Sófocles
Sófocles (an griego, Σοφοκλῆς – Sophoklés, na transliteraçon) (496 a.C.-406 a.C.) fui un dramaturgo griego, un de l más amportantes scritores de tragédia al lhado de Ésquilo i Eurípedes. Sues peças retratan personaiges nobres i de la rialeza. Filho dun rico mercador, naciu an Quelono, acerca de Atenas, na época de l goberno de Péricles, l apogeu de la cultura heilénica.
Screbiu cerca de 120 peças, de las quales solo siete "subrebiben" até ls dies de hoije, i tamien trabalhou cumo ator. Fui ourdenado saçardote de Asclépio, l dius de la medecina, i eileito dues bezes para la Junta de Generales, que admenistraba ls negócios cebiles i militares de Atenas. Dirigiu l departamento de l Tesouro, que cuntrolaba ls fondos de la Cunfederaçon de Delos.
An sues tragédies, mostra dous tipos de sofrimento: l que decorre de l scesso de peixon i l que ye cunsequéncia dun acuntecimento acidental (çtino). Reduziu la amportança de l coro ne l triato griego, relegando-lo al papel de ouserbador de l drama que se zamrola a la sue frente. Tamien aperfeiçou la cenografie i oumentou l númaro de eilemientos de l coro de 12 para 15, mas esse númaro puode bariar de acordo cul poeta que define la tragédia. Sue cuncepçon teatral fui inobadora i eilebou l númaro de atores de dous para trés. Sues peças "subrebibentes" son: