dr Tag wo d Ärden überlaschtet isch
Dr Tag wo d Ärden überlaschtet isch – er heisst uf Änglisch Earth Overshoot Day – isch dèè Tag im Joor, wo d Organisazioon Global Footprint Network vonnem usgrächnet het, ass d Mönschheit scho so vil Sache uf dr Wält verbruucht het wie d Ärden im ganze Joor cha produziere. Me seit au, dass d Mönsche vo dèm Zytpunkt a im Räschte vom Joor bim Wälthuushalt gwüssermasse Schulde mache, wo d Zuekumft belaschte.
Im Joor 2019 isch dèè Momänt gmäss dere Rächnig für die ganzi Wält am 29. Juli gsi. Für d Schwiiz elei gluegt wär s scho dr 7. Mai und für Düütschland dr 3. Mai gsi.
Me nimt für die Rächnig Informazioone übere gsamthaft Vrbruuch vo Rooschtoff, wo immer wider nochewachse, und tuet druus dr Ökologisch Fuessabdruck vo de Länder uusrächne. Das bedüütet, ass me woot usefinde, ob es Land nachhaltig wirtschaftet und nume so vil Material vrbruucht wie s sälber immer wider cha us dr Natur gwünne oder obs meh isch; und i däm Fall wäär s eso, dass es eigentlech meh als numen ei Ärde bruuchti zum alles wo nötig isch fürezbringe.
Bi de wyt entwicklete Länder isch dr Momänt, wo d Fähigkeit vo dr Wält zum d Ressource regeneriere gmäss dèm Modäll überlaschtet isch, scho zimli früech im Joor; bi de Länder mit ere vil eifachere Läbenswys isch s ökologische Sischteem vo dr Natur deils no nit überforderet.
Für die ganzi Ärde gsamthaft gseh het d Wältwirtschaft mit em allgemein Konsum sid anne 1971 all Joor meh Güeter vebruucht als si für nes nachhaltigs Läbe hätt dörfe.
Lischte vo so Täg, wo d Mönschheit di globale Jooresressource vo dr Ärde scho vrbruucht gha het
[ändere | Quälltäxt bearbeite]
- 1971: am 21. Dezämber
- 1990: am 7. Dezämber
- 2000: am 1. Novämber
- 2010: am 21. Augschte
- 2018: am 1. Augschte
- 2019: am 29. Juli
Weblink
[ändere | Quälltäxt bearbeite]
Commons: Earth Overshoot Day – Sammlig vo Multimediadateie