Petrovsk (Saratovan agj)

Petrovsk
Петровск
	Lidnanznam;
Valdkund	Venäma
Eläjiden lugu (2021)	27,987 ristitud
Pind	27,32 km²
Pämez'	Jelena Besšapošnikova; (sulaku 2022—)
Telefonkod	+7−84 555-xx-xxx
Avtokod	64, 164
Aigvö	UTC+4 (MSK+1)

Sil sanal voib olda toižid znamoičendoid; miše nähta niid, tulgat tänna.

Petrovsk (ven.: Петро́вск) om Venäman lidn da lidnankund Saratovan agjan pohjoižes. Se om Petrovskan rajonan administrativine keskuz (vspäi 1928).

Istorii

Eländpunktan aluz om pandud kuti lidnuz Petr I-carin käskön mödhe vl 1698 kaičemha tahondad razbainikoiden londoišpäi. Se sai makundan lidnan statusad vl 1780, nimitihe nügüdläižikš carin nimen mödhe i lidnusen phh. Pedroin da Pauloin päjumalanpertin mödhe. Petrovsk oli torgovanoiden lidnaks edel Oktäbrin revolücijad.

Petrovsk šingotase elektromehanižel «Molot»-tegimel (ladimed laivoiden täht — rulid, navigacii, avtomatik; trenažorad merilaivišton täht), sömtegimištol (seniden tegim), mugažo kombisötken tegim radab lidnas. Gazanveimen kompressorstancii om läz lidnad.

Geografijan andmused

Lidn sijadase rajonan pohjoižes, Volgaveren ülüdel, Medvedic-jogen üläjoksmusen muugotil randoil (Donan hura ližajogi), 180 m ü.m.t. keskmäižel korktusel. Matkad Penzan agjhasai om 12 km pohjoižhe orhal, Saratovhasai om 89 km suvhe-suvipäivnouzmha orhal, 104 km avtotel vai 120 km raudtel. Lähembaine lidn om Atkarsk 54 km suvhe-suvipäivlaskmha orhal, 88 km avtotedme vai 60 km raudtedme. «Saratov — Penz»-avtotekeskust ümbärdab lidnad päivlaskmaspäi ühtes kilometras. Raudtestancijan nimituz om Petrovsk-Saratovskii.

Petrovsk om lidnankundan (municipaližen ühtnikan) üks'jäine eländpunkt. Lidnankundan pind — 27,32 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 31 160 ristitud, rajonan seičeme kümnendest. Kaikiš suremb lidnan ristitišt oli 33..35 tuhad eläjid vll 1979−2005 (35 tuh. rist. vl 1996).

Rahvahad (2010): venälaižed — 94,0%, totarlaižed — 1,6%, mordvinalaižed — 1,4%, toižed rahvahad — 3,0%.

Ortodoksižen hristanuskondan nell' jumalanpertid^[1] oma olmas lidnas: Pühän Jumalanmaman Katken päjumalanpert' (om saudud 1880, udessündutadud 1990-nziš vozišpäi), kaks' jumalanpertid i časoun'. Islaman pämečet' om saudud vll 2014−2020.

Saratovan valdkundaližen tehnižen universitetan filial^[2] om lidnan professionaližen opendusen aluzkundaks.

Lidnan edeline pämez' om Andrei Morozov (reduku 2016 — eloku 2021).

Galerei

Rajonan sobes vl 2017 (istorine Tihonov-torgovanan pert')
Pühän Jumalanmaman Katken päjumalanpert', vn 2022 nägu
Lämoipalonvastaine palakund (2018)
Läžundkodin hirurgine korpus (2018)
Petrovsk-päraudtestancii vl 2017

Homaičendad

Irdkosketused

Petrovsk (Saratovan agj) Vikiaitas

	Saratovan agjan lidnad
	Arkadak \| Atkarsk \| Balakovo \| Balašov \| Engel's \| Hvalinsk \| Jeršov \| Kalininsk \| Krasnii Kut \| Krasnoarmeisk \| Marks \| Novouzensk \| Petrovsk \| Pugačov \| Rtiščevo \| Saratov \| Šihani \| Vol'sk

[1] Petrovskan pühäpertid sobory.ru-saital. (ven.)

[2] Saratovan valdkundaližen tehnižen universitetan filial Petrovsk-lidnas — sait (fsstu.ru). (ven.)

[1]

[2]