Virga
Con virga (latin virga, "verga, ramo")[1] a se voeur indicà ‘na caratteristica accessòria de cèrt nivola che la consist in di scìj de precipitazion inclinàd o verticaj, taccàd sòta la superfice de la nìvola medèsima e che tocchen giò nò el soeul,[1] perchè svaporen o, in del caso de precipitazion sòlida sublimen, in del cors del sò tragìtt, intanta che intravèrsen di strat de aria pussée sècch.
El nòmm
[Modifega | modifica 'l sorgent]Quand che a se parla d’ona nivola, la paròlla latina virga l’è de vèss scrivuda sùbit adrée al tipo de la nivola medésima (per esempi Cumulonimbus virga)[1] e la paròlla l’è minga de vèss declinada. A se pò però parlà de virgae (o virgh, con plural a la lombarda occidental) con riferiment ai scìj lassàd de ‘na precipitazion che la tocca giò minga el soeul. Di vòlt i meteorològh interpreten virga ‘me ‘na sigla de "Variable Intensity Rain Gradient Aloft" (Gradient de pioeuva de sora de intensità variàbel) ma l’è minga giust. In lengua inglesa virga a l’è inveci generalment tradòtt con precipitation trail o fallstreak.[2]
Caratteristich
[Modifega | modifica 'l sorgent]I nìvol che pòden vègh di virgh hinn i Cirrocumul, i Altocumul, i altostrati, nembostrati, i Stratocumul, i Cumul e i Cumulonemb.[1] Quand che ‘l fenòmen el succed, la compàr ‘na scìa generalment inclinada fada su de cristàj de giazz o de gottìnn liquid de pioeuva. Quèj scij chì pòden caosà di fenòmen atmosferegh interessant, perchè quand che la pioeuva la passa del stat liquid a quèll gas la ghe tira via a l’aria ‘na granda quantitàa de calor (calor sconduu) e donca la se infrèggia on bèll poo. Quèj porizioncin d’aria chì molto frèccia vànn giò a la svèlta creando di borineri piscinìtt.
Virga e band de precipitazion
[Modifega | modifica 'l sorgent]Se gh’ha de confund minga el fenòmen conossùu ‘me virga cont i band de precipitazion, che insegnen domà che in quèlla zòna lì a hinn adrèe a capità di precipitazion, sia che raggiongen el soeul (e in quèll caso chì se parla de praecipitatio ‘me caratteristica accessòria de la nivola[1]) o nò. Di band assée consistent a pòden vèss notàd quand che i nev succeden sora i collìn e i montagn, e in quèll caso chì ciapen l’aspètt di nìvol taccàd a la montagna medesima.
Riferiment
[Modifega | modifica 'l sorgent]- ↑ 1,0 1,1 1,2 1,3 1,4 World Meteorological Organization (a cura di), International Cloud Atlas Volume 1, Ginevra, Secretariat of the World Meteorological Organization, 1975.
- ↑ AMS Glossary - Virga. URL consultad in data 20 febbraio 2011. (arqiviad de l'url orijenal in data 6 giugno 2011)
Bibliografia
[Modifega | modifica 'l sorgent]- Damiano Zanocco, Sulle nuvole: atlante, meteorologia, volo, Cornuda (TV), Antiga, 2004.