Buffalo Bill
Buffalo Bill | |
|---|---|
 | |
| Gebore | William Frederick Cody 26 Februarie 1846 Le Claire, Scott County, Iowa |
| Sterf | 10 Januarie 1917 |
| Nasionaliteit | Verenigde State van Amerika |
| Beroep | Verkenner, jagter, akteur |
| Bekend vir | Wild West Show |
| Eggenoot | Louisa Frederici |
| Kinders | 4 |
| Ouer(s) | Isaac Cody Mary Ann Bosnell Laycock Cody |
| Handtekening | |
 | |
Buffalo Bill (1846–1917) was 'n kleurvolle figuur uit die Amerikaanse Wilde Weste. Hy was ’n verkenner vir die Amerikaanse Weermag en ’n bisonjagter. Nadat hy die weermag verlaat het, het hy die “Wild West Show” begin waarin hy (saam met mense soos Annie Oakley en Sitting Bull) sy slag met skiet en perdry gewys het. Die doel was om mense ’n kykie in die lewens van mense in die weste van Amerika te gee. Buffalo Bill se regte naam was William Frederick Cody.[1]
Lewensloop
[wysig | wysig bron]William Frederick Cody is op 26 Februarie 1846 in die Iowa-gebied (nou die Amerikaanse staat van Iowa) in Le Claire gebore. Hy het vir 'n paar jaar in sy vader se tuisdorp in Kanada gewoon voordat sy familie na die Kansas-gebied getrek het.
Hy begin op die ouderdom van elf (ná sy pa se dood) te werk. Op 14 word hy 'n ruiter vir die Pony Express. Gedurende die Amerikaanse Burgeroorlog het hy van 1863 tot die einde van die oorlog in 1865 gedien. Later het hy as 'n burgerlike verkenner vir die Amerikaanse leër tydens die Indiane-oorlog gedien, waarvoor hy 'n eremedalje in 1872 ontvang het.
Buffalo Bill het later bekend geword vir sy Wilde Weste-vertonings met cowboy-temas wat hy georganiseer het. Die eerste vertoning is op 1 Mei 1883 aangebied en hy het selfs daarmee na Brittanje en Europa getoer.
Cody is op 10 Januarie 1917 aan nierversaking oorlede. Hy was omring deur familie en vriende by sy suster se huis in Denver. Die dag voor sy dood is hy deur vader Christopher Walsh in die Katolieke Kerk gedoop.[2][3][4] Hy is begrawe op die bergrand van die Rocky Mountains naby Golden, Colorado. Die plek word "Lookout Mountain" genoem en dit is vandag 'n park met 'n museum.
Eksterne skakel
[wysig | wysig bron]Verwysings
[wysig | wysig bron]- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ Russell, Don (1979). The Lives and Legends of Buffalo Bill. Oklahoma: University of Oklahoma Press. p. 469. ISBN 978-1-4343-4148-8.
- ↑ Weber, Francis J. (1979). America's Catholic heritage: some bicentennial reflections, 1776–1976. Madison, WI: University of Wisconsin – Madison. p. 49.
- ↑ Mosesl, L.G. (1999). The Lives and Legends of Buffalo Bill. New Mexico: UNM Press. p. 193. ISBN 978-0-8263-2089-6.
Eksterne skakels
[wysig | wysig bron]
Wikimedia Commons het meer media in die kategorie Buffalo Bill.
Normdata  |
|
|---|