Miosene

La epoca miosene es la prima epoca jeolojial de la periodo neojen e estende de sirca 23 a 5.3 milion anios ante aora. La miosene ia es nomida par Charles Lyell; sua nom deriva de la parolas elinica meion ("min") e kainos ("nova"), pd "min resente". Lo es presededa par la oligosene e es segueda par la pliosene.

(Vide Scala de edas jeolojial per detalias)

En cuando la Tera ia vade de la oligosene tra la miosene e a la pliosene, la clima ia fri lente a un serie de edas glasial. La bordas de la miosene no es marcada par clar avenis global, ma sola par alga bordas rejional entre la oligosene plu calda e la pliosene plu fria.

La primates ia evolui e estende se en la miosene temprana, e deveni vasta sperdeda en la emisfera este. Par la fini de esta epoca e la comensa de la seguente, la asendentes de umanas ia fende de la asendentes de la ximpanzes per segue sua propre via de evolui en la periodo final de la miosene. Simil a la oligosene, savanas ia continua estende se e forestas ia continua retira. En la mares de la miosene, forestas de fucas ia apare prima e pronto deveni un de la ecosistemes la plu produosa de Tera. La plantas e animales de la miosene ia es clar moderna. Mamales e avias ia es bon fundida. Setaseos, pinipedios, e fucas ia continua sperde.

La miosene es multe interesante a jeolojistes e paleoclimatolojistes car fase major de la jeolojia de la Himalaias ia aveni alora e ia afeta la modeles de monsones en Asia, cual ia es interliada con la periodos glasial en la emisfera norde.