Khan-hō͘-sū
Khan-hō͘-sū (看護士), it-poaⁿ hō-chò hō͘-sū (護士), sī keng-kòe hō͘-lí pôe-hùn ki-kò͘ ê hùn-liān, khó-chhì thong-kòe, pēng-chhiáⁿ niá-ū chip-chiàu ê jîn-sū. Khan-hō͘-sū chip-hêng chiàu-hō͘ ê só͘-chāi pēng bô it-tēng tī pēⁿ-īⁿ, in-ê kang-chok hoān-ûi chin tōa, pau-hâm chín-só͘, ōe-seng-só͘, ha̍k-hāu, kang-tiûⁿ, sīm-chì sī khiā-ke kap siā-khu téng-téng. Lí-lūn-siōng, bô-lūn cha-po͘ ia̍h-sī cha-bó͘ lóng ē-sái chông-sū khan-hō͘ jîn-oân ê kang-chok, put-kò sit-chiān oa̍h-tāng tiong bêng-hián sī cha-bó͘ khan-hō͘ khah chē. Khan-hō͘-sū hū-chek chiàu-kò͘ phoà-pēⁿ, siū-siong ê hoān-chiá ê an-choân, kiān-khong kap ōe-seng kàu-io̍k ê kang-chok.