Adolf Meyer (arquitecto)

Adolf Meyer

Biografía
Nacemento	17 de xuño de 1881 Mechernich, Alemaña
Morte	14 de xullo de 1929 (48 anos) Baltrum, Alemaña
Causa da morte	afogamento
Educación	Kunstgewerbeschule Düsseldorf (en)
Actividade
Ocupación	arquitecto, deseñador
Empregador	Bauhaus Städelschule (en)
Alumnos	Hedda Wiedersheim-Paul (en)

Fábrica Fagus, Alfeld.

Adolf Meyer, nado en Mechernich, Eifel, en 1881 e finado en Baltrum en 1929, foi un arquitecto alemán.

Carreira

Primeiros anos

Cursou os seus estudos na rexión de Eifel, en Köln e na Escola de Arte de Düsseldorf desde 1904, con Peter Behrens e Johannes Ludovicus Mattheus Lauweriks.

Primeiros traballos de arquitectura

En 1907, Behrens contratouno para traballar no seu estudio en Berlín. Entre 1909 e 1910, Meyer traballou para Bruno Paul e ese mesmo ano Walter Gropius contratouno como xerente no seu estudio en Neubabelsberg.

Fábrica Elektrizitätswerk, Frankfurt Gutleutstraße.

Profesor na Bauhaus

Da man de Gropius, foi profesor na Bauhaus entre 1919 e 1925, un centro de estudo cun revolucionario método de aprendizaxe, que reivindicaba as vangardas, a unidade entre arte e artesanía, ao xeito que os movementos do Arts & Crafts ou o Wchutemás de Moscova, e facía especial énfase na colaboración entre alumnos e docentes. Iso deu lugar a unha multiplicidade de estilos e producións, que derivou entre outras cousas no racionalismo na arquitectura moderna (en especial após a dirección de Mies van der Rohe e o exilio por causa do nazismo) e na formación de centros experimentais posteriores como a Escola de Ulm. Adolf Meyer foi responsábel da compilación e desenvolvemento tipográfico do libro Ein Versuchshaus (unha casa prototipo, onde se expresaban as ideas troncais da escola).

Non confundir con Hannes Meyer, outro arquitecto alemán profesor na Bauhaus, e segundo director da escola.

Arquitecto en Weimar

Despois das presións crecentes dos nazis, a Bauhaus tivo que trasladarse a Dessau e logo a Berlín antes de pasar ao exilio (New Bauhaus, Black Mountain College, etc.), porén Adolf Meyer decidiu ficar en Weimar e continuar a súa carreira como arquitecto independente.

Obra

En 1926 foi nomeado arquitecto municipal de Frankfurt, onde realizou a maior parte das súas obras. As súas obras máis recoñecidas foron as realizadas xunto a Walter Gropius, director da Bauhaus, que contou con el como docente, e con quen colaborou na Fábrica Fagus (1910-1911) e no Teatro Municipal de Jena (1922-1923), onde tamén fixo o Planetario.

Véxase tamén

Bibliografía

• Susan R. Henderson. "Building Culture: Ernst May and the New Frankfurt Initiative, 1926-1931." Peter Lang, 2013.

Ligazóns externas

• A fábrica Fagus, co-proxectada por A. Meyer, Patrimonio Mundial da UNESCO