Comercio xusto

Comercio xusto, Santiago de Compostela

Comercio xusto define unha forma alternativa de comercio promovida por varias organizacións non gobernamentais, por Nacións Unidas e por movementos sociais e políticos (coma o pacifismo e o ecoloxismo) que promoven unha relación comercial xusta entre produtores e consumidores.

O segundo sábado do mes de maio celébrase o Día Mundial do Comercio Xusto .

Principios

Os principios que defende o Comercio xusto son:

• Os produtores forman parte de cooperativas ou organizacións e funcionan de xeito democrático.
• Rexeito á explotación infantil.
• Igualdade entre homes e mulleres.
• Trabállase con dignidade respectando os dereitos humanos.
• O prezo que se paga aos produtores permite condicións de vida dignas.
• Os compradores xeralmente pagan por adiantado para evitar que os produtores busquen outras formas de se financiar.
• Valórase a calidade e a produción ecolóxica.
• Respecto ao medio ambiente.
• Búscase o xeito de evitar intermediarios entre produtores e consumidores.
• Infórmase aos consumidores acerca da orixe do produto.

Inténtase con isto evitar as grandes diferenzas entre o prezo que pagan por un produto os consumidores do primeiro mundo e o diñeiro que se lles paga aos seus produtores no Terceiro Mundo, ademais de evitar a explotación dos traballadores. Tamén, isto axuda a compensar os efectos da obsesión de consumir no prezo mais barato, e as súas repercusións:

• Progresiva deterioración da calidade e duración dos produtos.
• Explotación dos produtores.
• Deterioración ambiental.

Selo de Comercio Xusto

Turrón de comercio xusto

O Selo de Comercio Xusto ou Selo FAIRTRADE é o selo que, impreso nun produto, garante que este provén de comercio xusto e foi producido e comercializado seguindo os criterios internacionais de comercio xusto establecidos por Fairtrade Labelling Organzitions (FLO) International.

Cafés certificados co Selo Fairtrade-Comercio Xusto

A certificación dos produtos de Comercio Xusto cun Selo permite a súa fácil identificación e a súa venda nos canais de distribución habituais. Ademais a certificación Fairtrade abre o comercio xusto a todas aquelas empresas dispostas a seguir os criterios de Comercio Xusto na elaboración dun ou máis produtos. Deste xeito a certificación Fairtrade contribúe de forma significativa ao crecemento global do volume dos produtos de Comercio Xusto vendidos en todo o mundo.

En España a Asociación do Selo de Produtos de Comercio Xusto (ASPCX) dá licenza para o uso deste Selo e fomenta o que consumidoras e consumidores o coñezan e opten por produtos Fairtrade. a Asociación do Selo FAIRTRADE é membro de FLO International, o organismo internacional que apoia os produtores que traballan con Fairtrade ou desexan traballar con Fairtrade e que establece os criterios ou estándares de Comercio Xusto para cada produto.

Véxase tamén

Outros artigos

• Asociación para o Comercio Xusto e Solidario Panxea.

Ligazóns externas

• Comercio xusto, páxina de Setem Amarante
• 15 anos de comercio xusto en Galicia, artigo de Galicia hoxe^{[Ligazón morta]}
• Comercio justo: origen y evolución (en castelán)
• Web da Coordinadora Estatal de Comercio Xusto
• “Let’s go Fair”! (en castelán)

Documentais

• Documental 52': Fair Trade

Multimedia

• Vídeos sobre comercio xusto Arquivado 28 de outubro de 2008 en Wayback Machine.