بئنڊ
ولائتي سازن جو جوڙ. ولائتي ساز تي واڄو ڪرڻ وارن جي ٽولي. -بئنڊ- ۾ گهٽ ۾ گهٽ 15 کان 20 ميمبر ٿيندا آهن، جيڪي جدا جدا ساز وڄائي سازين جي صورت پيدا ڪندا آهن. ڀارت مان آيل مسلمان شادي مراديءَ تي -بئنڊ- وڄارائيندا آهن، ليڪن سنڌ ۾ روايتي مڱڻهارن جو مقرر -ٽولو- هوندو آهي، جنهن جي ترتيب ۽ تاثر اڳيان -بئنڊ- باجا هلي نه سگهيا، تنهنڪري هاڻي -بئنڊ- باجا سرڪس تائين ۽ ڪن مخصوص شادين تائين محدود ٿي ويا آهن. اڄ ڪلهه جي -بئنڊ- اصل فوجي سازينو آهي، جيڪو ڪوچ جي دوران وڄائيندا آهن.[1]