Ambora tanto un cumo outro se ancontren la mais dua ciento de quilómetros, las anfra-struturas rodo i ferrobiárias eisistentes permiten ligar Coimbra la cada un de ls aeroportos an pouco mais de 1 hora i meia.

Inda assi eisiste, mas inda a longo prazo, l porjeto de trasformar la Base Aérea de Monte Rial, ne l cunceilho de Leirie, nun aeroporto anternacional cebil, cun bista a serbir la region Centro de l paíç l que, a ser feito, colocarie Coimbra a cerca de solo 70 Km dun aeroporto anternacional.

Rodobias

Ne l centro de la spina dorsal de l paíç, Coimbra ten ua localizaçon stratégica cun ligaçon rodobiária a la outo-estrada A1 que la liga al norte i al sul de l paíç i tamien a la A14 que la liga a la bezina cidade de la Figueira de la Foç. La cidade tamien ye serbida pul IP3 i pul IC2 i, feturamente pul IC3. Eesiste tamien ua circular anterna i ua circular sterna qu'ambolben la cidade.

Caminos de fierro

Ten ligaçon ferrobiária al norte i al sul atrabeç de l camboio rápido Alfa Pendular qu'efetua paraige na Staçon de Coimbra-B i als cunceilhos de Lhousana i Miranda de l Corbo atrabeç de l Ramal de la Lhousana, qu'atrabessa la zona sul de la cidade, ligando l centro de Coimbra a esses dous cunceilhos de la sue ária d'anfluéncia i, brebemente terá ligaçon an TGV i metro superfice.

Rede anterna

Ne l'anterior de la cidade eisiste ua grande rede de trasportes públicos coletibos, ls SMTUC, que yá cumpletórun 100 anhos d'eisisténcia, ouperando carreiras, tróleis, i (até 1980) eilétricos. L Eilebador de l Mercado ye tamien un eiquipamiento de trasporte público.

Eiquenomie i andústria

La Baixa de la cidade, junto al riu Mondego.

Segundo dados de 2005, l çtrito ten 5.441 ampresas cun ua faturaçon anual de 2.318 M EUR mas solo 83 stan antre las mil maiores ampresas de l paíç.

De qualquiera forma l sou tecido ampresarial ten benido a recuperar cumpetitebidade ne ls radadeiros anhos i eisisten perspetibas de criaçon de nuobas árias de localizaçon ampresarial na ária de l munecípio de Coimbra. La cidade ten ua eimergente andústria d'alta tecnologie aplicada a la salude i serbícios specializados na ária de la salude, mas tamien muitas ampresas de tecnologies d'anformaçon de punta, ligadas a la cultura, mas tamien an árias cumo la defesa, areoespacial, financeira, andustria, telecomunicaçones etc. Alguas destas ampresas tecnológicas, son sobeijamente coincidas la nible anternacional, cumo la Critical Software que colabora cula NASA i la ESA i mais recentemente cula China. Mas eisisten, muitas outras cumo la WIT ó la Cnotinfor. Ancontra-se an Coimbra a melhor ancubadora d'ampresas de l mundo, premiada anternacionalmente. Eesisten an Coimbra trés spitales centrales de dimenson regional: H.U.C. - Spitales de la Ounibersidade de Coimbra, C.H.C. - Centro Spitalar de Coimbra (qu'antegra trés stablecimientos spitalares: l Spital Giral, tamien coincido por Spital de ls Cobones, l Spital Pediátrico i la Maternidade de Bissaya Barreto) i I. P.L. Anstituto Pertués de Oncologie.

Atualmente, las zonas andustriales de la cidade son l Parque Andustrial de Tabeiro, Parque Andustrial de Eiras, l Pólo de la Pedrulha i Eiras i, brebemente, L Iparque.

Cun un poder de cumpra per capita de 139,5 (2009) l cunceilho de Coimbra ancontra-se an 3º lugar ne l ranking amportança eiquenómica atrás de las árias ourbanas de Lisboua i Porto.

An Coimbra eisisten centros comerciales de grande dimensones, de que son eisemplo l Coimbrashopping, l Dolce Vita Coimbra, l Fórum Coimbra i l Atrium Solum, stando porjetado mais un, mas inda nun fui cuncretizado.

Ambestigaçon i tecnologie

La cidade debe mui al caráter anter-deciplinar de la Ounibersidade de Coimbra, que la mantén na ribalta de l'ambestigaçon científica. A ounibersidade, percipalmente atrabeç de l [[Anstituto Pedro Nuns] ] i respetiba ancubadora d'ampresas i tamien de l Centro de Neurociências e Biologia Celular (CNC), ten daprendido a coperar cul tecido ampresarial an bários domínios i afetabado la trasferéncia de cumpeténcias pa las ampresas. Antre las ampresas geradas an resultado de l'ambestigaçon científica liebada a cabo na Ounibersidade ("spin-ouff" ounibersitairo) cuntan-se las ampresas Critical Software (zambolbimiento de software), WIT Software(software para aplicaçones mobles), ISA (telemetrie i anstrumentaçon) i Crioestaminal (criopreserbaçon i biomedicina). L'inobaçon tecnológica na ária de la salude ye un de ls eisemplos desse nuobo modelo de zambolbimiento an que la cidade ten apostado i l feturo Coimbra Inobaçon Parque (Coimbra iParque Arquibado an 2010-11-12 ne l Wayback Machine.), prebisto pa la freguesie de Antanhol, ye ua de las struturas que se supone benir a cuncentrar mais ampresas nesta ária.