Vlag van Sirië

As gevolg van die voortslepende Siriese Burgeroorlog was daar twee vlae wat gebruik is om Sirië te verteenwoordig, soos gebruik deur die vegtende faksies. Die vorige regering van die Siriese Arabiese Republiek wat deur die Ba’ath-party gelei is, het die rooi-wit-swart-driekleur gebruik van die oorspronklike Verenigde Arabiese Republiek, terwyl die Siriese opposisiefaksies soos die Siriese Nasionale Koalisie die groen-wit-swart-driekleur gebruik wat as die Onafhanklikheidsvlag bekend is en vir die eerste keer deur die Gevolgmagtigde Sirië gebruik is.

Vlag van die Siriese Arabiese Republiek

Vlag van die Siriese Arabiese Republiek
Gebruik	Nasionale vlag en vaandel
Verhouding	2:3
Goedgekeur	8 December 2024,

Vlag van die vorige Siriese regering

Die vorige vlag is aanvanklik in 1958 aanvaar om Sirië as deel van die Verenigde Arabiese Republiek te verteenwoordig. Dit is tot 1961 gebruik en in 1980 weer aanvaar tot Desember 2024 toe Basjar al-Assad se regering tot ’n val gekom het. Sedert die eerste aanvaarding is variasies van die rooi-wit-swart-vlag in verskeie Arabiese Unies van Sirië met Egipte, Libië, Soedan, Jemen en Irak gebruik. Hoewel Sirië nie deel van enige Arabiese staatsunie uitmaak nie, is die vlag van die Verenigde Arabiese Republiek weer aanvaar om Sirië se toewyding aan Arabiese eenheid te toon. Die gebruik van die vlag het ’n twispunt geword omdat diet dikwels met die Ba’ath-party verbind word en dit word gebruik om partye wat lojaal is aan Basjar al-Assad se regering in die Siriese Burgeroorlog.

Die Siriese vlag word in artikel 6 van die Siriese Grondwet omskryf. Die eerste paragraaf van die artikel lui soos volg:

Die vlag van die Siriese Arabiese Republiek bestaan uit drie kleure, rooi, wit en swart, met twee groen sterre met vyf punte elk. Die vlag is reghoekig met die hoogte twee derdes van die breedte. Dit is in drie reghoeke van identiese dimensies verdeel wat elk dieselfde breedte as die vlag is. Dit boonste is rooi, die middelste is wit en die onderste swart met twee groen sterre in die middel van die wit reghoek.

—1ste Paragraaf van Artikel 6 van die Siriese Grondwet

Die vlag is gebaseer op die Arabiese Bevrydingsvlag met vier kleure – swart, groen, wit en rooi – wat die vier groot dinastieë in die Arabiese geskiedenis voorstel: Abbasiede, Fatimiede, Omajjade en Hasjemiete.

Ontwerp

Kleure

Teenstanders van die regering demonstreer in Damaskus met die nasionale vlag (2011)

Die ou vlag van Sirië tydens ’n betoging in Montreal

Die rooi van die Siriese vlag verteenwoordig die Hasjemiete en die bloederige vryheidstryd, die wit verteenwoordig die Omajjade en ’n helder en vredevolle toekoms, die groen verteenwoordig die Fatimiede terwyl die stervorme Egipte en Sirië verteenwoordig, en die swart verteenwoordig die Abbasiede en onderdrukking.

Die kleurskema vir die vlag van die Siriese regering word hieronder gelys:

	Rooi	Wit	Groen	Swart
RGB	206/17/38	255/255/255	0/122/61	0/0/0
Heksadesimaal	#ce1126	#FFFFFF	#007a3d	#000000
CMYK	12/100/98/3	0/0/0/0	89/27/100/15	75/68/67/90

Die kleurskema vir die vlag van die Siriese opposisie word hieronder gelys:

	Rooi	Wit	Swart	Goud
RGB	206/17/38	255/255/255	0/0/0	239/187/34
Heksadesimaal	#ce1126	#FFFFFF	#000000	#efbb22
CMYK	12/100/98/3	0/0/0/0	75/68/67/90	7/26/99/0

Interpretasie van kleure

Skema	Tekstielkleur
Rooi	Die Hasjemitiese dinastie; bloedige stryd vir vryheid.
Wit	Die Omajjadiese dinastie; helder en vreedsame toekoms.
Groen	Die Fatimidiese dinastie; die sterre verteenwoordig Egipte en Sirië.
Swart	Die Abbasidiese dinastie; onderdrukking.

Vlag van die Siriese opposisie gebruik

Vlag van die Siriese Nasionale Koalisie

Vlag van die Siriese Nasionale Koalisie
Bynaam	“Onafhanklikheidsvlag”
Verhouding	2:3 (omstrede)
Goedgekeur	Aanvanklik in 1932 met 1:2 verhouding, in 1961 heraanvaar. In 2012 met 2:3-verhouding aanvaar deur regering in ballingskap (soms word die oorspronklike vlag met ’n vlagverhouding van 1:2 nieamptelik gebruik)
Ontwerp	’n Horisontale driekleur in groen, wit en swart met drie rooi vyfpuntige sterre op die wit baan.

Gedurende die loop van die voortslepende burgeroorlog gebruik die Siriese opposisie, wat deur die Siriese Nasionale Raad, toe deur die Nasionale Koalisie vir Rewolusionêre en Opposisiemagte in Sirië (algemeen bekend as die Siriese Nasionale Koalisie) ’n gewysigde weergawe van die onafhanklikheidsvlag (met die verhouding 2:3) wat vir die eerste maal in 1932 gebruik is. Die gewysigde onafhanklikheidsvlag is laat in 2011 begin gebruik as ’n universele simbool van die beswaarde opposisie. Die opposisie wou hulself van die Siriese regering onderskei en was ten gunste van die gebruik van die vlag wat gebruik is toe Sirië sy onafhanklikheid van Frankryk verkry het. Khaled Kamal, ’n amptenaar van die Siriese Nasionale Raad is nou oortuig dat hierdie vlag ook onafhanklikheid en die einde van Basjar al-Assad se regering verteenwoordig. Die vlag word deesdae hoofsaaklik gebruik in gebiede wat deur die Siriese Nasionale Koalisie beheer word. Die gebruik van die gewysigde onafhanklikheidsvlag is soortgelyk aan wat die Libiese rebelle gedoen het deur die gebruik van die pre-Ghaddafi Libiese vlag vanuit die tydperk van die Koninkryk Libië wat dit in opposisie teen Moeammar al-Ghaddafi se groen vlag. Die oorspronklike 1:2 vlagverhouding is by geleentheid nieamptelik deur die opposisie gebruik.

Geskiedenis

Koninkryk Sirië

Die Ottomaanse vlag is tot 18 September 1918, toe die Ottomane die land verlaat het, in Sirië gebruik. In 1918 was die nieamptelike vlag van Sirië die Faysalvlag of die vlag van die Arabiese opstand wat van 1916 tot 1918 teen die Ottomane gebruik is. Dit is op 30 September 1918 amptelik deur die Hasjemietfamilie aanvaar en het tot 8 Maart 1920 in gebruik gebly. Dit was die eerste vlag om die groen-rooi-wit-swart-kombinasie te gebruik wat in die meeste daaropvolgende Siriese vlae gesien is. Die simboliek van die kleure is soos volg beskryf: wit vir die Damaskiese Omajjade-tydperk, groen vir die Kalief Ali, rooi vir die radikale Islambeweging van Kharidjisme en swart vir die Profeet Mohammed, wat die “politieke aanwending van religie” in teenstand met die toenemende gesekulariseerde Turkse koloniale oorheersing getoon het. As alternatief is aangevoer dat die horisontale bane die Abbasidiese (swart), Oemajjadiese (wit) en Fatimidiese (groen) kalifate voorstel terwyl die rooi driehoek na die Hasjemitiese ryk verwys het.

Onder die Arabiese Koninkryk Sirië is die Faysalvlag herontwerp met ’n sewepuntige wit ster wat op die rooi driehoek gesuperponeer is, en dit is tot 24 Julie 1920 gebruik. Hierdie vlag is egter ’n tyd later deur Jordanië aanvaar. Die koninkryk het in 1920 vir slegs meer as vier maande bestaan voordat dit deur Frankryk beset en formeel by die Franse koloniale ryk ingelyf is, waarvan dit twaalf jaar lank deel was.

Franse Mandaat (1920–32)

Die Faysalvlag is met die koms van die Franse kolonies laat vaar. Die Franse Hoëkommissaris vir Sirië, generaal Henri Gouraud, het op 24 Julie 1920 die nuwe vlag van die Franse Mandaat-Sirië aanvaar (blou baan met wit sekelmaan en die Franse vlag in die skildhoek). Gouraud se vlag is tot 1 September 1920 gebruik waarna Sirië in afsonderlike gebiede verdeel is met elk sy eie vlag. Djamil al-Oelsji, die Siriese Eerste Minister onder die Franse Mandaat, het op 22 Junie 1920 ’n nuwe vlag aanvaar. Hierdie vlag is tot 1930 gebruik. Die derde en finale vlag onder die Franse Mandaat is in 1930 deur die Eerste Minister Tadj al-Din al-Hasani aanvaar en is tot 1 Januarie 1932 gebruik.

Onafhanklikheidsvlag (Franse Mandaat en onafhanklikheid)

Die vlag van die nuutgestigte Siriese Republiek onder die Franse mandaat is deur die 1930-grondwet bepaal. Die grondwet is deur ’n parlementêre komitee onder leiding van Ibrahim Hananu, leier van die nasionaliste, opgestel. Die Franse owerhede het aanvanklik geweier dat die samestellende vergadering die grondwet bekragtig en Henri Ponsot, Hoë Kommissaris van die Levante, het die vergadering op 5 Februarie 1929 ontbind. Ná openbare opskudding het die Franse hul besluit hersien en die konsep met enkele wysigings goedgekeur. Op 14 Mei 1930 het Ponsot Verordening 3111 uitgereik wat die konsep vir die “Grondwet van die Siriese Republiek” soos deur die Siriërs opgestel, goedgekeur het. Artikel IV van Deel I daarvan lui soos volg:

“[Die] Siriese vlag sal soos volg daar uitsien: breedte dubbel hoogte, en verdeel in drie parallelle en gelyke kleure met groen bo, dan wit en dan swart, dat die wit deel drie rooi vyfpuntige sterre in ’n reguit lyn sal bevat”.

—Artikel IV, Deel I, Grondwet van die Siriese Republiek

Die groen kleur het die Rasjidoen-kalifaat verteenwoordig, die wit die Oemajjadiese Kalifaat en die swart die Abbasidiese Kalifaat. Die drie sterre het oorspronklik die drie distrikte van Sirië verteenwoordig, naamlik Aleppo, Damaskus en Deir ez-Zor. In 1936 is die Latakia Sandjak en Jabal Druze by Sirië gevoeg, waarop die betekenis van die sterre verander het na die eerste wat Aleppo, Damaskus en Deir ez-Zor verteenwoordig het, die tweede wat Jebel Druze verteenwoordig het en die derde wat die Latakia Sanjak verteenwoordig het. Die vlag is op 11 Junie 1932 amptelik in Damaskus gehys, maar is vantevore, op 1 Januarie 1932, in Aleppo vertoon. Die vlag is gebruik as ’n simbool van die begeerte na outonomie waarom Siriërs hulle kon skaar toe die Franse die ooreenkoms om die land te verlaat, verbreek het weens die uitbreek van die Tweede Wêreldoorlog. Die simboliek was soos volg: swart vir die donker onderdrukte verlede, wit vir ’n belowende toekoms en rooi vir die bloed wat moet vloei om van eersgenoemde na laasgenoemde te vorder. Die vlag is aanvaar toe Sirië op 17 April 1946 sy onafhanklikheid verkry het. Hierdie standaard is gebruik tot en met die oprigting van die Verenigde Arabiese Republiek in 1958 wat uit Sirië en Egipte bestaan het. Ná die val van die Verenigde Arabiese Republiek het Sirië tot 28 September 1961 voortgegaan met die gebruik van die VAR-vlag, waarna die onafhanklikheidsvlag heel teruggestel is sodat Sirië kon wegstaan van die voormalige gefaalde staat.

Ba’athistiese vlae

Die vorige tweestervlag van Sirië is vir die eerste maal deur Gamal Abdel Nasser, president van Egipte asook van die Verenigde Arabiese Republiek aanvaar. Die vlag is in April 1958 van die voormalige onafhanklikheidsvlag en die verwante wette verander om ’n breër Arabiese identiteit te skep. Die nuwe vlag het die rooi, wit en swart bane van die Egiptiese revolusionêre vlag gebruik en die sterre op die vlag is van rooi na groen verander om op die Pan-Arabiese kleure te dui. Die twee sterre het op Sirië en Egipte gedui.

Nadat Sirië die VAR op 28 September 1961 verlaat het, is die voormalige onafhanklikheidsvlag weer aanvaar om Sirië se afstand van die gefaalde staat duidelik te maak.

Ná die Ba’athistiese staatsgreep in 1963 is ’n nuwe vlag op 8 Maart 1963 deur die Rewolusionêre Bevelsraad aanvaar, wat tot 1 Januarie 1972 gebruik is. In 1963 het die Ba’athiste ook in Irak aan bewind gekom en die twee Ba’athistiese regerings het in Kaïro met onderhandelinge begin om nogmaals ’n unie van Egipte, Sirië en Irak te vorm. Die proses het misluk nadat die Irakse Ba’ath-regering in November 1963 omver gewerp is. Sirië en Irak het egter reeds ’n nuwe vlag aanvaar om die vereniging te verteenwoordig. Hierdie vlag was soortgelyk aan die vlag van die VAR behalwe dat daar drie sterre in plaas van twee was om die Irak se toevoeging tot die federasie te verteenwoordig. Die drie sterre het op die eenheid van Egipte, Sirië en Irak gedui, en het ook die drie steunpilare van Ba’athisme verteenwoordig, nl. eenheid, vryheid en sosialisme.

President Hafiz al-Assad het op 1 Januarie 1972 ’n nuwe vlag aanvaar toe Sirië by Egipte en Libië aangesluit het in die Federasie van Arabiese Republieke. Die groen sterre is vervang met die Hawik van Quraish (die simbool van die stam van die profeet Mohammed). Die valk het ’n lint vasgehou waarop die naam van die federasie was, maar anders as Egipte en Libië het Sirië nie sy naam op die wapenskild aangebring nie. Hierdie vlag was in 1973 ’n nieamptelike vlag gedurende die Oktoberoorlog. Die federasie is in 1977 ontbind maar Sirië het nog vir drie jaar daarna die vlag gebruik. Op 29 Maart 1980 is die vlag herroep en vervang deur die vorige tweestervlag om Sirië se toewyding aan Arabiese eenheid te toon.

Ander vlae

• 
  Vlag van die Arabiese Koninkryk Sirië, 1920
• 
  Vlag van die Franse Mandaat-Sirië, 1920
• 
  Vlag van die Siriese Federasie en Siriese Staat, 1922 tot 1932
• 
  Vlag van die Siriese Mandaatrepubliek (1932 tot 1958) en daaropvolgende onafhanklike Siriese Republiek (1946 tot 1963)
• 
  Vlag van die Verenigde Arabiese Republiek, 1958 tot 1961
• 
  Vlag van die Siriese Arabiese Republiek, 1961 tot 1963
• 
  Vlag van die Siriese Arabiese Republiek, 1963 tot 1972
• 
  Vlag van die Siriese Arabiese Republiek in die Federasie van Arabiese Republieke, 1972 tot 1980
• 
  Siriese Arabiese Republiek, 1980 tot 2024
• 
  2024–hede

Vlae van staatshoofde

Alhoewel Sirië tans nie oor ’n presidensiële standaard beskik nie, is voorheen verskeie vlae gebruik om Sirië se staatshoofde te verteenwoordig.

• 
  Koninklike standaard van die Koning van die Arabiese Koninkryk Sirië, tot 1920
• 
  Standaard van die President van die Siriese Republiek, 1941 tot 1958 en 1961 tot 1963
• 
  Standaard van die President van die Verenigde Arabiese Republiek, 1958 tot 1961
• 
  Standaard van die President van die Siriese Arabiese Republiek, 1963 tot 1972
• 
  Standaard van die President van die Siriese Arabiese Republiek, 1972 tot 1980

Militêre vlae

• 
  Siriese Gewapende Magte
• 
  Siriese Weermag
• 
  Siriese Vloot
• 
  Siriese Lugmag
• 
  Siriese Lugmagvaandel

Franse Mandaat Sirië

Elkeen van die state in die Franse Mandaat Sirië het sy eie vlag gebruik. Die Alexandretta Sanjak, wat van 1920 tot 1923 deel was van die Staat Aleppo, en later van 1923 tot 1938 ’n deel van die Alawitiese staat, het tot sy onafhanklikheid as die Staat van Hatay nie oor ’n eie vlag beskik nie.

• 
  Staat Aleppo, 1920 tot 1925
• 
  Staat Damaskus, 1920 tot 1925
• 
  Alawitiese gebied, Alawitiese Staat en Sanjak Latakia, 1920 tot 1936
• 
  Staat Souaida, 1921 tot 1924
• 
  Staat Souaida en Jebel Druze Staat, 1924 tot 1936
• 
  Burgerlike vaandel van Souaida en Jabal al-Druze, 1921 tot 1936
• 
  Staat van Hatay, 1938 tot 1939

Soortgelyke vlae

• 
  Vlag van die Arabiese Demokratiese Republiek Sahara
• 
  Vlag van Egipte
• 
  Vlag van Irak
• 
  Vlag van Jemen
• 
  Vlag van Jordanië
• 
  Vlag van Koeweit
• 
  Vlag van Palestina
• 
  Vlag van Soedan
• 
  Vlag van Somaliland
• 
  Vlag van die Verenigde Arabiese Emirate

Bibliografie

• (en) Goodarzi, Jubin M. (2006). Syria and Iran: Diplomatic Alliance and Power Politics in the Middle East. I.B. Tauris. ISBN 978-1-84511-127-4.
• (en) Heydemann, Steven (1999). Authoritarianism in Syria: Institutions and Social Conflict, 1946–1970. Cornell University Press. ISBN 978-0-8014-2932-3.
• (en) Lawson, Fred H. (2006). Constructing International Relations in the Arab World. Stanford University Press. ISBN 978-0-8047-5372-2.
• (en) King, Stephen J. (2009). The New Authoritarianism in the Middle East and North Africa. Indiana University Press. ISBN 978-0-253-35397-9.
• (en) Podeh, Elie (1999). The Decline of Arab Unity: The Rise and Fall of the United Arabic Republic. Sussex Academic Press. ISBN 978-1-902210-20-9.
• (en) Schumann, Cristoph (2008). Liberal Thought in the Eastern Mediterranean: Late 19th Century Until the 1960s. BRILL. ISBN 9789004165489.
• (en) Thomas, Martin (2007). Empires of Intelligence: Security Services and Colonial Disorder after 1914. University of California Press. ISBN 978-0-520-25117-5.
• (en) Thompson, Elizabeth (2000). Colonial Citizens: Republican Rights, Paternal Privilege, and Gender in French Syria and Lebanon. Columbia University Press. ISBN 978-0-231-10661-0.

Eksterne skakels

• (en) Sirië by Flags of the World
• (en) "Vlag van Sirië". Encyclopædia Britannica. Besoek op 6 Maart 2020.

Hierdie artikel is in sy geheel of gedeeltelik vanuit die Engelse Wikipedia vertaal.