奈威·隆巴頓

奈威·隆巴頓
馬修·路易斯飾演嘅奈威·隆巴頓。
首次出場	《哈利波特：神秘的魔法石》
尾次出場	《哈利波特：死神的聖物》
作者	J·K·羅琳
扮演	馬修·路易斯（電影）
詳細信息
性別	男性
職業	霍格華茲草藥學教授
家庭	奧古斯塔·隆巴頓（阿嫲） 法蘭克·隆巴頓（阿爸） 愛麗絲·隆巴頓（阿媽） 阿爾吉·隆巴頓（叔公） 伊妮德·隆巴頓（叔婆）
配偶	漢娜·艾寶
國籍	英國

奈威·隆巴頓（英文：Neville Longbottom）係英國作家J·K·羅琳嘅奇幻小說系列《哈利波特》系列嘅人物。佢係哈利·波特同屆入去霍格華茲魔法與巫術學院讀書嘅學生，佢同哈利仲有榮恩·衛斯理一樣都係屬於葛萊分多學院，仲住埋喺同一個宿舍間房。奈威喺嗰個系列開始嗰陣係個圓面嘅學生，佢喺成個系列入面成日被形容做一個相當普普通通又唔突出嘅學生，仲係個笨手笨腳、雜亂無章嘅角色，但係佢喺草藥學方面好有天份。不過，佢喺《鳳凰會嘅密令》裡面加入咗鄧不利多的軍隊之後，佢嘅角色性格似乎發生咗啲轉變。

奈威所受到嘅鼓勵令佢對自己嘅魔法能力充滿信心，仲令佢成為咗一個更有能力嘅巫師。最後，喺哈利、榮恩同妙麗因為去搵分靈體而缺席嘅嗰段期間，奈威成為咗鄧不利多的軍隊嘅臨時領袖。佢喺佛地魔倒台嗰陣發揮住重要嘅作用，仲摧毀埋最後嘅分靈體，令到哈利可以徹底咁打敗佛地魔。

人物性格同特徵

奈威·隆巴頓喺1980年7月30號出世，係正氣師法蘭克·隆巴頓同愛麗絲·隆巴頓唯一嘅獨生仔，不過佢哋兩個喺一次制止食死人嘅行動入面（奈威好細嗰陣），雙雙俾酷刑咒折磨到發癲，搞到成世都好唔返，需要長期住喺聖蒙果醫院嗰度接受治療，令到奈威一直由佢阿嫲—奧古斯塔·隆巴頓湊大。

實際上，奈威·隆巴頓係西碧·崔老妮同鄧不利多嘅第一次預言入面，佢同跟哈利·波特都係同樣符合嗰個預言內容嘅人。奈威同哈利、榮恩、西莫·斐尼干仲有丁·湯瑪斯喺成個系列入面都住喺同一個睡房嘅室友，佢哋亦成為咗哈利最堅定嘅支持者之一；雖然奈威喺頭４輯小說入面都係次要嘅角色，不過奈威呢個角色成日以喜劇性穿插嘅方式喺裡面出現，佢仲同榮恩、妙麗、金妮同露娜做咗好朋友。就正如羅琳所講，《哈利波特》嘅第５輯小說「對奈威嚟講係一個真正嘅轉捩點」，因為佢喺嗰輯小說裡面飾演一個更加重要嘅角色。奈威喺最後兩輯小說，仲有同佛地魔嘅戰鬥入面都發揮住重要嘅作用，包括咗佢用葛來分多寶劍去摧毀咗最後嘅分靈體—娜吉妮。由於奈威本人喺一開始就一直喺度懷疑自己喺葛萊分多學院嘅位置，仲希望知道自己點解無被派去赫夫帕夫學院，不過葛萊芬多寶劍喺奈威最需要嗰陣出現喺佢面前，咁就足以證明咗佢就係真正嘅葛萊分多傳人。

奈威·隆巴頓嘅寵物係一隻叫做「吹寶Trevor」嘅蟾蜍，而成日大頭蝦到唔記得嘢嘅奈威成日都唔記得咗將佢漏低喺邊度，或者係俾佢走失咗都唔知，不過到最後佢都係會搵得返。

奈威·隆巴頓令人留低最深刻嘅印象係佢嘅忠誠同勇氣，佢唯一叻嘅科目係草藥學，而佢其他學科嘅成績都唔多好，當中成績最差嘅係魔藥學，佢成績唔好嘅原因主要係因為佢成日講完呢樣又唔記得嗰樣；佢最驚嘅人係石內卜教授，其次就係佢阿嫲（喺路平教授嘅堂講過）。

羅琳喺一次訪問入面透露「我身上有好多奈威—呢種永遠唔夠好嘅感覺，我後生嗰陣就感受到好多。」出於呢個原因，佢希望奈威喺《哈利波特：神秘的魔法石》入面做啲勇敢嘅事。喺走向小說嘅高潮入面，奈威喺當中「搵到真正嘅道德勇氣，就係企出嚟對抗自己最親密嘅朋友—企喺佢呢邊嘅人」。羅琳喺嗰次訪問入面仲講到，呢個係「......喺第一輯小說裡面對我嚟說都係一個好重要嘅時刻」。

家庭

奈威係純血嘅法蘭克·隆巴頓同愛麗絲·隆巴頓所生嘅純血巫師，隆巴頓夫婦喺同佛地魔對立嘅第一次魔法世界大戰入面，佢哋兩個都係傑出嘅正氣師，亦都係鳳凰會嘅成員。鄧不利多曾經話，佢哋兩個喺1981年曾經「三次反抗」佛地魔。不過，隆巴頓夫婦俾小巴堤·柯羅奇、貝拉·雷斯壯同埋佢老公魯道夫·雷斯壯，仲有佢叔仔巴坦·雷斯壯組成嘅一班食死人用酷刑咒折磨去到精神錯亂嘅地步，打斷咗一班正氣師嘅成功。鳳凰會銘記住隆巴頓一家所受嘅折磨，作為佛地魔追隨者所犯下其中一樣最駭人聽聞嘅罪行。隆巴頓夫婦自此就留喺聖蒙果醫院裡面接受長期治療。奈威喺放假嗰陣時都會去探佢阿爸阿媽，不過佢哋兩個都已經無辦法認得到佢哋個仔，而奈威阿嫲—奧古斯塔·隆巴頓就將奈威由細湊到大。

喺成個系列嘅早期嗰陣，啲人確定奈威好鬼驚佢阿嫲，因為奧古斯塔係個嚴肅嘅女巫，亦都係個紀律嚴明嘅人同埋完美主義者，尤其係對住奈威嗰陣，有時仲會呻奈威一啲魔法天份都無。無論奈威嘅願望又或者佢嘅適合性係點都好，奧古斯塔似乎都係希望奈威效法佢阿爸嚟做榜樣。奈威喺《鳳凰會的密令》入面提到奧古斯塔係鄧不利多嘅忠實支持者，而奧古斯塔仲喺嗰個學年嘅聖誕節假嗰陣喺聖蒙果醫院第一次撞到哈利一班人，佢首先多謝哈利佢哋喺學校對奈威嘅照顧，亦都同哈利佢哋講奈威係個善良嘅人，但係奈威唔係好似哈利一樣有主動企出嚟反抗嘅勇氣，佢亦都無法蘭克嘅天份，跟住佢發現奈威從來都無向同學講佢父母嘅情況之後就大發雷霆，佢認為奈威應該要為自己父母英勇反抗佛地魔嘅事蹟為榮。

不過，喺奈威參與神秘部門嘅戰鬥之後，就算奈威喺戰鬥入面整斷咗法蘭克曾經用過嘅魔杖都好，奧古斯塔第一次明確咁表達咗對奈威嘅讚賞。奧古斯塔喺《混血王子的背叛》開頭陪住奈威去買咗一支真正屬於奈威自己嘅魔杖，而呢支魔杖（或者係源於奈威對自己嘅自信）令佢喺最後兩輯嘅表現更加活躍。《死神的聖物》係奧古斯塔同佢個孫仔之間關係嘅明確轉折點，喺嗰輯小說嘅高潮部分，當奈威喺霍格華茲嘅第７年，佢所領導嘅鄧不利多的軍隊得到支持，奧古斯塔最終為佢而覺得無比嘅自豪；據透露當奈威擔任改革咗之後嘅鄧不利多的軍隊領袖嗰陣，食死人就將佢哋針對嘅目標轉到去奧古斯塔身上。魔法部嘅官員約翰·道利什被派去拉佢但係唔成功，當佢喺走佬前明顯咁反擊，結果最終令到道利什被送咗入去醫院。奧古斯塔後嚟亦都喺霍格華茲大戰入面幫佢個孫仔。當哈利同佢講話奈威喺度同食死人作戰緊嗰陣時，佢嘅回應係「自然係咁」。奧古斯塔係魔法格鬥嘅高手，佢喺變形術同埋黑魔法防禦術都有唔錯嘅造詣，不過令人意外嘅係，佢通過唔到符咒學嘅普等試，而佢同麥教授似乎係熟人。

外觀上

小說入面對奈威嘅形容係面圓嘅細路。喺《阿茲卡班的逃犯》裡面，哈利對奈威同彼得·佩迪魯嘅身體進行咗一啲比較。羅琳喺2000年嘅一次訪問入面醒起佢同一位讀者嘅對話，當中佢將奈威形容為「矮而圓碌碌嘅金髮綠眼嘅人」。

性格上

喺成個系列頭兩輯嘅大部分時間入面，奈威·隆巴頓被形容做無自信同埋怕醜。

喺第３輯小說裡面，奈威嘅幻形怪被揭露係石內卜教授，呢個係由於佢驚鬼咗嗰個魔藥學教授而心裡面覺得好恐懼。羅琳話，作為一個老師，「你能夠做最差同最爛嘅事」就係恰學生。奈威喺成個系列嘅大部分時間入面，佢同露娜·羅古德喺霍格華茲裡面都俾人孤立起上嚟。就算路平教授係最早鼓勵奈威嘅其中一個人，不過呢個角色喺第５輯開始變得更加有自信。喺最後一輯小說入面，當奈威成為咗霍格華茲嘅反抗軍領袖，仲受到一班同伴嘅極大欽佩嗰陣，呢種情況將奈威嘅性格推向睇都睇唔到嘅極限。不過，奈威由第一輯小說開始就表現出極大嘅勇氣，呢個特點都得到鄧不利多嘅承認—勇於對抗自己嘅朋友，仲俾羅琳睇重佢高過晒所有其他嘅美德，不過佢形容奈威並無「哈利喺打魁地奇嗰陣所表現出嚟嘅嗰種華麗嘅男子氣概」。

魔法能力同技巧

奈威喺嗰個系列嘅第１輯小說入面被形容做一個唔稱職嘅巫師，佢喺學校嘅技能亦都好渣（淨係除咗草藥學之外）。呢個角色本人喺第２輯小說入面透露，佢屋企人（尤其係佢阿嫲）甚至擔心童年時期嘅佢係個「爆竹」，所以當奈威收到霍格華茲嘅入學信嗰陣，佢嘅屋企人先至鬆咗一口氣。由於奈威加入咗一個致力於練習黑魔法防禦術嘅學生組織—鄧不利多的軍隊，令到佢嘅魔法能力喺第５輯裡面大大提升。因為奈威之前嘅魔杖（實際上係佢阿爸嘅）喺《鳳凰會的密令》入面同食死人戰鬥嗰陣整爛咗，所以佢喺《混血王子的背叛》入面有一支用櫻桃木同獨角獸毛整成嘅新魔杖，嗰支新魔杖似乎進一步咁提高咗奈威喺學校裡面嘅表現。

演出

電影

奈威·隆巴頓嘅角色喺《哈利波特系列電影》入面一直都係由馬修·路易斯去做。為咗令到奈威嘅特徵更加突出，路易斯需要戴住個黃色同歪歪斜斜嘅假牙，著住大咗兩個碼嘅鞋，仲喺佢耳後面放咗塊膠片，等路易斯對奈威嘅刻畫被「醜化」咗。喺第５輯電影上映之前，路易斯評論咗奈威嘅角色發展，佢認為「令人驚喜嘅係，奈威呢個角色（喺一定程度上）真係擺脫咗佢「遴leon6迍zeon6」嘅形象。好開心睇到佢最後成為咗一個能夠幫到手而唔會係令成件事變得仲衰嘅角色，我好期待第５輯電影，幾乎要扮演一個唔同嘅角色，呢個將會係一件好過癮嘅事。」當佢被問到係咪覺得同奈威有關嗰陣，路易斯答話自己同佢個角色一樣「遴迍仲好大頭蝦」，但佢無「同奈威一樣嘅緊張性格」，佢指扮演一個咁樣嘅人好過癮，就算喺學校裡面會俾人挑剔，但佢仍然會去做啱嘅事。

其他作品

雖然奈威·隆巴頓並無喺《哈利波特：被詛咒的孩子》嘅舞台上出現，但佢被提及做關鍵情節元素嘅一部分。故事講述時間旅行者阿不思·波特（哈利個仔）同天蠍·馬份（跩哥個仔）為咗挽救西追條命而阻止佢贏到三巫鬥法大賽。不過西追被公開咁羞辱，搞到佢走咗上去做食死人嗰條路。當天蠍·馬份返番去到自己嘅時代，佢知道咗迪哥里做食死人嘅唯一重要行為就係謀殺咗被認為係無關重要嘅奈威。最後因為奈威無參與到霍格華茲大戰，佛地魔喺嗰個時間線上面征服晒成個魔法世界，咁就搞到哈利被殺死，而阿不思·波特亦都因為咁而唔再存在喺世界上。

相關情節

頭四輯小說

内文：哈利波特：神秘的魔法石、哈利波特：消失的密室、哈利波特：阿茲卡班的逃犯同哈利波特：火盃的考驗

睇埋：哈利波特：神秘的魔法石 (電影)、哈利波特：消失的密室 (電影)、哈利波特：阿茲卡班的逃犯 (電影)同哈利波特：火盃的考驗 (電影)

奈威·隆巴頓都有出現喺每一輯小說同埋電影入面，但係佢出現嘅次數並唔係好多：

奈威喺《神秘的魔法石》入面第一次出現喺霍格華茲特快列車啱啱開始旅程之前，當時觀眾睇到佢由阿嫲陪住一齊搵佢隻寵物蟾蜍—吹寶Trevor。奈威後來同哈利、榮恩同妙麗做咗朋友，仲參與咗喺第一集佢哋呢個３人組嘅一啲冒險；奈威曾經喺飛行課嗰陣喺飛天掃把上面撻咗落地面，俾胡奇夫人帶咗去校內嘅醫院側翼嚟做治療；奈威喺霍格華茲嘅第一年做咗一樣重大嘅貢獻：當佢見到哈利佢哋三個就嚟違反校規仲可能對葛萊分多學院造成更大傷害嗰陣，佢試過企起身嚟同啲朋友對抗，後嚟俾妙麗施展全身鎖咒而當場瞓低咗，佢亦都因為咁而贏得鄧不利多校長嘅讚賞同尊重。對於呢個行為，鄧不利多校長喺學期尾嘅結業晚宴度特別提到佢個名，話「阻止敵人要有足夠嘅勇氣，但阻止朋友就需要更大嘅勇氣」，仲將最後嘅１０分俾佢嚟令到葛萊分多學院可以打敗蟬聯咗好多年嘅史萊哲林學院，成為學院總冠軍仲贏埋學院盃。

喺《消失的密室》入面，就算奈威係個純血巫師，但由於佢「幾乎係個爆竹」—無魔法天份嘅學生，搞到佢好擔心史萊哲林嘅怪物會攻擊自己。不過，新任嘅黑魔法防禦術教授雷木思·路平喺《阿茲卡班的逃犯》裡面透過要求奈威對抗同摧毀幻形怪（佢自己內心嘅恐懼），成為咗第一個幫佢發揮自己真正力量嘅人之一，而奈威亦都成功咁做到咗。

根據《火盃的考驗》入面透露，奈威係由佢嫲嫲奧古斯塔·隆巴頓Augusta Longbottom湊大嘅，因為奈威嘅父母俾食死人小巴堤·柯羅奇、貝拉·雷斯壯仲有道夫·雷斯壯仲有巴坦·雷斯壯用酷刑咒折磨去到精神錯亂嘅地步嚟攞有關佛地魔喺倒台之後下落嘅消息。喺小柯羅奇假扮瘋眼穆敵嘅黑魔法防禦術課堂上面，奈威因為睇到小柯羅奇用酷刑咒騷咗對蜘蛛嘅影響出嚟而嚇親；之後，奈威邀請妙麗做聖誕舞會嘅舞伴但結果慘被請食檸檬，結果由金妮用朋友嘅身份嚟陪佢去舞會。

鳳凰會的密令

内文：哈利波特：鳳凰會的密令同哈利波特：鳳凰會的密令 (電影)

奈威喺呢輯小說同電影入面加入咗鄧不利多的軍隊，佢嘅魔法能力喺哈利喺會面期間嘅指導之下顯著咁提高咗，然後佢專心致志咁投入去哈利嘅訓練計劃裡面。奈威喺呢輯比之前有更加多嘅人物描述，喺哈利同佢班朋友喺聖蒙果醫院裡面見到奈威父母嘅情況開始，哈利同讀者都因為咁而想更加深入咁了解佢。

喺小說嘅高潮部分，奈威同哈利、榮恩、妙麗、金妮仲有露娜呢班鄧不利多的軍隊成員一齊參與闖入咗神秘部門，仲喺裡面同食死人戰鬥，佢喺過程中意外咁打爛咗有關哈利同佛地魔嘅預言。跟住，當年聽到呢個預言嘅鄧不利多向哈利解釋話，呢個係同一個有能力打贏佛地魔嘅巫師有關—「被選中嘅人The Chosen One」，而呢個「被選中嘅人」將會喺「七月死嗰陣as the seventh month dies」誕生，所以咁就可以指嘅係1980年7月31號出世嘅哈利，又或者係7月30號出世嘅奈威。喺佛地魔出於自己嘅選擇而搵到波特一家仲俾人打敗咗之後（鄧不利多相信，佛地魔之所以咁揀係因為哈利同佛地魔一樣都係混血巫師，而奈威就係純血巫師），神秘部門嘅官員因為咁樣就認定咗呢個預言所指嘅對象係哈利而唔係奈威，不過哈利直到霍格大戰完結之前都無同奈威講清楚呢個預言嘅內容。

根據羅琳嘅講法，呢個「並無將一種隱藏嘅力量或者係神秘嘅命運俾奈威......奈威仍然係一個『可能已經存在』嘅逗引。」

混血王子的背叛

内文：哈利波特：混血王子的背叛同哈利波特：混血王子的背叛 (電影)

奈威喺呢輯小說同電影入面有一支新嘅魔杖，因為佢支魔杖實際上原本係屬於佢阿爸嘅，仲喺上一輯小說同電影入面同食死人交鋒嗰陣整斷咗。喺去霍格華茲嘅嗰程火車上面，奈威得到赫瑞司·史拉轟嘅邀請加入佢嘅史拉轟俱樂部，不過佢好明顯通過唔到史拉轟嘅第一次試驗，搞到佢喺之後嘅聚會度無再被邀請。據透露，奈威喺草藥學方面攞到「傑出」嘅成績，而佢喺黑魔法防禦術同符咒學入面嘅表現都好出色，喺巫師考試度攞到「超乎期待Exceeds Expectations」嘅成績。

奈威因為覺得鄧不利多的軍隊呢個組織可以幫到佢同其他人提高咗佢哋嘅魔法技能，所以就好希望佢哋嘅會議可以繼續落去，不過後嚟因為呢個組織而家無一個「啱嘅老師」而停咗，就正如哈利所講嘅咁樣無必要。當一班食死人喺跩哥·馬份嘅帶領下攻擊霍格華茲城堡，就算奈威受咗輕傷都好，佢都響應咗求救號召，嚟再同食死人對戰。奈威喺鄧不利多就嘅葬禮上面得到露娜嘅陪伴同幫助，而哈利因為佢哋係淨低嘅兩個鄧不利多的軍隊成員，所以對佢哋兩個產生咗一種「強烈嘅感情」，亦都淨係得佢哋兩個成員可以喺食死人嘅戰鬥之中幫到榮恩、妙麗同金妮。

死神的聖物

内文：哈利波特：死神的聖物、哈利波特：死神的聖物1同哈利波特：死神的聖物2

想知多啲：死神聖物

喺《死神的聖物》裡面，霍格華茲嘅控制權喺哈利缺席嘅情況下落入咗石內卜同埋食死人艾米克·卡羅仲有艾朵·卡羅嘅手上。奈威喺霍格華茲７年級嘅大部分時間都係作為反對佛地魔接管嘅反抗軍領袖，奈威仲同露娜仲有金妮一齊重新啟動咗鄧不利多的軍隊，仲喺哈利唔喺度嗰陣暫代住領導崗位嘅職務，同埋去幫嗰啲喺新政權下受折磨嘅學生。奈威透露，卡羅兄妹毆打過佢，食死人當佢喺學校搗亂嗰陣就針對佢阿嫲。奈威後嚟匿埋喺萬應室，佢喺嗰度表現出令人難以置信嘅領導能力。哈利返到去霍格華茲之後，奈威就向鄧不利多的軍隊成員發消息，後者掉返轉又收集咗鳳凰會嘅消息。

喺霍格華茲大戰入面，哈利兩次發現奈威運用佢嘅草藥學知識嚟幫佢哋抵禦入侵者，後嚟有人見到奈威正喺度幫奧利佛·木透Oliver Wood去搬柯林·克利維嘅遺體。當佛地魔帶著明顯係無生命跡象嘅哈利遺體返嚟嗰陣，奈威首先企起身出嚟反抗佢，仲喺分類帽入面抽出收埋同隱藏喺裡面嘅葛萊分多寶劍，仲用呢把劍嚟將佛地魔嘅蛇妖—娜吉妮斬頭，咁就成功將佛地魔最後嘅分靈體摧毀埋，令到佛地魔又再變返做凡人。

當戰鬥入到去交誼廳嗰陣，奈威幫榮恩打低狼人首領焚銳·灰背。霍格華茲大戰贏咗之後，奈威受到一群仰慕者嘅包圍。

小說後嚟嘅生活

喺《死亡的聖物》嘅結尾，１９年後嘅金妮提到，奈威喺霍格華茲畢業之後得到新任校長米奈娃·麥請咗佢做學校嘅草藥學教授。

羅琳喺一次訪問入面提到，奈威喺好多欽佩佢嘅學生面前騷咗佢嘅鄧不利多的軍隊硬幣出嚟，佢仲將關於自己嘅冒險經歷話俾佢哋知。羅琳仲透露咗有關奈威嘅更多信息，指佢後尾同咗赫夫帕夫學院嘅同學—漢娜·艾寶結婚，艾寶後嚟來做咗破釜酒吧嘅老闆娘。呢對夫婦喺結婚之後住咗喺破釜酒吧樓上，羅琳認為啲人會覺得呢樣嘢係「型到震」嘅事實。

迴響同評價

因為奈威·隆巴頓嘅角色喺整個系列入面令人印象好深刻，奈威一般被認為係《哈利波特》系列最偉大嘅人物之一。《帝國雜誌》將奈威列為「佢哋最鍾意嘅哈利波特角色」嘅第八位；而《IGN》將奈威列為嗰個系列嘅「嗰個系列人物嘅第六位」，仲話：「奈威·隆巴頓係蠢蛋英雄嘅典型例子」，當我哋第一次喺霍格華茲見到佢果陣，奈威係個怕醜內向嘅人，根本唔叻魔法。其實，嗰啲識得奈威嘅人都暗自懷疑過佢係咪一個爆竹——嗰啲出生喺巫師世家，但係就無魔法能力嘅人。佢嘅人格好得人鍾意，但係佢早期嘅不幸並無明確咁預示佢他最終會成為英勇嘅霍格華茲捍衛者。奈威喺頭四輯小說做次要角色，係啲粉絲最鍾意嘅角色，後來佢喺《鳳凰會的密令》升呢做其中一個主角，最終成為咗鄧不利多的軍隊嘅領袖。《哈利波特系列》嘅粉絲欽佩住奈威嘅勇敢、幫父母報仇嘅渴望，同埋佢對哈利、榮恩同妙麗嘅無私協助。

奈威喺《鳳凰會的密令》嘅預言所扮演嘅角色，令人成日假想如果「被選中嘅人」係奈威而唔係哈利嘅情況。成日有人認為佛地魔揀哈利而唔係奈威係因為哈利嘅混血身份。最後，佢哋兩個都成為咗佛地魔倒台嘅關鍵，體現咗哈利同奈威實際上都係「被選中嘅人」嘅可能性。當哈利以最後一擊嚟摧毀佛地魔嗰陣，奈威同時摧毀埋最後嘅分靈體，呢個令到哈利可以終結到佛地魔嘅命運。當被問到奈威係咪「被選中的人」嗰陣，飾演奈威嘅馬修·路易斯話：「我被問到非常多關於預言嘅問題，仲有奈威作為『被選中嘅人』嘅潛力。兩個人之間嘅對比係，哈利係喺唔情願之下而成為嘅英雄，佢從來唔想孭起責任...等等，只係覺得自已一定要咁樣做。不過奈威係嗰種無人期望佢會做到英雄嘅嗰種英雄，咁啱係喺另一面。奈威會係『被選中嘅人』咩？他能夠做到哈利所做嘅事咩？我諗係呀，絕對會。但問題係：呢個系列入面無人能夠單靠自己完成晒所有嘅嘢。就連佛地魔本人都無法靠自己嚟達到佢而家嘅力量。哈利之所以挽救到世界，係因為佢有朋友同愛佢嘅人。我諗，如果係奈威，佢都會有類似嘅經歷。兩個角色都有住極高嘅忠誠，呢個都令其他人對佢哋忠誠。所以我認為奈威嘅背後會有好多人撐佢，哈利都會喺嗰度為扮演奈威嘅角色嚟撐佢。所以我諗，係呀，佢最後會撐到過去嘅。」