內碼
內碼，喺資訊處理，特別係喺中日韓書寫系統嘅資訊處理，係指某套電腦系統同應用程式實際用嘅編碼[1]:30，而今通常係某種形式嘅統一碼；統一碼喺微軟視窗內部用 UTF-16LE形式，而喺類Unix系統（包括MacOS）就係UTF-8形式[2]。內碼亦指某種內碼之下某字符嘅號碼。
概念上，內碼同交換碼相對[1]:29，但實際上，除咗喺例如圖書館學或者HZ碼等一啲個別領域之外，喺中文，就算係統一碼未廣泛採納之前，呢兩樣概念通常都重叠，即係可以話除咗少數例外情況之外，中文基本上從來都無真正嘅交換碼，而係就算跨系統都係用內碼，只係傳出去或者收到之後會轉內碼。相反，日文可以話以前ISO 2022係交換碼，即係話就算系統內部係用EUC或Shift-JIS，以前好多時都係轉咗做ISO 2022形式先傳出去或者寫入檔案。
統一碼未廣泛採納之前，唔同書寫系統嘅內碼並唔統一，而係通常各國有自己嘅內碼，中文好多時用嘅都係雙位元組編碼，漢字部分固定用兩位元組，英文部分就固定用一位元組。
用某種內碼嘅檔案拎去用第種內碼嘅系統度開嚟睇，結果就會顯示錯誤，呢種原因導致嘅顯示錯誤叫亂碼。
未有五大碼之前，正體中文亦都曾經出現過直接用倉頡碼做內碼嘅情況，喺呢種系統，中文內碼視乎倉頡點拆字，位元組數量會介乎兩至六位元組不等[3]:19，有啲似而今UTF-8嘅情況。
內碼輸入法
[編輯]直接用字符內碼打字嘅輸入法叫內碼輸入法。例如，喺用五大碼嘅系統，「字」係A672，但係喺用GB碼嘅系統，D7D6（十進制（55，54）嘅EUC形式）先係「字」。
喺用統一碼嘅系統，內碼通常指統一碼標準入面嘅編號，即係U+後面嘅十六進號碼，或者號碼嘅十進制形式。例如喺Linux，用X11跟機嘅內碼輸入法，打5B57就會打到「字」（U+5B57）。
攷
[編輯]- ↑ 1.0 1.1 魏令芳、江敏妮 (1997年7月22號)。〈中字字集字碼簡介〉 (PDF) (臺灣中文)。喺2023年4月3號搵到。
- ↑ "Why does Windows use UTF-16LE?" (英文). 2022年12月5號. 喺2023年4月2號搵到.
- ↑ 張壽萱; 徐建毅、張建生 (1984年)。《中文信息的計算機處理》 (中國中文)。上海：宇航出版社。
 |