象
呢篇文講動物。想搵第二個意思嘅話，請睇象 (搞清楚)。 「大笨象」跳轉到呢度。想搵其他用法，請睇「大笨象 (搞清楚)」。 | ||||||||||||||||
|---|---|---|---|---|---|---|---|---|---|---|---|---|---|---|---|---|
 非洲象
| ||||||||||||||||
| 物種分類 | ||||||||||||||||
| ||||||||||||||||
象係目前世界上最大型嘅陸上哺乳動物，屬於長鼻目（Proboscidea）象科（Elephantidae），現存兩屬三種，包括非洲象屬同亞洲象屬，另外重有絕咗種嘅古菱齒象屬。非洲象有兩種：普通非洲象（又叫熱帶草原象或者灌木象）同非洲森林象，亞洲象可細分成 4 種：印度象、錫蘭象、蘇門答臘象、馬來西亞象。兩者廣泛分布喺非洲撒哈拉沙漠以南、南亞、東南亞甚至中國南部邊境嘅熱帶同埋亞熱帶地區。象因為咁大隻，所以叫大象，加上睇來笨重，又俾人叫做大笨象。
象嘅懷孕期係 20 - 24 個月，係眾哺乳動物之首。啱啱出世嘅象 BB 就有 100 千克重，要到 8 - 14 歲先至性成熟。據報導1974年喺安哥拉獵殺咗最大嘅象有 13.5 噸重。
象皮厚，冇乜毛，鼻同上唇黐埋，變成一條好似鞭一樣、圓筒狀長鼻，上頜有兩隻又長又大嘅門牙，就係所謂嘅「象牙」，口裏面一般每邊有三隻前磨牙同三隻後磨牙，攞嚟食高纖維嘅嘢食，樹葉、草等等，磨牙唔係一次過生晒出嚟，而家嘅磨牙磨爛之後，新嘅磨牙就生出嚟，所以如果最後一隻（第六隻）磨牙大約喺 60 歲磨左右爛之後，老象可能會因為營養不良而死，如果餵佢食磨爛咗嘅食物，可能可以繼續生存倒。
品種
[編輯]亞洲象又叫印度象，分佈喺南亞同東南亞，鼻尖有一個手指狀嘅突起，雌象冇象牙，即使係雄象亦有一半冇象牙或者象牙好細，耳仔比較細、圓，前腳有 5 隻腳趾，後腳有 4 隻腳趾，共有 19 對肋骨（其中蘇門答臘亞種有 20 對，但比非洲象少一對），頭骨有兩個突起，背脊拱起。性情温和，比較容易馴服。過往可再分 4 個亞種：印度象、錫蘭象、馬來西亞象、蘇門答臘象。
非洲象有兩種，最常見嘅係普通非洲象，係現存世界上最大嘅陸地動物，耳仔大；下面嘅部份尖，不論公乸都有長而彎嘅象牙，前腳有 4 隻腳趾，後腳有 3 隻腳趾（腳趾數目比亞洲象少一隻），共有 21 對肋骨，背脊平，身長 6 - 7.3 米，身高 3-4 米，重達 10 噸。性較兇猛，尤其係孤獨嘅雄象更為兇猛，唔易馴服。
另一種非洲象係瀕臨絕種嘅森林象，體型細，一般唔超過 2.5 米高，耳仔圓，下頜骨長而窄，前腳有 5 隻腳趾，後腳有 4 隻腳趾，同亞洲象一樣，象牙細而直，質地好硬。根據最近嘅基因分析證實佢同普通非洲象唔係同一種。
此外重有幾個亞種，馬來西亞有一種亞洲象亞種——婆羅洲侏儒象，體型更細。納米比亞有一種非洲象亞種——沙漠象，腳板底嘅肉墊較大，更適應缺水嘅生活，非常知道節約用水，而且識響沙漠搵水源。
響古時重有體形更大嘅長毛象——長毛象，家下已經絕種，不過響北方西伯利亞嘅凍土地帶，有猛獁象嘅屍體出土。
習性
[編輯]象由於少毛，容易生皮膚病，所以要成日沖涼或沖泥槳浴，象皮厚，有皺紋，有啲皺紋路成十幾厘米深，皮膚淺灰色，由於洗泥浴有時看落似泥土嘅紅啡色，啡色嘅眼，有長嘅眼媚毛，有一種罕見嘅白化象，白象眼一般係藍色。
象嘅耳仔好大，有豐富嘅血管以便散熱，條尾唔長，頂端有毛刷。
象係食草動物，一日要用16個鐘嚟揾食，佢哋嘅消化系統效率唔高，只有4成食物可以被吸收，一隻成年象一日雖然可以吃到30到60千克食物，但當中有6成會痾返出去。
象在正常時每日要行3到6千米去揾食，但奔跑速度可以去到時速36千米。
用途
[編輯]亞洲象響南亞國家經常被馴服用來役使，響交通唔方便嘅森林地帶搬運木材等。非洲象其實都可以馴養，只係無亞洲象咁「機智靈敏」。
古代亦訓練作為戰象，馬其頓嘅亞歷山大大帝攻打印度就係俾佢哋從未見過嘅戰象擊敗。後來迦太基嘅漢尼拔將軍越過阿爾卑斯山攻打羅馬時亦用戰象。漢尼拔將軍所用嘅象可能係家下已經滅絕嘅北非種象。
象牙
[編輯]由於象牙可以製造珍貴嘅工藝品，象經常遭到偷獵者嘅襲擊，作為大型動物，佢哋嘅生育周期較長，因此非常容易滅絕。目前各國為保護象已經禁止象牙交易。中國法律亦已經規定禁止象牙交易同繼續生產象牙製品。
象同歷史文化
[編輯]
象喺古代中國多數係南方鄰國進貢嘅禮品，皇家多馴養象嚟喺典禮時顯示威儀。
喺泰國，大象係國家象徵。泰國好多府嘅府徵都有象嘅圖案。相傳白象古時泰北嘅蘭納泰王朝帶嚟好運，自此成為泰國嘅國寶。泰國皇室勳章最高級嘅係皇家白象勳章。因為2006年從2月到7月大象數目增長三倍，而泰國用象來做的士。
喺香港，雖然重未發現過大象化石，但學者估計響幾千年前，后海灣沼澤森林同吐露港一帶附近曾經出現過大象[1]。
以前荔園動物園亦曾經養過象，但喺1989年2月染急性肺炎而俾人整死咗。屍體其後被運往將軍澳垃圾堆填區。而1975年時，據講泰國一個馬戲團曾來港表演，但反應唔理想，於是將9隻大象寄居荔園，重要籌錢將嗰班大象送返泰國。
參考
[編輯]- ↑ 香港歷史博物館，「自然生態環境」展館內螢光幕
