太和邨
太和邨（Tai Wo Estate）係香港大埔頭一條公共屋邨，1989年落成，全邨有九棟樓。邨中間有太和商場，為領匯甲級商場。全邨畀港鐵太和站分成兩邊。
地理
[編輯]太和邨響大埔新市鎮西側，林村河北岸一笪平地之上。佢因為好近一河之隔嘅太和市而名，而邨中央新起嘅火車站，亦名為太和站。條邨畀林村河，汀角路，同大埔太和路包圍。個範圍除咗太和邨，西側有寶雅苑三棟樓，幾間中小學，社區中心，同政府合署，油站等。
太和邨過河，東南係太和市，南係錦山，西係錦石同石鼓壟。西面過太和路係大埔頭水圍，而東北係大埔舊墟。
史
[編輯]未有太和邨之時，笪地原本係好近林村河口，而林村河穿過塊地。一直以來，呢帶都係田來。而佢東北，係近岸嘅太埔墟。南面過河，係新啲嘅太和市。英國1898年入主新界之後，1900年代起九廣鐵路同大埔公路，兩者都穿過呢笪地。
後尾大埔由墟市發展成市鎮，大埔公路響大埔市區呢段，亦改名廣福道。之後大埔響香港政府規劃之下，變成大埔新市鎮，一方面大幅填海，另一方面改變河道，同時道路網路亦大幅改變。
太和邨係同寶雅苑一齊起，整體係同一規劃。建邨之時，廣福道唔再駁去大埔公路，過河行車嘅廣福橋亦拆走，另建同名嘅行人橋。到咗1989年，太和邨同寶雅苑全部落成。九廣鐵路加一個太和站，取代太和市隔籬嘅舊大埔墟火車站。
2000年，香港政府推出租者置其屋計劃（第三期），將屋賣畀所屬租戶。無耐，每棟樓都有自己業主立案法團。
樓
[編輯]太和邨一共有九棟樓，全部1989年起好，其中愛和樓，安和樓同亨和樓都係新長型。而福和樓，喜和樓，居和樓，麗和樓，新和樓同翠和樓都係Y3型。愛和，安和以及喜和三棟樓，都同太和商場（太和廣場）相連。