前列腺

前列腺

前列腺（英文：prostate）舊時又叫攝護腺，係男人同一啲公嘅哺乳動物嘅生殖腺，負責製造濃厚嘅精液混合精子再射出體外，屬男性生殖系統嘅一部份。

解剖

前列腺係一個圓錐形腺體，形狀同大細都好似一粒合桃仁，位於骨盤裏面膀胱下面、前後左右四面包圍住尿道，被佢喺中間穿過。男仔嘅前列腺未發育，要到青春期佢先慢慢增大，到老人時開始退化。

由於前列腺後面同直腸相鄰，所以做直腸檢查嘅時候就可以摸到前列腺。

功用

前列腺係男性生殖系統嘅外分泌腺，會分泌一啲略帶鹼性嘅液體，結合由射精管運到嚟嘅精子混合成精液；呢啲液會中和殘留喺尿道啲酸性尿，有利精子生存。前列腺又會分泌前列腺特異抗原，促進精子活動。

疾病

最常見嘅前列腺病係前列腺肥大，係由於前列腺不斷增生所致；雖然增生係良性，但係肥大會壓住男人條尿道，令到屙尿有困難。

其他病仲有前列腺炎，有分急性同慢性，同埋前列腺癌。

其他動物

除咗男人之外，只係得公嘅哺乳類動物先有機會有前列腺，例如貓同狗。