Guido Fubini

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Guido Fubini Matemàtich. Guido Fubini a l'era nassù a Venessia ai 19 ëd gené dël 1879 e a l'é mòrt a New York ai 6 ëd giugn dël 1943. Fieul d'un professor ëd matemàtica venessian, Guido Fubini a l'avìa evidensià già da motobin giovo soa atrassion për la matemàtica. A l'era stàit bon a smon-e na serie convergent a π con n'andi pì grand ëd cole conossùe a l'época. Dël 1896 a l'é intrà a la Scòla Normal Superior ëd Pisa, anté ch'a l'ha frequentà dij cors d'Ulisse Dini e Luigi Bianchi. A l'ha otnù sò dotorà con na tesi an sël paralelism ëd Clifford ant jë spassi elìtich. Dël 1901 a oten un pòst a l'Università ëd Pisa. Dal 1903 al 1906 a mostra a Catania e peui a va al Politécnich ëd Turin, anté ch'a resta për pì che vint agn, e a l'Università ëd Turin. Barà fòra d'l'ansegnament dal fassism, a va a Paris. L'Università ëd Princeton a-j eufr un pòst e a l'é ambelelà che Fubini a passa ël rest ëd soa cariera e ëd soa vita. Sò travaj Fubini a l'ha travajà dzortut ant l'anàlisi fonsional, anté ch'a sërca ëd definì le fonsion clàssiche (logaritm, fonsion sircolar e via fòrt) tanme solussion d'equassion fonsionaj. Tutun a l'é vnù avosà pr'ij sò travaj an sl'antëgral ëd Lebesgue, ch'a l'era pen-a stàit anventà. A l'ha ëdcò fàit dij travaj an geometrìa diferensial e projetiva. A l'ha esaminà la caraterisassion projetiva 'd na surfassa a parte da soe session pian-e. Dzortut ant ij sò darié agn a l'é motobin anteressasse ëdcò a j'aplicassion, an particolar a la siensa dle costrussion. Fubini a l'avìa car ëd dì che a aringrassiava soèns Nosgnor d'avèje fàit serne na branca dla siensa anté ch'a-i basta mach avèj un tòch ëd carta e un crajon. A pòrto sò nòm Premi Fubini Teorema ëd Fubini-Tonelli Euvre prinsipaj Introduzione alla teoria dei gruppi discontinui e delle funzioni automorfe (Pisa, 1908)

Aiuto per la lettura Ayuda para la lectura Help for Reading Rintré ant la Piòla Contaté j'Aministrator Lìber për Amprende Coression ortogràfica Tastadura piemontèisa Portaj e Proget Agiut pr'ij Contributor Travajòt sempi