Laman Karibe
| Laman Karibe | ||
|---|---|---|
| ||
Imagen di satélite (NASA) di Laman Karibe
| ||
| Lokalisashon geográfiko | ||
| Koordinatonan | 15°N 75°W / 15°N 75°W | |
| Lokalisashon atministrativo | ||
| Pais | Mexico, Belize, Cuba, Guatemala, Honduras, Nicaragua, Costa Rica, Panama, Colombia, Venezuela, Jamaica, Haiti, Republika Dominikano, Puerto Rico, Grenada, Saint Lucia, Fransia, Dominica, Reino Uni, Saint Kitts i Nevis | |
| Kurpa di awa | ||
| Tipo | laman | |
| Área | 2,754,000 km² | |
| Elevashon | 0 meter | |
Profundidat
|
7,686 meter | |
| Mapa detayá di Laman Karibe | ||
| ||
Imágennan riba  Wikimedia Commons
| ||
| [Editá Wikidata] · [Manual] | ||
Laman Karibe (òf Laman Caribe) ta un laman tropikal pegá ku Oséano Atlántiko i sùitost di e Golfo di Mexico. E ta tuma gran parti di Plato Karibense i ta yega te Venezuela, Colombia i Panama den sùit, Costa Rica, Nicaragua, Honduras, Guatemala. Belize i e península di Yucatan di Mexico na parti wèst, i pa parti nort e islanan di Antia Mayor manera Cuba, Hispañola, Jamaica i Puerto Rico i pa parti ost Antia Menor.
Laman Karibe ta un di e lamannan salu mas grandi na mundu i tin un área banda di 2.754.000 km² (1.063.000 mia²). E laman su punto mas hundu ta e Trinchera Cayman, entre Cuba i Jamaica, na 7.696 meter (25.220 pia) bou di nivel di laman.
E área kompletu di e Laman Karibe, espesialmente e islanan numeroso, ta konosí komo Karibe. E kosta di Sur Amérika i Amérika Sentral tin yen golfo i bahia, por ehèmpel e Golfo di Venezuela, Golfo di Darien i e Golfo di Honduras.
Historia
[editá | editá fuente]E palabra "Karibe" ta derivá for di e Caribnan, un di e tribunan di indjan dominante ku tabata den e region ora e oropeonan a deskubri e área di Karibe i a haña kontakto ku varios indígena den e área aki durante e fin di e siglo 15. Despues di e deskubrimentu di Karibe pa Cristóbal Colón na aña 1492 e nòmber spaño "Antias" a wòrdu designá na e área, i derivá for di esaki a yama laman Oceano de las Antias i ta te ainda un nòmber alternativo pa Laman Karibe den varios lenga oropeo. Durante e promé siglo despues di deskubrimentun Spaña tabata e poder dominante.
E Laman Karibe tabata deskonosí pa oropeonan promé ku 1492. Ora Colon a yega einan e tabata buska un ruta alternativa pa yega India. Despues di su deskubrimentu Oropa a kolonisá e área lihé i Karibe a bira un base pa komersio i transporte oropeo i e rikesa aki a atrae tambe hopi pirateria.
Awendia e área ta konsistí di 22 teritorio insular i e ta grens na diesdos pais kontinental. Pasobra e tin un abundansia di solo, temperaturanan kayente henter aña ront i hopi playanan i otro destinashonnan pa bishita, durante e di dos mita di siglo 20 i sigui den siglo 21 Laman Karibe ta un área masha inportante pa turismo, i e mayor luga di turismo krusero.
Geologia
[editá | editá fuente]Laman Karibe ta situá riba e Plato Karibense. Ta estimá e edat di e Laman entre 20.000 aña pa 570 mion aña bieu. Karibe ta separá den sinku basín aparte separá for di otro ku serunan marino. Oséano Atlántiko ta drenta laman Karibe via di e Anegada Passage situá entre Antia Chiki i Islanan Birgen i na Windward Passage situá entre Cuba i Haiti. E kanál Yucatán ta konektá Laman Karibe ku Golfo di Mexico.
E Plato Karibense tin hopi aktividat; esaki tin e efekto ku tin hopi riesgo di teremoto i maremoto ku por kousá tsunami i hasi hopi daño na islanan karibeño. Data sientífiko a mustra ku e delaster 500 aña tabatin mas ku 12 teremoto riba di 7.5 grado di eskala di Richter.
Ekologia
[editá | editá fuente]
Laman Karibe ta kontene 9% di tur e ref di koral na mundu, kubriendo 52,000 km2 mayoria di nan ta situá banda di e islanan karibense i e kosta sentro merikano.
Durante e delaster 10 añanan e awanan di Laman Karibe a subi den temperatura i esaki ta forma peliger na su refnan. Refnan ta sostené un di e ekosistemanan mas riku na mundu, pero tambe nan ta mashá fragil. Ora awa bira muchu kayente pa muchu largu sierto plankton yama zooxanthellae ku ta biba huntu ku e koral den e polipnan ta muri. E matanan aki ta duna kuminda na e koral i ta dun'é su koló. E resultado aki nos ta yama bleekmentu di koral anto por destui áreanan extenso di ref.
E habitatnan sosteni dor di koral ta di hopi importansia pa aktividatnan manera piskamentu i sambuyamentu i ta duna Karibe un balor ekstra di USD 3.1- 4.6 bion pa aña. Si sigui destrui e refnan esaki por daña e ekonomia di mayoria di e islanan.
Ekonomia i aktividat humano
[editá | editá fuente]E área di Karibe tin hopi aktividat humano for di tempu di kolonisashon. E laman ta e di dos área den produkshon mas grandi di zeta krudo na mundu, aproksimadamente 170 míon ton pa aña. Tambe pa piska e área ta di gran importansia; tin un industria di piska masha grandi mes den Laman Karibe ku ta produsí aproksimadamente mei míon ton di piska pa aña.
E aktividat humano tambe ta trese hopi polushon, Organisashon di Kuido Pan Amerikano a deskubrí ku solamente 10% di awa usá ta wòrdu purifiká promé ku e yega laman. E área di Karibe ta sostené un kantidat di turista masha altu. Aproksimadamente 12 míon hende pa aña ta bishita e área, inkluyendo 8 míon turista krusero. Turismo basa riba sambuyamentu i snorkelmentu riba ref di koral ta un kontribuidó masha grandi mes di e ekonomia di sierto isla.