揞口費

揞口費am2 hau2 fai3（英文：Hush money）係一種檯底協議嘅稱呼，一般都係一邊畀錢另一邊，嚟換取幫自己收埋一啲唔想出街嘅秘密。呢啲料甚至唔需要係真實，只需要係會影響到個人嘅聲譽。

雖然揞口費唔一定係犯法，不過因為好多時都係喺一啲本身已經係法律比較模糊嘅情況下先會做。一般嚟講，只要同意隱瞞嘅嘢係合法，就唔會有法律衝突。不過一到要隱瞞非法嘅料或者行動，就係犯法。而且，一般為咗隱瞞事件，都會講大話，一旦係喺法庭上面發生，就即刻會係犯咗偽證罪（英文：Perjury）。

有時候，揞口費會通過簽NDA嘅形式嚟實行，因為（假設協議本身係合法）比較要法律牙力，要到上庭先至可以廢除份NDA。