Giz

Giz
الجيزة (el'-Gīza)

Lidnanznam	Flag
Valdkund	Egipt
Eläjiden lugu (2021)	4,367,343 ristitud
Pind	98,4 km²
Telefonkod	+20−2
Aigvö	UTC+2

Giz (arab.: الجيزة al'-Džīzah «tazangišt», egiptine virkand [el ˈgiːze]) om lidn Egiptan pohjoižes. Se om valdkundan koumanz' lidn eläjiden lugun mödhe, Gizan agjan administrativine keskuz, mülüb Kairan megapolisha.

Istorii

Amuižen Egiptan aigan nügüdläižen lidnan tahond oli sen Memfis-pälidnan (30 km suvhe) pohjoižeks kaumžomaks (Gizan piramidad). Eländpunktan aluz om pandud vl 642.

Giz šingotase mašinansauvomižel, himižel tegimištol, puvillan ümbriradmižel, fil'miden tehmižel, turizmal, oluden (Heineken-gruppan Al-Ahram Beverage Company) i tabakon edheotandoil.

Geografijan andmused

Lidn zavodiše vides kilometras suvipäivlaskmha Kairan keskusespäi, Gizan lidnfartalad saihe Kairhasai 20. voz'sadan lopus. Giz sijadase Nil-jogen hural randal, 19 m ü.m.t. keskmäižel korktusel. Giz-lidn om ühtenzoittud Kairanke metropolitenal vspäi 1999.

Klimat om räk kuiv letetazangišton. Voden keskmäine lämuz om +21,2 C°, kezakun-sügüz'kun +26..+27 C°, tal'vkun-uhokun +13..+15 C°. Ekstremumad oma +2 C° i +46 C°. Paneb sadegid 17 mm vodes, ei olele niid semendkus-redukus, toižen aigan 1..4 mm kus. Pölütorokad oleskeldas keväz'kus-sulakus.

Eläjad

Vl 2010 lidnan eläjiden lugu oli 3 122 041 ristitud, agjan koumandez. Vl 2017 lidnan ristitišt oli 4 872 448 eläjad kaikidenke alištunuzidenke lidnan tobmudele rajonidenke, agjan pol'.

Kairan universitetan (alusenpanend 1908, 230 tuh. üläopenikoid) päine kampus sijadase lidnas vspäi 1929.

Verhiden maiden sur'oigenduzkundad oma saudud neciš lidnas.

Irdkosketused

• Lidnan oficialine sait (giza.gov.eg). (arab.) (angl.)