Rudolf Hess
Rudolf Walter Richard Hess (26 d'abriu de 1894, Alexàndria – 17 d'aost de 1987, Berlin) èra un òme politic que foguèt una figura majora dau nazisme e dau Tresen Reich. Segond personatge dau NSDAP après Adolf Hitler, partiguèt en 1941 en Escòcia per assaiar de negociar la patz ambé lei Britanics que l'arrestèron. En 1946, foguèt condamnat a una pena de preson a perpetuitat per crimes còntra la patz.
Soudat de l'armada bavaresa durant la Premiera Guèrra Mondiala, foguèt bleçat mai d'un còp e guierdonat de la Crotz de Fèrre en 1915. En 1919, acomencèt d'estudis a l'Universitat e venguèt un sòci dau NSDAP en 1920. Participèt au putsch de la braçariá lo 8 de novembre de 1923. En 1933, après la presa dau poder per Hitler, foguèt nomat representant dau Führer au NSDAP e venguèt lo tresen personatge pus important dau regime nazi. Participèt activament en 1935 a la redaccion dei lèis de Nuremberg dirigidas còntra lei judieus.
Lo 10 de mai de 1941, per de rasons desconegudas, prenguèt un avion de caça per viatjar fins a Escòcia e negociar la patz. Arrestat tre son arribada, foguèt gardar presonier per lo Reiaume Unit fins a la fin de la guèrra. Condamnat a una pena de preson a perpetuitat per crimes còntra la patz a l'eissida dei Procès de Nuremberg, foguèt estremat a la preson de Spandau onte se suicidèt en 1987.