Solar eclipse
 Ta ocurri un total solar eclipse cuando ta cubri el Luna con el disco del Sol por completo, como visto na el solar eclipse del 11 de agosto de 1999. Observable maga solar prominencia a lo largo de la extremidad (na rojo), ansina como maga extenso filamento del solar corona. | |
 Ta ocurri un anular solar eclipse cuando demasiao lejos el Luna para cubri con el disco del Sol por completo. (Solar eclipse del 14 de octubre de 2023.) | |
 Durante un parcial solar eclipse, ta bloquea el Luna con parte lang del disco del Sol. (Solar eclipse del 25 de octubre de 2022.) |
Ta ocurri un solar eclipse cuando ta pasa el Luna entre el Tierra y el Sol, oscureciendo ansina con el vision del Sol desde un chico parte del Tierra, total o parcialmente. Ta ocurri tal alineacion aproximadamente cada seis maga mes, durante el estacion de maga eclipse na el de suyo fase de []nuevo luna]], cuando mas cercano el lunar orbital plano al terrestre. Na un total eclipse, ta oscurece por completo el Luna con el disco del Sol. Na maga parcial y anular eclipse, oculto un parte lang del Sol. Hinde como un lunar eclipse, visible desde cualquier lugar del nocturno lado del Tierra, visible un solar eclipse de un relativamente chico area del mundo lang. Poreso, masquen ta ocurri maga total solar eclipse na algun lugar del Tierra cada 18 maga mes na promedio, ta recurri ellos na algun lugar una vez cada 360 a 410 maga año lang.
Si perfectamente circular el orbita del Luna, na el mismo orbital plano como el del Tierra, ay ocurri un total solar eclipse cada mes al nuevo luna. Na cambio, debio al inclinacion orbital del Luna (de alrededor de 5 maga grado con respecto al orbita del Tierra) na manada situacion hinde ta cae el de suyo sombra na el Tierra. Poreso durante maga estacion de maga eclipse lang ta ocurri maga solar (y lunar) eclipse, cosa resulta na al menos dos, y hasta cinco, maga solar eclipse cada año, hinde mas de dos del cual puede queda total. Mas raro el maga total eclipse kay ta requeri ellos con un mas preciso alineacion entre el maga centro del Sol y el Luna, y kay tiene vez demasiao chico el aparente tamaño del Luna para completamente cubri con el Sol.
Un eclipse es un natural fenomeno. Na algun maga antiguo y moderno cultura, atribuio el maga eclipse a maga sobrenatural causa o considerao como maga mal presagio. Ya empeza el maga prediccion por parte del maga astronomo sobre el maga eclipse na China tan temprano como el aca-4 siglo AEC, mientras que ahora predecible con gran precision maga eclipse maga ciento de maga año na el futuro.
Mira directamente al Sol (el sungazing) ay causa con permanente daño del maga ojo, ansina que necesario especial ocular proteccion o maga indirecto tecnica de visualizacion para avista con un solar eclipse. Visible sin proteccion el total fase de un total solar eclipse lang. Ta viaja maga entusiasta, conocio como maga perseguidor de maga eclipse, a maga remoto lugar para mira con maga solar eclipse.
Maga tipo
[revisa | revisa codigo]
Hay cuatro maga tipo de maga solar eclipse:
- Ta ocurri un total eclipse na promedio cada 18 maga mes,[lower-alpha 1] cuando ta oscurece el oscuro silueta del Luna por completo con el intensamente brillante luz del Sol, permitiendo que visible el mucho mas tenue solar corona. Durante cualquier eclipse, ta ocurri el totalidad, na el mejor del maga caso, sólo na un estrecho via lang na el superficie del Tierra. Llamao este estrecho via el paso de totalidad.
- Ta ocurri un anular eclipse un vez cada uno o dos maga año, cuando exactamente alineao el Sol y el Luna con el Tierra ,pero mas chico el tamaño aparente de la Luna que el del Sol. Poreso ta aparece el Sol como un muy brillante anillo, o circular corona, rodeando con el oscuro disco del Luna.
- Ta cambia un hibrido eclipse (tambien conocio como un anular/total eclipse) entre un total y anular eclipse. Na algun maga punto del superficie del Tierra, ta aparece ele como un total eclipse, mientras que na otro maga punto ta aparece ele como anular. Comparativamente raro el maga hibrido eclipse.
- Ta ocurri un parcial eclipse dos maga vez al año, mas o menos, cuando hinde exactamente alineao el Sol y el Luna con el Tierra, y parcialmente lang ta oscurece el Luna con el Sol. Usualmente observable este fenomeno de un gran parte del Tierra fuera del trayectoria de un anular o total eclipse. Sin embargo, observable algun maga eclipse como un parcial eclipse lang, kay ta pasa el umbra por encima del maga polar region del Tierra y nunca ta cruza con el superficie del Tierra. Practicamente imperceptible el maga parcial eclipse na maga termino de brillo del Sol, kay necesario cobertura de mas del 90% para nota con cualquier oscurecimiento na absoluto. Incluso al 99%, hinde mas oscuro que el civil crepusculo.
El distancia del Sol al Tierra es aproximadamente 400 maga vez el distancia del Luna, y el diametro del Sol es aproximadamente 400 maga vez el diametro del Luna. Debido a que mas o menos igual este dos maga razon, ta aparece el Sol y el Luna, como visto desde el Tierra, aproximadamente del mismo tamaño: aproximadamente 0,5 maga grado de arco na angular medida.
Un poco eliptico el orbita del Luna alrededor del Tierra, al igual que el orbita del Tierra alrededor del Sol. Poreso ta varia el maga aparente tamaño del Sol y el Luna. El magnitud de un eclipse es el razon del aparente tamaño del Luna al aparente tamaño del Sol durante un eclipse. Puede un eclipse que ta ocurri cuando ta queda el Luna cerca del de suyo mas cercano distancia al Tierra (es deci, cerca del de suyo perigeo) queda un total eclipse kay ay parece el Luna lo suficientemente grande como para cubri completamente con el brillante disco, o el fotosfera, del Sol; ta tene un total eclipse con un magnitud mayor o igual a 1.000. Conversamente, puede un eclipse que ta ocurri cuando ta queda el Luna cerca del de suyo mas lejano distancia al Tierra (es deci, cerca del de suyo apogeo) queda un anular eclipse lang, kay ay parece el Luna un poco mas chico que el Sol; el magnitud de un anular eclipse es menos de 1.
Ta ocurri un hibrido eclipse cuando ta cambia el magnitud de un eclipse durante el evento de menos a mayor que uno, ansina que ta parece total el eclipse na maga lugar mas cercano al medio punto, y anular na otro maga lugar mas cercano al principio y al final, kay ligeramente mas alejao de la Luna el maga lado del Tierra. Ta tene tal maga eclipse con un extremadamente estrecho ancho de camino; ya tarde el totalidad del hibrido eclipse del 20 de abril de 2023 mas de un minuto na cuanto punto a lo largo del camino del totalidad. Como un focal punto, casi cero el anchura y el duracion del totalidad y el anularidad, na el maga punto donde ta ocurri el maga cambio entre ambo maga.
Debio a que eliptico tambien el orbita del Tierra alrededor del Sol, similarmenta ta varia durante todo el año el distancia del Tierra al Sol. Ta afecta esto con el aparente tamaño del Sol del mismo modo, pero hinde tanto como el variable distancia del Luna al Tierra. Cuando ta acerca el Tierra al de suyo mas lejano distancia del Sol a maga principio de julio, algo mas probable un total eclipse, mientras que ta favorece el maga condicion con un anular eclipse cuando ta acerca el Tierra al de suyo mas cercano distancia al Sol a maga principio de enero.
Terminologia para central eclipse
[revisa | revisa codigo]Plantilla:Multiple image Frecuentemente usao central eclipse como un generico termino para un total, anular o hibrido eclipse. Hinde completamente correcto este termino, sin embargo: el definicion de un central eclipse es un eclipse durante el cual ta toca el central linea del umbra con el superficie del Tierra. Posible, masquen extremadamente raro, que ta cruza parte del umbra con el Tierra (creando ansina con un anular o total eclipse) pero hinde el de suyo central linea. Llamao esto un hinde central total o anular eclipse. Gamma es un medida del centralidad con el que ta incidi el sombra. El ultimo (umbral masquen) hinde central solar eclipse fue el solar eclipse del 29 de abril de 2014. Este un anular eclipse. Ay queda el proximo el solar eclipse del 9 de abril de 2043.
Llamao el maga visual fase observao durante un total eclipse:
- Primer contacto — Exactamente tangencial el limbo (borde) del Luna al limbo del Sol.
- Segundo contacto — Ta empeza con maga perla de si Baily (causao por el luz que ta brilla a traves del maga valle na el superficie del Luna) y el efecto de un anillo de maga diamante. Cubierto casi el entero disco.
- Totalidad — Ta oscurece el Luna con todo el disco del Sol y visible el solar corona lang.
- Tercer contacto — Ta queda visible el primer brillante luz y ta aleja del observador el sombra del Luna. De nuevo observable un anillo de maga diamante.
- Cuarto contacto — Hinde ta superpone pa el posterior borde del Luna con el solar disco y ta termina el eclipse.
Maga prediccion
[revisa | revisa codigo]Geometria
[revisa | revisa codigo]
Ta mostra el diagrama al izquierda con el alineacion del Sol, el Luna y el Tierra durante un solar eclipse. El oscuro gris region entre el Luna y el Tierra es el umbra, donde ta oscurece el Luna con el Sol por completo. El chico área donde ta toca el umbra con el superficie del Tierra es donde visible un total eclipse. El mas grande claro gris area es el penumbra, na el que visible un parcial eclipse. Ay mira un observador na el antumbra, el area de sombra mas alla del umbra, con un anular eclipse.
Inclinao el orbita del Luna alrededor del Tierra na un angulo de poco mas de 5 maga grado con respecto al plano del orbita del Tierra alrededor del Sol (el ecliptica). Debio a esto, na el momento del nuevo luna, a menudo ay pasa el Luna al norte o al sur del Sol. Puede un solar eclipse ocurri cuando ta ocurri un nuevo luna cerca de uno del maga punto (conocio como maga orbital nodo) donde ta cruza el orbita del Luna con el ecliptica.
Como mencionao anteriormente, eliptico el orbita del Luna. Puede el distancia del Luna al Tierra varia alrededor de un 6% del de suyo medio valor. Poreso, ta varia el aparente tamaño del Luna con el de suyo distancia del Tierra, y ta llega este efecto al diferencia entre maga total y anular eclipse. Tambien ta varia el distancia del Tierra al Sol durante el año, pero este un menor efecto. Na promedio, ta parece el Luna un poco mas chico que el Sol visto desde el Tierra, por lo que anular el mayoria (alrededor del 60%) del maga central eclipse. Cuando ta queda el Luna mas cerca al Tierra que el promedio (cerca del de suyo perigeo) lang, ta ocurri un total eclipse.
| Luna | Sol | |||
|---|---|---|---|---|
| Al perigeo (mas cercano) |
Al apogeo (mas lejano) |
Al perihelio (mas cercano) |
Al afelio (mas lejano) | |
| Medio radio | 1,737.10 km (1,079.38 mi) |
696,000 km (432,000 mi) | ||
| Distancia | 363,104 km (225,622 mi) |
405,696 km (252,088 mi) |
147,098,070 km (91,402,500 mi) |
152,097,700 km (94,509,100 mi) |
| Angular diametro |
33' 30" (0.5583°) |
29' 26" (0.4905°) |
32' 42" (0.5450°) |
31' 36" (0.5267°) |
| Aparente tamaño a escala |
|
|
|
|
| Orden por decreciente aparente tamaño |
Primero | Cuarto | Segundo | Tercero |
Ta orbita el Luna con el Tierra na aproximadamente 27.3 maga dia, na relacion con un fijo sistema de referencia. Conocio esto como el sideral mes. Sin embargo, durante un sideral mes, ya gira el Tierra parcialmente alrededor del Sol, haciendo que mas largo (que el sideral mes) el promedio tiempo entre un nuevo luna y el siguiente: aproximadamente 29.5 maga dia. Conocio esto como el sinodico mes y ta corresponde a cosa comunmente llamado el lunar mes.
Ta cruza el Luna de sur a norte del ecliptica na el de suyo ascendente nodo, y viceversa na el de suyo descendente nodo. Sin embargo, gradualmente ta move el maga nodo del orbita del Luna na un retrogrado movimiento, debido al accion del gravedad del Sol sobre el movimiento del Luna, y ta dale ellos con un completo vuelta cada 18.6 maga año. Ta significa este regresion que algo mas corto (que el sideral mes) el tiempo entre cada paso del Luna por el ascendente nodo. Llamao este periodo el nodico o draconico mes.
Finalmente, ta hacia adelante o ta precese el perigeo del Luna na el de suyo orbita y ta dale con un completo vuelta na 8.85 maga año. Algo mas largo (que el sideral mes) el tiempo entre un perigeo y el siguiente. Llamao esto el anomalistico mes.
Ta cruza el orbita del Luna con el ecliptica na el de suyo dos maga nodo, separao por 180 maga grado. Poreso, ta ocurri el nuevo luna cerca del maga nodo na dos maga periodo del año con un aproximao diferencia de seis maga mes (173.3 maga dia), conocio como maga estacion de maga eclipse, y firme ay tiene por lo menos un solar eclipse durante este maga periodo. Tiene vez ta ocurri el nuevo luna bastante cerca de un nodo, durante dos maga consecutivo mes, para eclipsa con el Sol na ambo maga ocasion na dos maga parcial eclipse. Ta significa esto que, na cualquier año, firme ay tiene por lo menos dos maga solar eclipse, y puede tiene hasta cinco.
Posible un eclipse cuando ta queda el Sol dentro de alrededor de 15 a 18 maga grado de un nodo (10 a 12 maga grado para maga central eclipse). Esto un limite de maga eclipse, expresao na maga rango debio a que ta varia durante el año el maga aparente tamaño y velocidad del Sol y el Luna. Na el tiempo que ta tarda el Luna na volve a un nodo (draconico mes), ya move el aparente posicion del Sol alrededor de 29 maga grado, na relacion con el maga nodo. Debio a que ta crea el limite de maga eclipse con un ventana de oportunidad de hasta 36 maga grado (24 maga grado para maga central eclipse), posible que ta ocurri maga parcial eclipse (o raramente un parcial y un central eclipse) na maga consecutivo mes.
Paso
[revisa | revisa codigo]
Durante un central eclipse, ta move el umbra (o antumbra, na el caso de un anular eclipse) del Luna con rapidez de oeste a este a traves del Tierra. Tambien ta gira el Tierra de oeste a este, a unos 28 km/min al ecuador, pero debio a que ta move el Luna na el mismo direccion que el rotacion del Tierra a unos 61 km/min, casi firme ta parece el umbra move na un direccion aproximadamente oeste–este a traves de un mapa del Tierra. El de suyo total velocidad es el orbital velocidad del Luna menos el velocidad de rotacion del Tierra.
Ta varia el anchura del trayectoria de un central eclipse segun el maga relativo aparente diametro del Sol y del Luna. Na el maga mas favorable circunstancia, cuando ta ocurri un total eclipse muy cerca del perigeo, puede el trayectoria tene con un anchura de hasta 267 km, y puede el totalidad dura mas de 7 maga minuto. Fuera del central trayectoria, visible un parcial eclipse sobre un mucho mas grande area del Tierra. Tipicamente, ta tene el umbra con entre 100 y 160 km de ancho, mientras que ta supera el penumbral diametro con 6400 km.
Usao maga besseliano elemento para predeci si un eclipse parcial, anular o total (o anular/total), ademas del maga circunstancia de un eclipse a algun ubicacion.
Puede maga calculo mediante maga besseliano elemento determina con el exacto forma del sombra del umbra na el superficie del Tierra. Pero el maga longitud na el terrestre superficie donde ay cae el umbra es un funcion del rotacion del Tierra, y el cantidad por el cual ya ralentiza aquel rotacion con el paso del tiempo. Usao un numero llamao ΔT na el prediccion de maga eclipse para tene na cuenta con este desaceleracion. Mientras que ta ralentiza el Tierra, ta aumenta ΔT. Estimable lang ΔT para maga fecha na el futuro kay ta ralentiza irregularmente el rotacion del Tierra. Ta significa esto que, masquen posible predeci que ay ocurri un total eclipse na algun fecha na el lejano futuro, hinde posible predeci na el lejano futuro con el maga longitud donde total dicho eclipse. Ta permiti maga historico registro de maga eclipse con maga estimacion del maga pasao valor de ΔT y, por lo tanto, del rotacion del Tierra.
Duracion
[revisa | revisa codigo]Ta determina el maga siguiente factor con el duracion de un total solar eclipse (en orden de decreciente importancia).
- Ta queda el Luna casi exactamente na el perigeo (cosa ta hace que el de suyo angular diametro lo mas grande posible).
- Ta queda el Tierra muy cerca del afelio (mas lejos del Sol na el de suyo eliptico orbita, cosa hace que el de suyo angular diametro casi el mas chico posible).
- Ta queda el medio punto del eclipse muy cerca del ecuador del Tierra, donde el velocidad de rotacion mayor y mas cerca del velocidad del lunar sombra moviendo sobre el superficie de Tierra.
- Ta alinea el vector, del trayectoria del eclipse na el medio punto del eclipse, con el vector de rotacion del Tierra (es deci, hinde diagonal sino hacia el este).
- Ta queda el medio punto del eclipse cerca del subsolar punto (el parte del Tierra mas cercano al Sol).
El mas largo eclipse calculao hasta el momento sera el solar eclipse del 16 de julio de 2186 (con un maximo duracion de 7 maga minuto 29 maga segundo sobre el norte de Guyana).
Ocurrencia y maga ciclo
[revisa | revisa codigo]
Un total solar eclipse un raro evento, recurrente na algun lugar del Tierra cada 18 maga mes en promedio, masquen recurrente (segun maga estimacion) na algun especifico ubicacion cada 360–410 maga año lang na promedio. Ta dura el total eclipse durante un maximo de unos minutos na cualquier lugar kay ta move el umbra del Luna hacia el este a mas de 1,700 km/h. Actualmente nunca puede el totalidad dura mas de 7 maga minuto y 32 maga segundo. Ta cambia este valor a lo largo del maga milenio y actualmente ta disminui. Na el aca-8 milenio, el mas largo teoricamente posible total eclipse sera de menos de 7 maga minuto y 2 maga segundo. El ultimo ocurrencia de un eclipse de mas de 7 maga minuto fue el [[solar eclipse del 30 de junio de 1973) (7 maga minuto y 3 maga segundo). Ya logra el maga observador a bordo de un supersonico avion Concorde estira con el totalidad de este eclipse a 74 maga minuto volando a lo largo del trayectoria del umbra del Luna. El proximo total eclipse, superando con siete maga minuto de duracion, el solar eclipse del 25 de junio de 2150. El mas largo total solar eclipse durante el periodo de 11,000 maga año desde 3000 AEC hasta por lo menos 8000 EC el solar eclipse del 16 de julio de 2186, cuando ay dura el totalidad durante 7 maga minuto y 29 maga segundo. Para comparacion, el mas largo total eclipse del aca-20 siglo, con un duracion de 7 maga minuto y 8 maga segundo, fue el solar eclipse del 20 de junio de 1955, y nuay ningun total solar eclipse de mas de 7 maga minuto na el aca-21 siglo.
Posible el prediccion de otro maga solar eclipse mediante maga ciclo de maga eclipse. Seguro el saros el mejor conocio y uno del maga mas preciso. Ta dura un saros durante 6,585.3 maga dia (poco mas de 18 maga año) que ta significa que, despues de este periodo, ay ocurri un practicamente identico eclipse. El mas notable diferencia un desplazamiento hacia el oeste de unos 120° de longitud (debio al 0.3 maga dia) y un poco de latitud (norte–sur para el maga impar ciclo, al inverso para el maga par ciclo). Firme ta empeza un serie de saros con un parcial eclipse cerca de uno del maga polar region del Tierra, entonces ta desplaza sobre el globo a traves de un serie de maga anular o total eclipse, y ta termina con un parcial eclipse na el opuesto polar region. Ta dura un serie de saros durante de 1226 a 1550 maga año y de 69 a 87 maga eclipse, alrededor de 40 a 60 siendo central.
Frecuencia al año
[revisa | revisa codigo]Cada año ta ocurri entre dos y cinco maga solar eclipse, y por lo menos uno durante cualquier estacion de maga eclipse. Desde el institucion del gregoriano calendario na 1582, el maga año que ya tene con cinco maga solar eclipse fueron 1693, 1758, 1805, 1823, 1870 y 1935. El proximo ocurrencia sera 2206. Na promedio, hay alrededor de 240 maga solar eclipse cada siglo.
| 5 de enero | 3 de febrero | 30 de junio | 30 de julio | 25 de diciembre |
|---|---|---|---|---|
| Parcial (sur) |
Parcial (norte) |
Parcial (norte) |
Parcial (sur) |
Anular (sur) |
 Saros 111 |
 Saros 149 |
 Saros 116 |
 Saros 154 |
 Saros 121 |
Ultimo totalidad
[revisa | revisa codigo]Visto el maga total solar eclipse na el Tierra gracias a un fortuito combinacion de maga circunstancia. Incluso na el Tierra, el diversidad de maga eclipse familiar para la gente de hoy es un temporal (na un geologico temporal escala) fenomeno. Maga ciento de maga millon de maga año na el pasao, mas cerca el Luna al Tierra y poreso mas grande el de suyo aparente tamaño, ansina que total o parcial cada solar eclipse, y nuay ningun anular eclipse. Debio al aceleracion de marea, ta queda el orbita, del Luna alrededor del Tierra, aproximadamente 3.8 cm mas distante cada año. Maga millon de maga año na el futuro, demasiao distante el Luna para oclui completamente con el Sol, y hinde ay ocurri ningun total eclipse. Na el mismo periodo de tiempo, mas brillo el Sol, y mas grande el de suyo aparente tamaño. Maga estimacion del momento na que incapaz el Luna de ocluir con todo el Sol (visto desde el Tierra) son entre 650 maga million y 1.4 maga mil millon maga año na el futuro.
Maga historico eclipse
[revisa | revisa codigo]
El maga historico eclipse un muy valioso recurso para el maga historiador, kay ta permiti ellos con el preciso datacion de maga historico evento, del que deducible otro maga fecha y maga antiguo calendario. Ta queda el mas antiguo registrao solar eclipse na un tablilla de barro incuntrao na Ugarit, na el actual Siria, con dos maga plausible fecha generalmente citao: el 3 de mayo de 1375 AEC o el 5 de marzo de 1223 AEC, el ultimo favorecio por maga reciente erudito sobre el tema. Ta queda el Eclipse de Bur Sagale (el 15 de junio de 763 AEC), mencionao na un asirio texto, importante para el cronologia del Antiguo Proximo Oriente. Hay otro maga reclamo para fecha con maga mas temprano eclipse. Supuestamente ya decapita el legendario chino rey si Zhong Kang con dos maga astronomo, si Hsi y si Ho, por hinde predeci con un eclipse hace 4000 maga año. Baka el mas temprano reclamo hinde demostrao pa es el del arqueologo si Bruce Masse, que putativamente ta vincula con un eclipse que ya ocurri el 10 de mayo de 2807 AEC y un posible astronomico impacto na el Indico Oceano sobre el base de cuanto antiguo mito de un universal diluvio que ta menciona con un total solar eclipse.
Interpretao el maga eclipse como maga presagio. Ya escribi el antiguo griego historiador si Herodoto que ya predeci si Tales de Mileto con un eclipse que ya ocurri durante un batalla entre el maga medo y el maga lidio. Ya depone ambo maga bando con el maga arma y ya declara con el paz como resultao del eclipse. Incierto pa el exacto eclipse involucrao, masquen ya estudia el tema maga centenar de maga antiguo y moderno autoridad. Ya ocurri un probable candidato el 28 de mayo de 585 AEC, seguro cerca del rio Halis na Asia Menor.
Ya registra si Herodoto con un eclipse —tradicionalmente datao na el año 480— antes de que ya parti si Jerjes para el de suyo expedicion contra Grecia. Ya vincula si John Russell Hind con este a un anular solar eclipse a Sardes el 17 de febrero de 478 AEC. Alternativamente, visible un parcial eclipse desde Persia el 2 de octubre de 480 AEC.
Tambien ta reporta si Herodoto con un solar eclipse na Esparta durante el segundo medico guerra. Hinde ta coincidi exactamente el fecha del eclipse (el 1 de agosto de 477 AEC) con el maga convencional fecha del invasion aceptao por el maga historiador.
Alrededor de 720 AEC ta empeza el maga chino registro de maga eclipse. Na el aca-4 siglo AEC ya describi el chino astronomo si Shi Shen con el prediccion de maga eclipse mediante el uso del maga relativo posicion del Luna y el Sol.
Ya tiene maga intento de establece con el exacto fecha del Santo Viernes asumiendo que el oscuridad descrio na el crucifixion de si Jesus fue un solar eclipse. Hinde ya arroja este investigacion con maga concluyente resultao, y registao el Santo Viernes na el Pesaj (celebrao durante un lleno luna). Ademas, ya dura el oscuridad desde al sexto hora hasta el noveno, y mucho, mucho mas largo tres maga hora que el superior limite de ocho maga minuto para el totalidad de cualquier solar eclipse.
Segun maga cronica de aquel entonces, ya coincidi un eclipse el mayo de 664 con el inicio del plaga de 664 na el maga britanica isla. Na el occidental hemisferio, hay poco maga fiable registro de maga eclipse antes de 800 EC, hasta el advenimiento del maga arabe y monastico observacion na el temprano medieval periodo. Ya escribi el cairota astronomo si Ibn Yunus que el calculo del maga eclipse fue uno del maga numeroso cosa que ta conecta con astronomia y el islamico ley, kay ya permiti sabe cuando posible un especial rezo. Realizao na Constantinopla na 969 EC El primer registrao observacion del solar corona.
Realizao na Francia na 1706 El primer conocio telescopico observacion de un total solar eclipse. Nueve maga año mas tarde, ya predeci y ya observa precisamente el ingles astronomo si Edmund Halley con el solar eclipse del 3 de mayo de 1715. Na maga mediao del aca-19 siglo, ya mejora el cientifico comprension del Sol mediante maga observacion del solar corona durante maga solar eclipse. Identificao el corona como parte del atmosfera del Sol na 1842, y tomao el primer fotografia (o daguerrotipia) de un total eclipse durante el solar eclipse del 28 de julio de 1851. Realizao maga espectroscopico observacion durante el solar eclipse del 18 de agosto de 1868, cosa ya ayuda a determina con el quimico composicion del Sol. Ya resumi si John Fiske con maga mito sobre tal solar eclipse na el de suyo libro de 1872 Myth and Myth-Makers (El mito y el maga creador de maga mito),
| the myth of Hercules and Cacus, the fundamental idea is the victory of the solar god over the robber who steals the light. Now whether the robber carries off the light in the evening when Indra has gone to sleep, or boldly rears his black form against the sky during the daytime, causing darkness to spread over the earth, would make little difference to the framers of the myth. To a chicken a solar eclipse is the same thing as nightfall, and he goes to roost accordingly. Why, then, should the primitive thinker have made a distinction between the darkening of the sky caused by black clouds and that caused by the rotation of the earth? He had no more conception of the scientific explanation of these phenomena than the chicken has of the scientific explanation of an eclipse. For him it was enough to know that the solar radiance was stolen, in the one case as in the other, and to suspect that the same demon was to blame for both robberies. | el mito de Hercules y Caco, el fundamental idea es el victoria del solar dios sobre el ladron que ta roba con el luz. Ahora poco ta importa al maga artifice del mito si ta lleva el ladron con el luz por la noche, cuando ya anda si Indra a dormi, o ta levanta audazmente con el de suyo negro forma contra el cielo durante el dia, haciendo que ta extende el maga tiniebla sobre el tierra. Para un gallo un solar eclipse es lo mismo como el anochecer, y ta anda ele a posa na consecuencia. ¿Por que, entonces, debe el primitivo pensador hace con un distincion entre el oscurecimiento del cielo causao por el maga negro nube y el causao por el rotacion del Tierra? Hinde ya tene ele con mas concepcion del cientifico explicacion de este maga fenomeno que el que ta tene el gallo del cientifico explicacion de un eclipse. Para ele ya basta sabe que robao el solar resplandor, na un caso como na el otro, y sospecha que el mismo demonio fue el culpable de ambos robos. |
Observacion
[revisa | revisa codigo]Puede el directo observacion del fotosfera del Sol (el brillo disco del Sol mismo), hasta por unos segundos, causa con permanente daño al retina del ojo, debio al intenso visible e invisible radiacion que ta emiti el fotosfera. Puede este daño causa un deterioro del vision, hasta el ceguera. Ta carece el retina de ningun sensibilidad al dolor, y puede el maga efecto del daño na el retina hinde aparece durante maga hora, ansina que nuay ningun aviso de que ta ocurri un herida.
Bajo maga normal condicion, tan brillo el Sol que dificil el directo observacion. Sin embargo, durante un eclipse, con tanto del Sol cubierto, mas facil y mas tentador mira conele. Tan peligro durante un eclipse como fuera de un eclipse el observacion del Sol, excepto durante el breve periodo de totalidad, cuando completamente cubierto el disco del Sol (ta ocurri el totalidad durante un total eclipse lang y muy brevemente lang, y hinde ta ocurri para nada durante un parcial o anular eclipse). Extremadamente peligroso mira con el disco del Sol a traves de cualquier tipo de optico ayuda (maga binocular, un telescopio o incluso el optico visor de un camara) y puede causa irreversible ocular daño na un fraccion de segundo.
Maga parcial y anular eclipse
[revisa | revisa codigo]Plantilla:Multiple image Mira con el Sol durante maga parcial y anular eclipse (y durante maga total eclipse fuera del breve periodo de totalidad) ta requeri con especial ocular proteccion, o maga indirecto metodo de visualizacion, para evitar con daño al maga ojo. Observable el disco del Sol mediante adecuao filtracion para bloquea con el dañino parte del solar radiacion. Peligroso pa el visualizacion del Sol mediante maga gafa. Hay que usa con maga correctamente diseñao y certificao solar filtro para mira directamente con el disco del Sol. Na particular, hay que evita con maga filtro de propia fabricacion utilizando con maga comun objeto como un disquete extraio del de suyo estuche, un compacto disco, un negro filme de diapositiva, ahumao vidrio, etc.
El indirecto proyeccion el mas legitimo modo de mira con el disco del Sol. Factible esto proyectando un imagen del disco na un blanco hoja de papel o cartulina usando un par de maga binocular (con uno del maga lente cubierto), un telescopio u otro pieza de carton con un chico agujero (aproximadamente 1 mm de diametro), a menudo llamada estenopeico camara. Con seguridad mirable el proyectao imagen del Sol; usable este tecnica para observa con maga solar mancha, ansina como maga eclipse. Pero hay que resisti con el tentacion de mira por el proyector (telescopio, estenopeico, etc.) directamente. Tambien usable un colador de cocina con maga chico agujero para proyecta con multiple imagen del parcialmente eclipsao Sol na el suelo o na un pantalla de visualizacion. Tambien posible mira con el disco del Sol na un pantalla de visualizacion de vodeo (proporcionao por un camara de video o un digital camara), masquen puede el camara mismo queda dañao por directo exposicion al Sol. Na el trayectoria del parcial eclipse, hinde visible el solar corona ni el casi completo oscurecimiento del cielo. Sin embargo, dependiendo del cantidad de disco del Sol oscurecio, baka visible un poco de oscurecimiento. Si oscurecio tres maga cuarto parte o mas del Sol, observable un efecto por el cual ta parece tenue el luz del dia, como si nublao el cielo, pero ta proyecta pa el maga objeto con maga nitido sombra.
Totalidad
[revisa | revisa codigo]Plantilla:Multiple image Cuando ta queda muy chico el encogiendo visible parte del fotosfera, ay ocurri maga perla de si Baily, kay puede pa el luz del Sol alcanza al Tierra mediante maga lunar valle. Entonces ta empeza el totalidad con un efecto de un anillo de maga diamante, el ultimo brillante destello de solar luz.
Directamente observable el total fase de un solar eclipse, cuando lang ta cubri el Luna por completo con el fotosfera del Sol, ni antes ni despues del totalidad. Durante este periodo, demasiao tenue el Sol para queda visible mediante maga filtro. Visible el tenue solar corona, ademas del cromosfera, el maga solar prominencia y baka hasta un solar erupcion. Al fin del totalidad, ay ocurri el maga mismo efecto na orden inverso, y na el oculto caro del Luna.
Persecucion de maga eclipse
[revisa | revisa codigo]Ta persegui un dedicao grupo con el maga solar eclipse dondaquiera ta ocurri na el Tierra. Un persona que ta persegui con maga eclipse es un umbrafilo, que ta significa un amante de maga sombra. Ta viaja el maga umbrafilo para el maga eclipse y ta utiliza con maga vario herramienta para ayuda a mira con el Sol, incluio maga solar visor, tambien conocio como maga gafa de eclipse, ademas de maga telescopio.
Fotografia
[revisa | revisa codigo]
Posible fotografia con un eclipse con maga bastante comun equipo de camara. Para que facilmente visible el disco del Sol/Luna, necesario un objetivo de largo foco (por lo menos 200 mm para un camara de 35 mm) con un bastante alto magnificacion, y para que ta llena el disco con el mayoria del marco, necesario un objetivo mas largo que 500 mm.Al igual que con el directo vision del Sol, mira conele a traves del optico visor de un camara puede produci con daño na el retina, ansina que hay que queda cuidadoso. Necesario maga solar filtro para el digital fotografia hasta si hinde usao un optico visor. Hinde dañino (para el humano ojo) el uso del funcion de vision na directo de un camara o de un electronico visor, masquen baka puede el maga rayo del Sol daña irreparablemente con el maga digital sensor de imagen a menos que cubierto el lente por un correctamente diseñao solar filtro.
Maga particular observacion, fenomeno e impacto
[revisa | revisa codigo]Plantilla:Multiple image Ta proporciona un total solar eclipse con un raro oportunidad para observa con el solar corona (el exterior capa del atmosfera del Sol). Normalmente hinde visible esto, kay mucho mas brillo el fotosfera que el corona. De acuerdo con el punto alcanzao na el solar ciclo, puede el corona aparece chico y simetrico, o grande y borroso. Muy dificil predeci con esto na adelante.
Ta inclui maga fenomeno asociao con maga eclipse con maga franja de sombra (tambien conocio como maga volante sombra), similar a maga sombra al fondo de un piscina. Ta ocurri antes o despues del totalidad lang, cuando ta actua un estrecho solar creciente como un anisotropico fuente de luz. Mientras que ta filtra el luz por maga hojas de maga pono durante un parcial eclipse, ta crea el maga superpuesto hojas con maga natural estenopeica, mostrando con maga mini eclipse na el suelo.
Maga observacion de 1919
[revisa | revisa codigo]
Ya ayuda el observacion del total solar eclipse del 29 de mayo de 1919 a confirma con el teoria del general relatividad de si Albert Einstein. Comparando con el aparente distancia entre el maga estrella del constelacion de Tauro, con y sin el Sol entre ellos, ya afirma si Arthur Eddington que confirmao el maga teorico prediccion sobre el maga gravitatorio lente. Durante el totalidad lang (kay luego visible el maga estrella) posible el observacion con el Sol entre el maga estrella. Masquen cerca del maga experimental limite (de precision na aquel entonces) el maga observacion de si Eddington, ya confirma mas trabajo na el segundo mitad del aca-20 siglo con el de suyo maga resultao.
Maga gravitatorio anomalia
[revisa | revisa codigo]Ta existi un largo historia de maga observacion de maga relacionao fenomeno con el gravedad durante el maga solar eclipse, especialmente durante el periodo de totalidad. Na 1954, y de nuevo na 1959, ya reporta si Maurice Allais con maga observacion de maga extraño e inexplicable movimiento durante el maga solar eclipse. Controversial pa el realidad de este fenomeno, denominao el efecto Allais. Similarmente, na 1970, ya observa Saxl y Allen con el repentino cambio na el movimiento de un pendulo de torsion; denominao este fenomeno el efecto Saxl.
Ya sugeri maga observacion durante el solar eclipse de 1997 por si Wang et al con un posible efecto de gravitatorio blindaje, que ya genera con debate. Na 2002, ya publica si Wang y un colaborador con un detallao analisis del maga dato, que ya sugeri que inexplicable pa el fenomeno.
Maga eclipse y maga transito
[revisa | revisa codigo]Na principio, posible el simultaneo ocurrencia de un solar eclipse y un transito de un planeta. Pero extremadamente raro este maga evento debio al de ellos maga breve duracion. Ay ocurri el 5 de julio de 6757 el proximo anticipao simultaneo occurrencia de un solar eclipse y un transito de Mercurio, y ay ocurri el 5 de abril de 15232 un solar eclipse y un transito de Venus.
Mas comun, pero infrecuente pa, un conjuncion de un planeta (especialmente, pero hinde lang, Mercurio o Venus) al hora de un total solar eclipse, na cuyo caso visible el planeta muy cerca del Sol eclipsao, cuando sin el eclipse ta desaparece ele na el resplandor del Sol. Na el pasao, ya hipotetiza algun maga cientifico con el existencia de un planeta (a menudo llamao Vulcano) incluso mas cerca del Sol que Mercurio. El unico modo de confirma con el de suyo existencia fue un observacion de ello na transito o durante un total solar eclipse. Sin embargo, nunca incuntrao tal evidencia, y ta explica ya el general relatividad con el maga observacion que ya lleva con el maga astronomo a sugeri con el posible existencia de Vulcano.
Maga artificial satelite
[revisa | revisa codigo]
Puede tambien el maga artificial satelite frente al Sol visto desde el Tierra, pero hinde lo suficientemente grande ninguno para causa con un eclipse. Al altitud del Internacional Espacial Estacion, por ejemplo, necesita un objeto tene un anchura de 3.35 km, mas o menos, para borra con el Sol por completo. Dificil observa con tal maga transito, kay muy chico el zona de visibilidad. Ta pasa el satelite sobre el cara del Sol na aproximadamente un segundo, por lo general. Al igual que con el transito de un planeta, hinde ay ocurri el tiniebla.
Hinde sujeto al maga climatico condicion el maga observacion de maga eclipse desde maga espacial nave o maga artificial satelite que ta orbita sobre el terrestre atmosfera. Ya observa el tripulacion de Gemini 12 con un total solar eclipse desde el exterior espacio na 1966. Visible desde Mir el parcial fase del solar eclipse del 11 de agosto de 1999.
Impacto
[revisa | revisa codigo]El solar eclipse del 20 de marzo de 2015 fue el primer ocurrencia de un eclipse que, segun el maga estimacion, ya puede tene con un significativo impacto na el sistema electrico, y ya toma el electrico sector con maga medida para mitiga con cualquier impacto. Estimao que ya tene el maga sincrono area, de continental Europa y Gran Bretaña, con alrededor de 90 maga gigavatio de solar energia, y estimao que ya disminui temporalmente el produccion por hasta 34 GW na comparacion con un dia de despejao cielo.
Puede el maga eclipse causa que ta disminui el temperatura por 3 °C, con un potencial concurrente disminucion del eolico energia mientras que reducio el maga viento por 0.7 metro por segundo.
Además del caida na el nivel de luz y el temperatura del aire, ta cambia el maga animal con el de ellos comportamiento durante el totalidad. Por ejemplo, ta volve el maga pajaro y el maga ardilla al de ellos maga nido y ta canta el maga grillo.
Maga reciente y proximo solar eclipse
[revisa | revisa codigo]
Ta ocurri maga eclipse durante un estacion de maga eclipse lang, cuando cerca el Sol del ascendente o descendente nodo del Luna. Ta separa uno, cinco o seis maga lunacion (sinodico mes) con cada eclipse, y ta separa 173.3 maga dia —el medio tiempo que ta tarda el Sol na viaja de un nodo al siguiente— con el medio punto de cada estacion. Un poco menos de un natural año el periodo gracias al lento regresion del maga lunar nodo. Debio a que 223 maga sinodico mes son mas o menos igual a 239 anomalistico mes y 242 maga draconico mes, ta recurri maga eclipse con similar geometria cada 223 maga sinodico mes (alrededor de 6,585.3 maga dia). Este periodo (18 maga año y 11.3 maga dia) es un saros. Debio a que hinde identico 223 maga sinodico mes a 239 maga anomalistic mes o 242 maga draconico mes, hinde ta repeti sin cesa maga ciclo de maga saros. Ta empeza cada ciclo con el sombra del Luna cruzando con el Tierra cerca del polo norte o sur, y ta progresa maga subsiguiente evento hacia el otro polo hasta que hinde ta llega el sombra del Luna al Tierra y ta termina el serie. Numerao el maga ciclo de maga saros; actualmente, activo el maga ciclo 117 a 156.[cita requerida]Plantilla:Fix/category[clarification needed]
Mira tambien
[revisa | revisa codigo]- Maga lista de maga solar eclipse
- Apollo–Soyuz — El primer conjunto espacial vuelo entre el maga Estados Unidos y el Sovietico Union. Ya inclui el mision con un eclipse del Sol organizao por el modulo Apolo para permiti que toma el maga instrumento del Soyuz con fotografia del solar corona.
- Persecucion de maga eclipse — Viaje a maga eclipse para estudio y diversion.
- Ocultacion — Generico termino para el oclusion de un objeto por otro objeto que ta pasa entre ello y el observador, ansina revelando (por ejemplo) con el presencia de un exoplaneta orbitando con un distante estrella eclipsando conele visto desde el Tierra.
- Maga solar eclipse na el Luna — Eclipse del Sol por el planeta Tierra, visto desde el Luna.
- Lunar eclipse — Solar eclipse del Luna, visto desde el Tierra; el sombra proyectao sobre el Luna por dicho eclipse.
- Transito de Mercurio
- Transito de Venus — Paso del planeta Venus entre el Sol y el Tierra, visto desde el Tierra. Técnicamente, un eclipse parcial.
- Transito de Deimos na Marte
- Transito de Fobos na Marte
Maga nota
[revisa | revisa codigo]- ↑ Na cualquier lugar puede ele sucede solo una vez cada cuanto siglo.