Šilk (lidn)

Šilk
Шилка
Lidnanznam;	Flag;
Valdkund	Venäma
Eläjiden lugu (2021)	12,046 ristitud
Pind	105 km²
Pämez'	Sergei Sivolap; (keväz'ku 2012—)
Telefonkod	+7−30 244-xx-xxx
Avtokod	75, 80
Aigvö	UTC+9 (MSK+6)

Sil sanal voib olda toižid znamoičendoid; miše nähta niid, tulgat tänna.

Šilk (ven.: Шилка [ˈʂɨlkə]) om Venäman lidn da lidnankund Baikalantagaižen randan keskuzpalas. Se om Šilkan rajonan administrativine keskuz.

Istorii

Eländpunktan aluz om pandud 18. voz'sadan ezmäižel polel kozakoiden vahtkundaks otmaha kävutamižhe jogen alangišton väghižid maid, nimitihe jogen mödhe. Ezmäižen kerdan lidn mainitase kirjutadud purtkiš vl 1765. Vspäi 1914 Transsiban stancii radab Šilkas. Se sai lidnan statusad vl 1951.

Šilk šingotase raudten edheotandoil.

Geografijan andmused

Lidn sijadase Šilk-jogen hural randpolel (Amuran bassein), kahtes kilometras jogespäi, 490 m ü.m.t. keskmäižel korktusel.

Matkad Čithasai om 174 km päivlaskmha orhal, 216 km avtotedme vai 248 km raudtel. Lähembaižed lidnad oma Nerčinsk 40 km päivnouzmha avtotedme vai 45 km raudtedme i Balei 52 km suvipäivnouzmha orhal vai 104 km avtotedme.

Klimat om terav kontinentaline. Voden keskmäine lämuz om −0,8 C°, kezakun-elokun +16,8..+19,2 C°, tal'vkun-uhokun −18,9..−24,1 C°. Ekstremumad oma −49,3 C° (viluku) i +40,5 C° (heinku). Kezaaigan minimum om −4,1 C° (kezaku, eloku), tal'vaigan maksimum om +5,5 C° (uhoku). Ei voi panda halad kezaaigan heinkus vaiše (minimum om +0,7 C°), läz ei olele sulasäd vilukus (maksimum +0,3 C°). Paneb sadegid 350 mm vodes. Voden keskmäine relätivine nepsuz om 61,9 %.

Tobmuz

Mitrofanovo-žilo (ven.: село Митрофаново, 529 rist. vl 2017) mülüb lidnankundha Šilkan ližaks. Lidnankundan pind om 353,57 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 13 947 ristitud, lidnankundan — 14 539 ristitud, rajonan koumandez. Vl 2017 kaik 12 784 ristitud elihe lidnas i 13 313 ristitud kaikes lidnankundas. Kaikiš suremb lidnan ristitišt oli 16..18 tuh. eläjid vll 1959−1996 (18 200 rist. vl 1992).

Ortodoksižen hristanuskondan kaks' pühäpertid^[1] oma kaičenus i saudud lidnas: phh. Pedroi- da Pauloi-apostoloiden jumalanpert' (om saudud vl 1906) i Jumalanmaman «Kazvatuz»-jumalaižen jumalanpert' (saudihe vll 2008−2014).

Lapsiden opendusen aluzkundad oma koume nimitadud i nomeruidud päivkodid (nomer 2 filialoidenke, 23, 110), viž keskškolad (nomer 1, 2, 51, 52, avoin keskškol), lapsiden da norišton pert', čomamahtoiden škol, sportškol. Šilkan äiprofil'ne licei^[2] om lidnan professionaližen opendusen aluzkundaks.

Galerei

Muštnik sijaližile eläjile — sodoiden ühtnijoile (2020)
Phh. Pedroi- da Pauloi-apostoloiden jumalanpert', vn 2016 nägu

Homaičendad

Irdkosketused

Lidnankundan tobmuden aluzkundoiden oficialine sait (шилкинское.рф). (ven.)

Šilk (lidn) Vikiaitas

	Baikalantagaižen randan lidnad
	Balei \| Borz' \| Čit \| Hilok \| Krasnokamensk \| Mogoč \| Nerčinsk \| Petrovsk-Zabaikal'skii \| Sretensk \| Šilk

[1] Šilkan pühäpertid sobory.ru-saital. (ven.)

[2] Šilkan äiprofil'žen licein sait (pu-shilka.profiedu.ru). (ven.)

[1]

[2]