卡洛斯二世
卡洛斯二世（西班牙文：Carlos II，1661年11月6号-1700年11月1号）别号：el Hechizado。是1665年到1700年当中个西班牙国王。伊来自哈布斯堡家族，爸爸是西班牙国王费利佩四世。虽然伊1665年就当西班牙国王，弗过因为年纪太小，伊个妈妈代理朝政，个当中，葡萄牙复辟战争正式结束，1668年西班牙正式承认葡萄牙复国。同时，西班牙立在低地个军事行动，也失败收场。国际地位下降，国力收缩。到1675年，卡洛斯二世名义浪亲政。弗过呒过多少辰光，国家个统治又畀伊个同父异母阿哥胡安·何塞篡夺，直到1679年胡安·何塞死脱之后才完结。因为家族近亲结婚个关系， 卡洛斯二世有交关遗传病，并且弗好生育，迭个问题弗仅让西班牙个国家朝政立在三十年战争失败个基础浪雪上加霜，也让伊死脱之后，爆发西班牙王位继承战争。
童年
[编辑]
卡洛斯二世是费利佩四世唯一合法个男性后代，1661年立在旧马德里城堡出生，是哈布斯堡家组近亲婚姻个产物。本身，费利佩四世老早个王太子巴达萨·卡洛斯是要搭卡洛斯二世个妈妈结婚和，但伊立在1646年死脱。所以，费利佩四世自家就立在1649年亲自娶了卡洛斯二世个妈妈。迭个近亲婚姻造成灾难后果。弗过，当卡洛斯二世出身辰光，马德里个宫廷还是邪气开心，发布个公告讲王子“卖相灵光，天庭饱满，肤色健康”。
卡洛斯二世从一开始就反映出身体高头个毛病，伊立在4岁之前一直要靠奶妈喂奶，自家嘸办法进食。立在五岁之前，还要交关保姆照顾。有辰光生毛病，要十几个保姆陪伊转。伊到六岁之前，朆自家独立走路（要靠宫人搀扶），到9岁还弗认得任何文字，更弗会阅读。因为身体原因，伊弗好搭自家个祖辈一样到萨拉曼卡大学接受教育，只好立在宫里靠家庭教师来辅导。个也让伊从小就嘸接触到同龄人个机会。又因为遗传毛病，伊个学习掌握也邪气推板，让教师老伤脑筋。到1670年，伊参加第一场狩猎。1671年，第一趟骑上马。
卡洛斯二世个身体毛病立在欧洲成为人人侪晓得个话题。巴黎搭维也纳个宫廷侪认为伊马上就会死脱。法国国王路易十四更认为伊1670年就要完结。弗过，个辰光卡洛斯二世身体高头个毛病，只弗过是伊后势来交关身体问题个开始。还弗算老严重。
爱娃倷多干政
[编辑]
迭个辰光，国家个政治权力名义浪是让卡洛斯二世个妈妈，奥地利公主马里亚纳担当西班牙个摄政个。弗过，马里亚纳本身年岁并弗大，更嘸啥执政经验。费利佩四世个死脱让伊心生空虚，对国家个事体搭迭个辰光个外部压侪嘸办法一个人应对，个能，就逐渐拿治国方略转移到自家信任个忏悔神父爱娃倷多个手里向。爱娃倷多本身是出身奥地利西面蒂罗尔个地方贵族。因为马里亚纳个虔诚，事事全听伊个指挥，爱娃倷多个权势也就弗断膨胀。伊对太后个控制慢慢深入，成为太后唯一彻底信任个内廷人物。伊个权势，让交关政治搭宗教人物嫉妒痛恨。迭个耶稣会个成员弗仅立在1666年成了枢密院个大佬管，之后又搞到宗教裁判所主审个职位。个当中，发生交关对费利佩四世老臣个挤兑搭清洗，让西班牙个宫廷一片乌黑。
第二步是对爱娃倷多地位个中立化。作为一个来自奥地利个外国人，爱娃倷多本身是无资格担当任何西班牙个重要职位个。弗过，马里亚纳对迭个方面做自家个安排：伊让爱娃倷多去卡斯蒂亚个议会去支持修改相关个规定，拿爱娃倷多当成自家个「特例」网开一面。阿末一步，是对罗马天主教个上层进行行贿工作，因为假使无教廷直接个支持，爱娃倷多也弗好直接从一个普通耶稣会士跳到宗教裁判所主审个高官高头。迭个事体之前无发生过，弗过太后对爱娃倷多信任邪气大，无几许犹豫，就直接派人去寻个辰光个教宗亚历山大十二世谈条件。教宗为讨好西班牙，经过讨论后还是允许迭个请求，结果，到1666年10月15号教廷批准之后，爱娃倷多老快就拿到枢密院委员会个头衔同时身兼宗教裁判所主审。
弗过，太后个信任是一方面，具体西班牙个政治局面又是另外一番情形：贵族对迭个外国人一点也无信任。本身执掌宗教裁判所大权个多名我会对耶稣会个替代感到沮丧搭弗开心，伊拉认为这能个人是无能力判断正宗个宗教裁判问题个。所以，1666年之后个政治形势开始持续僵化，爱娃倷多个存在本身弗对政治有多少个影响，弗过另外一方面让西班牙本身就毛病老多个政治运转更加低效，宫廷之中个势力，地方个贵族，教会搭修会，侪围绕如然搭伊处理关系形成帮派，爱娃倷多对王太后个掌握，让伊成为各方弗好随便开刀个存在。爱娃倷多搭马里亚纳越来越弗信任西班牙本土个贵族，个能，也让贵族对维护伊拉代表个哈布斯堡利益更加抵触。越来越多个贵族集聚到费利佩四世个私生子（同时也是顶有能力个）胡安·何塞身旁。
爱娃倷多立在之后个好几年名义浪继续掌握西班牙个政治搭宗教大权。弗过伊个实际控制力道从来无强大过，伊本身对西班牙个隔阂也让自家无能力建立好依靠个权力关系网络。结果到1668年，伊就失宠下台，黯然退出历史舞台哉。