Buku Parjamita

Parjamita ᯇᯒ᯲ᯐᯔᯪᯖ 1

1:1 On ma pangkataion ni parjamita, anak ni si Daud, raja di Jerusalem. ᯀᯉᯬ᯲ ᯔ ᯇᯰᯄ᯦ᯖᯤᯀᯉᯬ᯲ ᯉᯪ ᯇᯒ᯲ᯐᯔᯪᯖ ᯀᯉᯄ᯦᯲ ᯉᯪ ᯘᯪ ᯑᯀᯑᯮ᯲ ᯒᯐ ᯑᯪ ᯐᯩᯒᯮᯘᯞᯔᯩ᯲

1:2 Tung na laho salpu do luhutna, ninna parjamita i, alogo sambing do tutu luhutna i!

1:3 Tung aha ma na hot tinggal di jolma i sian saluhut hangalutonna, na hinangaluthonna saleleng di hasiangan on?

1:4 Marlaho ro angka jolma i marsundutsundut, alai hot do anggo tano on ro di salelenglelengna.

1:5 Binsar ia mata ni ari jala sundut muse tumopot ingananna hian, pola marheahea binsar muse di habinsaranna hian.

1:6 Alogo i pe mangombus do dompak dangsina, husor muse dompak utara, sai songon i didatdati munsatunsat, jala mulahulak tu hamunsatanna hian alogo i.

1:7 Luhut angka batang aek marmuara tu laut, hape matua so binsat laut i; ai matua tu parmuaranna hian sai didatdati angka batang aek i mardalan.

1:8 Luhut hatahata * marhangaluton do, tung na so tarhatahon jolma do i. * Mata i ndang olo marnasombu marnida, jala pinggol i ndang olo marnamahap marbinege.

1:9 Manang aha naung dung masa na jolo, laos i do na masa sogot; jala manang aha naung pinatupa ni halak na jolo, laos i do patupaonna nang sogot; tung na so adong do surasuraon na so dung hea masa di hasiangan on.

1:10 Tung adong ma nanggo sada tardok halak: Ida ma, na so dung hea do anggo on masa? Hape tibu hian do i masa di tingki na robi angka na jumolo sian hita.

1:11 Ndang adong be parningotan di angka naung salpu i, suang le songon i di angka na ro sian pudina, ndang tagamon adong parningotanna di pinompar na ro sogot.

1:12 Ahu parjamita i bangkit raja na jolo gumomgom Israel di Jerusalem.

1:13 Jala diringkoti rohangku do nian manulingkiti dohot mangarisik mardongan hapistaran saluhut angka na tarjadi di hasiangan on. Hape ulaon hangaluton do i na tinurpukkon ni Debata tu jolma manisia, asa marhangaluton marhite sian angka i.

1:14 Nunga huida saluhut jadijadian angka na tarjadi di hasiangan on, gabe ida ma, saluhutna i na laho salpu do, jala pangeahion di alogo sambing do i.

1:15 Na bengkuk hian * ndang tarbahen gabe tigor, jala ndang dapot bilangan na so disi.

1:16 Nunga pola didok rohangku di bagasan songon on: Ida ma, nunga nian hupagodang jala huambai hapistaran di ahu lobi sian di saluhut jolma angka na jumolo sian ahu di Jerusalem, jala godang situtu hapistaran dohot parbinotoan diida rohangku.

1:17 Alai dung diringkoti rohangku naeng botoon mangarisik hapistaran dohot parbinotoan, habodoon dohot habobangon, gabe mamoto rohangku, mangeahi alogo sambing do iba hape nang disi.

1:18 Ai molo ganda hapistaran, ganda ma dohot hajepolon, jala manang ise na patamba parbinotoan, patamba hangaluton ibana disi.

Parjamita 2

2:1 Dung i ningku ma di bagasan rohangku: Antong unjunanku ma ho marhite sian las ni roha, guru lomo ni roham idaonmu! Hape ida ma, alogo do nang i.

2:2 Ningku ma mandok parengkelon i: Na lalaen do ho! Dohot tu las ni roha i: Aha do na binahenmu?

2:3 Dung i marsangkap rohangku di bagasan: Naeng * patogaronku sibukku marhitehite anggur, alai mangaradoti hapistaran do anggo rohangku dohot mangarisik haotoon, paima huida nian manang aha na denggan di jolma manisia sibahenonna di hasiangan on saleleng di ngoluna.

2:4 Dung i hupabalga ma angka hapadeanku, hupauli di ahu angka bagas bolon, jala hupungka di ahu angka porlak anggur.

2:5 Hubahen di ahu angka porlak dohot paredangedangan, jala husuan tusi hau angka na marparbue marragamragam.

2:6 Hubahen di ahu angka tobat mamornohi hau suanan angka na rugun martumburi.

2:7 Hutuhor ma angka hatoban baoa dohot boruboru, adong huhut di ahu naposo angka na tubu di jabungku; tole muse angka punguan lombu dohot birubiru gumodang di ahu sian saluhut jolma angka na jumolo sian ahu di Jerusalem.

2:8 Hupagukguk huhut di ahu perak dohot sere dohot arta na arga sian raja angka na pulik luat. Hupillit huhut di ahu angka parende baoa dohot boruboru bahen hariburon di jolma manisia, tole parinaan tuanlaen mansai torop.

2:9 Jadi tumimbul jala ummora ahu sian saluhut jolma angka na jumolo sian ahu di Jerusalem; hot do huhut hapistaranku di ahu.

2:10 Manang sadia pe na pinangido ni matangku ndang huontohi, ndang hutiopi rohangku mangolooloi nasa lomona. Ai tung na las situtu rohangku mida saluhut pambahenanku, jala i do antong jambarhu sian saluhut ulaonku.

2:11 Alai dung hubereng saluhut pambahenanku, angka na binahen ni tanganku, ro di hangaluton angka na huta on laho paulihon, ida ma laho salpu do saluhutna jala * mangeahi alogo sambing ahu disi, ndang adong hape na hot anggo di hasiangan on.

2:12 Dung i humusor ma ahu naeng manimbang * hapistaran, habodoon dohot habobangon. Ai ninna rohangku do aha ulaning bahenon ni jolma na ro manggonti rajai? Suman tahe tu naung binahen ni halak hian bahenonna.

2:13 Jadi huida ma, marhasurungan tahe hapistaran i martimbangkon haotoon, songon surung ni hatiuron tahe martimbangkon haholomon.

2:14 Marmata hatiuron do anggo ulu ni halak na pistar, alai mardalan di bagasan haholomon do anggo halak na oto. Alai ditanda rohangku huhut sisada parsorion do sogot manisia saluhutna.

2:15 Jadi ninna rohangku di bagasan ma: Anggo sisada parsorion do ahu hape dohot halak na oto, aha ma gunana sai huringkoti hapistaran na sai laon? Jadi ninna rohangku ma alogo sambing do hape nang i.

2:16 Ai ndang adong parningotan di halak na pistar ro di salelenglelengna, suang songon di halak na oto, alai naung lupa saluhutna i di angka ari na ro sogot; iale isuang tung mate do hape halak na pistar rap dohot halak na bodo!

2:17 Jadi marbiasbias rohangku mida hangoluan on; ai sogo rohangku mida pambahenan angka na binahen di hasiangan on, ala na laho salpu do luhutna jala pangeahion di alogo sambing do i.

2:18 Jadi marbiasbias rohangku mida saluhut ulaon angka na huhangaluthon di hasiangan on ala ingkon tadingkononku do i di jolma na ro sian pudingku.

2:19 Jala ise pabotoboto manang halak na pistar ibana manang halak na oto? Hape ibana do gabe tuan di saluhut ulaon angka na huhangaluthon mardongan hapistaran di hasiangan on! Laho salpu do hape nang i.

2:20 Dung i marbalik ma rohangku naeng marpandelean nian mida saluhut ulaon angka na huhangaluthon di hasiangan on.

2:21 Ala huida sada jolma, dibahen do nian nasa hapistaranna, parbinotoanna dohot hamaloonna mangaradoti ulaonna, hape ingkon tinggalhononna do i bahen jambar ni jolma na so dung marhangaluton ala ni! Alogo sambing do hape nang i jala hinamago godang.

2:22 Ai aha na ma parsaulian ni jolma sian sude ulaonna dohot sian domdamdomdam ni rohana taringot tu na hinangaluthonna di hasiangan on?

2:23 Ai ariari ibana * marhangaluton saleleng di ngoluna, jala mardongan hajepolon ulaonna, nang bornginna i ndang marhasonangan rohana. Alogo sambing do nang i.

2:24 Ndang adong hape na denggan di jolma i, dungkon ni na mangan ibana dohot na minum, jala dipasonang rohana mangihutihut ulaonna hian. Alai nang i hape, ingkon pala ni Debata do huida.

2:25 Ai tung ise ma tarbahen mangan manang minum, ia so marharoroan sian Ibana.

2:26 Ai tu jolma hasudungan ni rohana i do dibasabasahon Debata hapistaran, parbinotoan dohot las ni roha; alai anggo tu halak pardosa dilehon do hangaluton laho * papungupunguhon dohot pagukgukkon, asa lehonon ni Debata muse tu jolma hasudungan ni rohana i. Nang i ndang marguna hape, jala pangeahion di alogo sambing do i.

Parjamita 3

3:1 Martingki be do luhutna na tinompa. Martiti be do huhut nasa sangkapsangkap di hasiangan on.

3:2 Martiti be do: Na tubu dohot na mate; na manuan dohot na mangurati na sinuan i;

3:3 Na mambugangi dohot na pamalumhon; na mangalohai dohot na paulihon;

3:4 Na tangis dohot na mengkel; na mangandungi dohot na manontor;

3:5 Na mambolongkon batu dohot ma papunguhon batu; na masiummaan dohot na mandao sian na masiummaan;

3:6 Na mangalului dohot na mangago; na mangaramoti dohot na mambolongkon;

3:7 Na mangaribahi dohot na manjarumi; na mauhom boti dohot na marhata i;

3:8 Na mangkaholongi dohot na mangkosom; na marmusu dohot na mardemak:

3:9 Tung aha ma parsaulian na hot tinggal di pangula marhite sian ulaonna sandiri?

3:10 Nunga tung tangkas huida hangaluton na tinurpukkon ni Debata tu jolma manisia, asa marngalutan marhite sian angka i.

3:11 Alai anggo Ibana denggan do saluhutna i dibahen di tingki halehetanna; ditompahon do huhut roha hangoluan salelenglelengna tu bagasan rohanasida, holan na so dapot jolma i sulingkitonna jadijadian na jinadihon ni Debata sian mulamula sahat ro di ujung.

3:12 Dibahen i nunga tung hutanda, * ndang adong na dumenggan di nasida, nda na marlas ni roha dohot na mambahen na denggan saleleng di ngoluna.

3:13 Angkup ni tahe manang ise jolma na mangan dohot na minumi dohot marnida na denggan marhite sian ulaonna, silehonlehon ni Debata do nang i.

3:14 Nunga tung tangkas huboto, luhut na binahen ni Debata, i do na hot ro di salelenglelengna; ndang tarbahen jolma i manambai tusi, manang mangorui sian i, dibahen Debata pe songon i, asa mabiar jolma i mida Ibana.

3:15 Manang aha na masa nuaeng, naung dung masa do i, jala manang aha na masa sogot pe, nunga dung masa do i di na robi; ai diulahi Debata do mangalului naung salpu i.

3:16 Angkup ni nunga dung huida di hasiangan on: Hajongjongan ni uhum, hape masa disi hajahaton, dohot hajongjongan ni hatigoran, hape masa disi hageduhon.

3:17 Jadi ninna rohangku di bagasan ma: Rap uhumon ni Debata ma halak partigor dohot parjahat, ai mandapot di Ibana do sogot saluhut sangkap ni roha ni jolma dohot sandok ulaonna.

3:18 Angkup ni didok rohangku ma di bagasan: Ala ni pangalaho ni jolma manisia umbahen songon i masa, naeng unjunan ni Debata nasida, papatarhon tu nasida tudoshon pinahan sambing nasida marpangalaho, anggo sian rohanasida sandiri.

3:19 Ai tung sisada parsorion do sogot jolma manisia dohot * pinahan; mate pinahan, mate dohot jolma i, sada do hosai i di saluhutna, ndang adong hasurungan ni manisia sian pinahan, ai laho salpu do luhutna.

3:20 Laos sada do hapatean ni luhutna; * marharoroan sian orbuk do luhutna, laos marhapatean tu orbuk muse luhutna.

3:21 Ai tung ise ma umbotosa manang tung manaek tu ginjang do ia tondi ni manisia? Ia hosa ni pinahan tung turun do tu tano.

3:22 Dibahen i nunga tung tangkas huida ndang adong na dumenggan, nda marlas ni roha jolma i di angka ulaonna, ai i do jambarna. Ai tung ise ma mamboan jolma i tusi, asa idaonna manang aha na masa dung salpu ibana?

Parjamita 4

4:1 Dung i huulaki ma patangkashon saluhut pangarupaon, angka na masa di hasiangan on, gabe huida ma iluilu ni halak angka na hona pangarupaon hape ndang adong na mangapuli nasida; jala uhum gogo dibahen tangan ni angka pangarupa tu nasida, hape ndang adong na mangapuli nasida.

4:2 Jadi huparhatua ma halak angka naung leleng mate, gumodang sian angka na mangolu dope rasirasa nuaeng.

4:3 Alai martuaan dope sian duansa huetong halak na so dung tubu dope, ala so sanga dope diida pambahenan na jahat, angka na masa di hasiangan on.

4:4 Dung i huida muse ma saluhut hangaluton dohot hamaloon marhapandean, hape patubu roha na masiiburuan do i. Jea do nang i, jala mangeahi alogo sambing iba disi.

4:5 Halak na oto mamuhung tanganna duansa, jala dipangan sibukna sandiri.

4:6 Tagonan do sanggim hasonangan sian sangkatubang hangaluton dohot pangeahion di alogo.

4:7 Dung i huida muse ma haotoon na masa di hasiangan on.

4:8 Adong do sada halak punjung, ndang mardongan, anakna so adong, marhahamaranggi pe soada, hape ndang marpansadian ia ulaonna, matana pe ndang olo marnasombu mida hamoraon. Dung i ninna rohana ma: Pasarisari ise tahe ahu umbahen hutaonhon marngalutan, pola raparon tondingku so marnida na denggan? Jea do hape nang i, jala hinamago godang!

4:9 Tagonan tahe mardongan iba sian na punjung, ala muba dengganna molo rap marsaulihon parbue ni na niulana be.

4:10 Ai molo tinggang na sada, paheheon ni donganna ma ibana; alai tarjepol situtu ma halak na punjung molo tinggang ibana, ala soadadong donganna pahehehon ibana.

4:11 Songon i molo rap modom dua halak, masiangoran ma nasida, alai beha ma lasna anggo di halak na punjung?

4:12 Mura talu gogo anggo punjung sahalak, tupa manahan anggo dua halak nasida maradophon alona, jala tali na tinolu maol do tos.

4:13 Tagonan do sada dolidoli na pogos jala na bistok sian sada raja naung matua nian hape na oto, na so olo be paingoton.

4:14 Ai * ruar parjolo i sian bagas hurungan laho bangkit raja, nunga marpogos hian ibana tubu di harajaonna.

4:15 Dung i huida ma luhut halak angka na mardalani di hasiangan on paihutihut dolidoli na paduahon i, na manoluk na parjolo i hian.

4:16 Tung na so tos do odoran ni sandok bangso, angka na niuluhonna i, alai ndang marlas ni roha mida ibana anggo halak na ro sian pudina. Ai haotoon do nang i jala * mangeahi alogo sambing iba disi.

4:17 Ramoti langkalangkam, molo laho masuk ho tu bagas ni Debata! Ai * dumenggan do jumonok iba laho tumangihon hata i, sian * pelean pinelehon ni halak na oto, ala so diboto rohana na roa do hape na niulana.

Parjamita 5

5:1 Unang magirgirhu pamanganmu, jala unang hapogan roham mandok hata anggo di adopan ni Debata; ai maringan di surgo do anggo Debata, di tano on do ianggo ho, dibahen i paotik hatahatam.

5:2 Ai marharoroan sian godang ni hinamago do nipi, suang songon i pangkataion gapgap ni halak na oto sian * deak ni hatahatana.

5:3 Molo * marbagabaga ho tu Debata, unang marbenda ho pasahathon, ai ndang lomo rohana mida halak na oto i. Manang aha pe naung binagabagahonmu, ingkon gararonmu do i.

5:4 Tagonan tahe unang iba marbagabaga, sian na marbagabaga hape ndang pinatolhas.

5:5 Unang loas pamanganmu mangela dagingmu mardosa, jala unang marneang ni roha ho mandok di * adopan ni suruan ni Debata: Nunga sala ahu! Boasa tagonan marronirimas Debata mida ho ala ni hatam, gabe mago maon sandok ulaon ni tanganmu.

5:6 Ai molo deak nipi, deak huhut haotoon dohot hatahata, alai ianggo ho sai habiari ma Debata.

5:7 Molo diida ho hona pangarupaon halak na pogos i, mago huhut uhum dohot hatigoran di luat i, unang pola longang roham mida pambahenan sisongon i; ai martuan muse do nang tuan na timbul, jala na tumimbul sahali pandapotan ni duansa nasida.

5:8 Jala hasurungan ni na sada luat taringot tu saluhutna i: Molo marmulia rajana diida isi ni luat i.

5:9 Manang ise na holong roha di perak, ndang olo marnamahap di perak, jala manang ise * na holong roha di hamoraon ndang tagamon gabe parsaulianna. Nang i hata oto do i.

5:10 Molo ganda sinamot, ganda dohot halak na manganhon; tung aha ma parsaulian ni tuan nampunasa i disi, nda holan asal paidaidaon ni matana?

5:11 Renge do modom halak na loja mangula, nang otik, nang godang dipangan; hape balisaon do anggo mata ni halak na mora dibahen pargadombusonna.

5:12 Adong dope huida sadanari jea bolon di hasiangan on: I ma hamoraon na hinomolhomol ni tuan nampunasa bahen hamagoanna sandiri!

5:13 Ai mago do hamoraon sisongon i binahen ni soro ni ari; tung sura adong sada anak tinubuhonna, ndang adong tinggal nanggo apus di bagasan tanganna.

5:14 Ia marsaemara ibana ruar sian butuha ni inana, laos suang songon harorona i muse ibana mulak, ndang adong boanonna agia aha upa ni hangalutonna, anggo tung pola golomgolomon ni tanganna.

5:15 Jea bolon do nang on: Sandok ia songon i ro jolma i, laos songon i ibana laho; tung aha ma parsaulianna sian hasusaanna pagulutgulut alogo?

5:16 Angkup ni luhut ariarina dipasudasuda di bagasan haholomon, godang huhut hasusaanna, sahitsahitna dohot murukmurukna.

5:17 Ida ma, * pangarimpunan ni na denggan naung huida i: Lehet do i mangan minum jolma i jala dipasonang rohana mangihutihut sandok ulaonna hian, na niulana di hasiangan on, saleleng di ngoluna, na nilehon ni Debata tu ibana; ai i do jambarna.

5:18 Angkup ni molo dilehon Debata tu manang ise jolma hamoraon dohot sinamot, diloas huhut ibana mangan dohot mambuat jambarna sian i huhut marlas ni roha di ulaonna, silehonlehon ni Debata do i.

5:19 Ai ndang sadia dipaingotingot rohana angka ari ni ngoluna, ala naung nialusan ni Debata ibana marhite sian las ni rohana i.

Parjamita 6

6:1 Adong dope huida sadanari jea bolon di hasiangan on jala dokdok do i dipasarisari jolma i:

6:2 Molo dilehon Debata hamoraon dohot arta dohot hasangapon tu sada baoa, pola ndang hurangan rohana taringot tu saluhut na pinangidona, hape ndang diloas Debata ibana mangan sian i, * halak sileban tahe pasudahon: I ma jea dohot hinamago godang.

6:3 Tung sura saratus ianakhon ditubuhon sada baoa, jala leleng ibana mangolu, sanga sarimatua situtu, hape ndang sombu rohana marsaulihon na denggan i, ndang tipak nang tanomanna, dohononku do: Tagonan do silumaksaijur sian baoa sisongon i.

6:4 Ai magopo do i ro, jala di bagasan haholomon muse laho, laos haholomoni manghungkupi goarna.

6:5 Nang mata ni ari ndang sanga diida manang di tanda. Andul do i sumonang sian baoa ondeng.

6:6 Nang tung sura mangolu ibana dua ribu taon lelengna, hape ndang diida anggo na denggan i, nda sada do hapatean ni saluhutna?

6:7 Saluhut hangaluton ni jolma sumarihon pamanganna do, hape ndang sombu anggo rohana binahen ni.

6:8 Ai aha do hasurungan ni halak na pistar sian halak na oto? Aha gunana di halak na dangol ia diboto mardalan di adopan ni halak na mangolu?

6:9 Tagonan do parnidaan ni mata, sian roha na monsong mardondami; hata na oto do nang i jala pangeahion di alogo sambing.

6:10 Manang beha pe pangalaho ni jolma, nunga tibu hian targoar goarna i, jala binoto jolma hian do ibana, jala ndang tarbahensa mardabudabu dohot Debata, na gumogo situtu sian ibana.

6:11 Ai molo godang hatahata, na paganda jea do i; tung aha ma laba ni jolma sian i?

6:12 Tung ise umbotosa manang aha na denggan di jolma i bahen hangoluanna saleleng di ariari ni ngoluna, * angka na laho salpu songon halinu? Ise tahe tarbahen * pabotohon tu jolma i manang aha na masa di hasiangan on ia dung salpu ibana.

Parjamita 7

7:1 Tagonan do * barita na denggan sian miak na hushus; jala dumenggan do ari hamatean ni jolma sian ari hatutubuna.

7:2 Tagonan do masuk iba tu jabu parandungandungon asa tu jabu parpanggalangan; ai di bagasan parjolo i tarida do ujung ni nasa manisia, tama ingkon diparateatehon jolma na mangolu i do i.

7:3 Tagonan do margondok ni roha sian na martata, ai gondok ni panaili padenggan roha.

7:4 Roha ni halak na pistar mian di bagasan jabu parandungandungon, alai anggo roha ni halak na oto mian di bagasan jabu parhorjaan.

7:5 Tagonan do pabegebegeon pinsangpinsang ni halak na pistar, sian ende ni baoa na oto patangitangion.

7:6 Ai songon parlopuk ni bulu duri di toru ni hudon, songon i do parengkelon ni halak na oto. Tung na so marguna do i.

7:7 Tongon tahe pangarupaon pagilo roha ni halak na pistar, jala sisip mangago tu roha.

7:8 Tagonan do hasunan ni hata sian parbingkasanna; tagonan do halak na lambas marroha sian halak na ginjang marroha.

7:9 Unang * girgir roham mangoloi piripirion, ai maringan di bagasan roha ni halak na oto do piripiri.

7:10 Unang dok: Dia do ulaning dalanna umbahen dumenggan angka ari di na robi sian nuaeng? Ai ndada marbisuk sungkunsungkunmi taringot tusi.

7:11 Denggan do hapistaran, dos tahe dohot teanteanan godang, jala hasurungan ni halak angka na marnida mata ni ari do i.

7:12 Ai tarbahen do marlinggomlinggom tu hapistaran, nang tu perak, alai hasurungan ni parbinotoan on do: Hapistaran i mangalehon ngolu tu tuan nampunasa.

7:13 Patangkastangkas ma jadijadian ni Debata, ai tung ise ma tarbahensa * patigorhon manang aha, molo Ibana pabengkukkon?

7:14 Marlas ni roha ma ho jumpa di ari na denggan, jala pasuang roham tu bagasan uju di ari hinamago, ai rap ditongos Debata do duansa, asa unang jumpang jolma i manang aha na masa dung salpu ibana.

7:15 Luhutna i nunga huida uju di angka ari haliluonku: * Adong huida halak partigor tung mago di bagasan hatigoranna, adong huhut huida halak parjahat tung sanga do sarimatua di bagasan hajahatonna.

7:16 Unang majujurhu ho di pintormu, jala unang tarlobi bisukmu; boasa tagonan ho sandiri naeng mangago ho?

7:17 Unang pagukguk hajahatonmu, jala unang mulak maoto ho! Boasa tagonan naeng mate ho so jumpang dope tingkim?

7:18 Denggan do ia ditangkup roham na sadaon, unang huhut dipalua tanganmu na sadaan, ai manang ise na mabiar mida Debata tongatongana buatonna.

7:19 Hapistaran i margogoihon halak na pistar, gumodang tahe sian sampulu halak ulubalang angka na martaon di bagasan huta.

7:20 Ai ndang adong jolma partigor di tano on nanggo sada, anggo tung holan na denggan diulahon, jala ndang dung mardosa.

7:21 Dibahen i unang ma pagagathon tu roham luhut hatahata, angka na hinatahon ni halak, asa unang begeonmu naposom mamulasi ho.

7:22 Ai nunga piga hali diingot roham naung dohot ho mamburai halak sileban.

7:23 Luhutna i nunga huunjuni mardongan hapistaran; ninna rohangku nian: Naeng pistar ahu, hape mandao do hapistaran i sian ahu.

7:24 Dao do anggo apala dirina, jala mansai bagas; tung ise ma jumpangan disi?

7:25 Dung i humusor ma rohangku naeng mananda dohot manulingkit dohot mangalului hapistaran dohot panimbangon, naeng mananda huhut hajungkaton ni habodoon dohot haotoan ni hajahaton.

7:26 Dung i jumpang ahu ma saragam na sumapot sian hamatean: I ma parompuan, tung songon jaring dohot jorgong do rohana, jala tanganna tung songon rante do. Malua do sian ibana anggo halak hasudungan ni Debata, alai anggo halak pardosa ingkon jailonna do.

7:27 Ida ma angka i do jumpang ahu sadasada, ninna parjamita i asa jumpangan panimbangon.

7:28 Na niluluan ni rohangku angkup ni dope nian hape ndang jumpang ahu: Sada baoa na tigor tahe sian saribu jumpang ahu; alai anggo parompuan ndang adong dapot ahu nanggo sada sian na sai torop.

7:29 Ida ma, on dope na jumpang ahu: * Tigor do nian jolma i anggo ditompa Debata, alai lan do ujarujaran dilului rohanasida.

Parjamita 8

8:1 Ise ma tung songon halak na pistar? Jala ise umboto lapatan ni hatangkon? * Hapistaran i do pasihar panaili ni jolma, surbot ni pamerengna pe muba do.

8:2 Sipaingothu di ho; sai parateatehon ma hata ni raja, nang ala ni hata haburjuon naung binulanhonmu tu Debata.

8:3 Unang hapogan ho ruar sian adopan ni bohina, jala unang pirhon parkaro na geduk, ai saguru lomo ni rohana do bahenonna.

8:4 Ai hata ni raja doshon parenta do, jala ise ma na hum mandok tu ibana: Aha do na binahenmu.

8:5 Manang ise na mangaradoti patik, ndang habiaranna hata na roa, diboto roha ni halak na pistar do tingki halehetan dohot uhum.

8:6 Ai * martingki jala marbangko be do saluhut na masa, gabe dokdok disarihon jolma i parsorionna.

8:7 Ai ndang diboto jolma i manang aha na masa sogot ai tung * ise ma pabotohon tu ibana manang beha parturena sogot.

8:8 Ndang adong jolma nanggo sada, tung mandapot di ibana hosana, tung hatiopansa hosana i; jala ndang adong jolma tung mandapot di ibana ari hamamatena, jala ndang adong haluaon sian parungkilon na sasada i, jala ndang tarbahen hajahaton paluahon jolma parjahat i.

8:9 Luhutna i nunga huida uju diranapi rohangku saluhut pambahenan, angka na masa di hasiangan on, uju sada jolma mangarajai donganna jolma mambahen ibana marhinamago.

8:10 Angkup ni, nunga huida tipak tartanom halak parjahat; hape anggo halak na mangulahon na denggan, angka na ro sian inganan na badia, dihalupahon donganna sahuta do i. Ipe hata oto do i.

8:11 Ala so tibu manginona pambahenan angka na jahat i, dibahen i gok roha ni jolma manisia di bagasan mangulahon hajahaton.

8:12 Alai tung sura pe ratus hali halak pardosa mangulahon hajahaton, pola sanga sarimatua ibana, tangkas do huboto: Martua sogot halak na mangkabiari Debata, angka na marparange di jolona.

8:13 Alai ndang tagamon sonang anggo halak parjahat i, jala ndang tagamon paganjangonna ariarina; alai songon halinu do ibana, ala so marhabiaran tu Debata.

8:14 Adong dope sadanari halongangan masa di atas tano on: Adong halak partigor, hira pambahenan ni halak parjahat niulana, parsorionna timbangon; jala adong halak parjahat, hira pambahenan ni halak partigor niulana, parsorionna timbangon. Nunga pola hudok halongangan do i.

8:15 Dibahen i hupapujipuji las ni roha, ala na so adong na dumenggan di jolma i saleleng di hasiangan on, ia so na * mangan minum dohot marlas ni roha; i do na tinggal di ibana sian ulaonna saleleng ariari ni ngoluna, angka na nilehon ni Debata tu ibana di hasiangan on.

8:16 Dung i diringkoti rohangku muse naeng mananda hapistaran dohot manangkasi hinamago na masa di atas tano on, pola tung balisaon mata ni jolma borngin dohot arian, ndang tarpodom.

8:17 Jadi tangkas ma huida sandok jadijadian ni Debata, na so tardodo jolma i pambahenanna angka na masa di hasiangan on. Nang pe maradu ngalutan roha ni jolma i mandiori, ndang tagamon jumpangsa; tung sura pe ninna roha ni halak na pistar leak botoonna do i, ndang tagamon jumpangsa.

Parjamita 9

9:1 Luhutna angka on nunga diparateatehon rohangku, nunga husulingkit sasudena i, nang halak partigor, nang halak na pistar ro di ulaonnasida tahe di bagasan tangan ni Debata do hape; ndang diboto jolma i manang sian holong ni rohana manang sian rimasna, atik pe ngomngom di jolonasida luhutna i.

9:2 Marhatopan do sude jolma taringot tu saluhutna i, sisada parsorion do halak partigor dohot halak parjahat, halak na denggan dohot na pita marroha, songon halak na ramun; halak na pasahathon pelean, songon halak na so mamele halak na daulat, songon halak pardosa; halak panolonnolon songon halak na mabiar manolon.

9:3 I ma jea apala na umbalga sian saluhut na masa di hasiangan on, tung sisada parsorion do luhutna; tung * gok hajahaton huhut roha ni jolma manisia, jala haotoon marragamragam di bagasan rohanasida saleleng mangolu nasida, dung i ingkon topotonna ma angka na mate.

9:4 Tung ise ma jolma dibelok sian i? Luhut halak na mangolu marpangkirimon do. Ai tagonan do sada panangga na mangolu sian sada singa na mate.

9:5 Ai anggo halak na mangolu i diboto do na ingkon mate nasida sogot, alai anggo halak naung mate ndang diboto agia aha, jala ndang adong be di nasida parjambaran, ai nunga lupa parningotan di nasida.

9:6 Nang holong ni rohana, nang hosomna dohot iburuna pe nunga mago, jala ndang be marjambar nasida di saluhut angka na masa di hasiangan on.

9:7 Antong laho ma ho, marlas ni roha ma ho manganhon sagusagum, pir ma tondim manginum anggurmu, ai nunga tibu hian marlomo ni roha Debata mida ulaonmu.

9:8 Ingkon tongtong ma ho marpangkean na saksak, jala unang hurangan miak ia ulum.

9:9 Sai * marlas ni roha ma ho saleleng di ngolum rap dohot jolmam, na hinaholonganmu saleleng ariari ni ngolum na gale i, na nilehon ni Debata tu ho di hasiangan on, luhut ariarim angka na tibu laho salpu; ai i do jambarmu di hangoluan on sian ulaon na hinangaluthonmu di hasiangan on.

9:10 Manang aha na jumpang tanganmu siulaonmu, ula ma i sian nasa gogom, ai ndang adong be masa ulaon, manang panimbangon, manang parbinotoan, manang hapistaran anggo di bagasan parbeguan sitopotonmu sogot.

9:11 Dung i huulaki ma patangkashon na masa di hasiangan on, ndada di halak na gompis hape sanggul parlojongon, ndada di halak na begu haantuon, ndada di halak na pistar sagusagu, ndada di halak na marroha hamoraon, ndada di halak sigodang parbinotoan asi ni roha; tingki tahe dohot parsorion mangonai tu nasida luhutna.

9:12 Ai nang jolma i ndang diboto hian ajalna, songon dengke tahe na dapot di bagasan jala pangago, jala songon pidong na dapot sambil, suang songon i taralit jolma manisia uju di tingki hinamago na maninggang nasida so pangkirimanna.

9:13 Dohot on tau hapistaran godang masa di hasiangan on diida rohangku:

9:14 Adong sada huta na metmet, jala otik jolma pangisina, dung i ro ma sada raja na bolon, ditunghum ma huta i, pola partanobatoan, bolon dibahen humaliang.

9:15 Alai jumpang ma di bagasan huta i sada halak na pogos, alai na pistar do, tarpaluasa nian huta i marhitehite hapistaranna; hape ndang adong jolma nanggo sada na marningot di halak na pogos i.

9:16 Jadi ningku ma: Tagonan do hape hapistaran sian hagogoon; alai tahe marhu ni roha angka jolma i mida hapistaran ni na pogos, jala ndang ditangihon angka hata sipaingotna.

9:17 Tagonan do hata ni halak na pistar pabegebegeon marsonangsonang, sian suraksurak ni sada raja di tongatonga ni halak na oto.

9:18 Tagonan do hapistaran sian parhohas tu parporangan, alai godang do ruhut na denggan diago sada halak pardosa.

Parjamita 10

10:1 Sada lanok na mate mambahen bau dohot gurgur miak na hushus ni sada pande ubat; suang songon i jotjot ummarga haotoon saotik sian hapistaran dohot hamuliaon.

10:2 Roha ni halak na pistar di tangan siamunna do, alai anggo roha ni halak na oto di hambirangna do.

10:3 Manang di dalan dia pe mardalani halak na oto i sai tarida do rohana na hurangi, hape balik disura rohana luhut halak na oto.

10:4 Molo tung marronirimas raja mida ho, unang * pola humordit roham, ai roha haholomon manundati godang dosa.

10:5 Adong dope jea sadanari huida di hasiangan on, tudos tahe tu haliluon na pinaksa ni pangarajai:

10:6 Halak na oto balik panahatan ni pangkat na balga dibahen, ai halak na mora hundul di talaga dibahen.

10:7 Huida huhut marsihundul di hoda ia hatoban, hape mardalan pat ia raja hira hatoban.

10:8 Manang ise na mangkali godung, ibana sandiri madabu tu bagasan; jala manang ise na mangaloha parik batu, parguton ni ulok ma ibana.

10:9 Manang ise na mangungkit batu, sai na tipaonna do ibana; manang ise na manggalagat hau, sai na marmara ibana disi.

10:10 Molo dung matultul tangke dibahen manang ise, jala ndang digarut babana, ingkon mangasahon gogo na ma ibana manallikhon; alai na marhaseangkon hapistaran i do na dumenggan.

10:11 Molo * mamargut ulok tagan so hona tabas, ndang be marlaba hapandean ni panubuti.

10:12 Lomo roha ni pinggol umbege pangkataion ni halak na pistar, alai bibir ni halak na oto mamondut ibana sandiri.

10:13 Mula ni pangkataion ni pamanganna haotoon do, jala ujungna hata lalaen sambing do.

10:14 Sai * dipadeakdeak halak na oto do hatahatana; ndang diboto jolma i manang aha na masa sogot, tung * ise ma pabotohon tu ibana manang aha na masa dung salpu ibana?

10:15 Hangaluton ni halak na oto mangalojai ibana sandiri, ala so diboto topotonna dalan tu huta.

10:16 Marjea ma ho, ale luat na marrajahon * dakdanak, jala sai margadombus papangan ni indukna.

10:17 Alai martua ma ho, ale luat na marrajahon halak na marmulia hian, jala di tingkina hian mangan angka indukna mangalap gogo, ndada margadombus.

10:18 Binahen ni gurbak ni ulu jomba angka parhau ni bagas, jala binahen ni hagaleon ni tangan, tiris jabu i.

10:19 Lilian marhariburon nasida mambahen panggalangon, jala * anggur palashon roha ni jolma na mangolu, jala hepeng patupahon luhutna i.

10:20 Nang di bagasan pingkiranmu, * unang pulasi rajai, jala unang bura i halak na mora di bagasan bilut podomanmu, atik tung beha adong pidong na martongatonga langit patolhashon suara i jala onggang pabotohon pangkataionmu maon.

Parjamita 11

11:1 Padalan ma sagusagum tu bariba ni laut, ai di laonlaon ni ari dapot ho do i marbunga.

11:2 Bahen marjambar pitu manang ualu halak, ai ndang diboto ho manang jea dia ro tu atas tano on.

11:3 Molo sorat angka ombun i, dipangusehon ma udan tu atas tano on, molo marobo hau dompak dangsina manang dompak utara, ia tusi haroboan ni hau i laos disi do i peak.

11:4 Manang ise na pajagajaga alogo, ndang tagamon saut manabur, jala manang ise na patangkastangkas ombun, ndang tagamon saut ibana manggotil.

11:5 Ndang diboto ho manang didia * pardalanan ni alogo dohot ** panjadijadi ni holiholi di bagasan bortian ni boruboru na marhangoluan: Suang songon i ndang diboto ho * jadijadian ni Debata na manjadihon saluhutna.

11:6 Sogot manogotna i saburhon bonim jala unang patait tanganmu nang bodarina i, ai ndang diboto ho manang dia sian na dua i manjadi, manang tung rap duansa manjadi.

11:7 Tonggi do hatiuron i jala lomo roha ni mata marnida mata ni ari.

11:8 Tung sura liput di taon jolma i mangolu, denggan do marlas ni roha ibana di saluhutna i, alai marningot ibana huhut di angka ari haholomon, ai tung torop do angka i. Luhut na masa sogot laho salpu do i.

11:9 Antong marlas ni roha ma ho, ale dolidoli tagan di haposoonmu, jala guru sombu ni roham bahen di angka ari hadolionmu! Jala paihutihut angka dalan lomolomo ni roham, guru sombu ni matam; alai boto huhut togutoguon ni Debata do ho sogot tu paruhuman ala saluhutna i!

11:10 Paholang ma murukmuruk sian bagasan roham jala padao hajahaton sian sibukmu, ai tingki haposoon dohot buha siang ari laho salpu do i tibu.

Parjamita 12

12:1 Sai, dipaingotingot roham ma Sitompa ho di angka ari haposoonmu, tagan so ro dope angka ari hinamago, jala ngomngom angka taon pandohonanmu: Ndang lomo rohangku di angka i.

12:2 Tagan so mangkolom dope mata ni ari dohot hatiuron ro di bulan dohot angka bintang, jala mardapotdapot angka ari rondo.

12:3 Di ari uju i angka hitir angka sijaga bagas i jala telluktelluk baoa angka na margogo jala mansohot manduda angka panduda i ala nunga lam marurus, manjadi homur dohot angka na mandulo sian panduloan.

12:4 Jala tarhinsu hinsuhinsu haroroan na dua i lam tu ngerngerna suara ni pandudaan i, hira tudos tu suara ni amporik na ma, jala sulon sude boru ni parendeon.

12:5 Pola mabiar nasida mida nangkohan, jala lan habiaran di tongandalan disura rohana, jala marurus sian unte albung angka bunga na saksak jala sorat dihilala sihapor, jala mansadi angka hisaphisap, ai laho ma jolma i manopot bagas siingananna salelenglelengna nunga pola monsong mardalan di alaman angka pangondasi.

12:6 Tagan so tos dope tali perak i, manang matapor guriguri sere jala malala timbatimba di lambung pansur, jala malala galapang di lambung ni sumur.

12:7 Jala * mulak orbuk i tu tano, pambuatanna hian, alai anggo tondi mulak tu Debata, nampunasa hian.

12:8 Tung na so marguna do saluhutna i, ninna parjamita i, saluhutna tahe ndang hasea.

12:9 Angkup ni, ala pistar parjamita i, diajarhon huhut parbinotoan tu halak situan na torop i, jala didasing, jala disulingkit, jala * maraturan dibahen godang poda sipaingot.

12:10 Mutu huhut roha ni parjamita i mandiori hata angka na tangkas marhahonaan jala torang disurathon angka hata hasintongan.

12:11 Ai poda sipaingot sian halak na pistar songon * hujur palait do, songon labang angka na pate nilabangkon, marhite sian halak na papungupunguhon, jala na nilehon ni Sada Parmahan.

12:12 Angkup ni ale anaha, sai olo ma ho paingoton marhite sian angka poda on! Ai ndang marpansadian halak patoroptorop buku, jala tung na loja do daging mandatdati pajahajaha angka i.

12:13 Pangarimpunan ni sude poda naung itabege, on do: Habiari Debata, jala radoti angka tonana, ai i do inana siingoton ni ganup jolma.

12:14 Ai nasa parulaon ni jolma boanon ni Debata sogot tu paruhuman ro di saluhut na buni, nang na denggan nang na jat.