東京喵喵

《東京喵喵》（日文：東京ミュウミュウ），係一部由征海未亞繪畫，吉田玲子構思故事嘅日本魔法少女漫畫，2000年喺《Nakayoshi》開始連載，至到2003年完，單行本7冊。之後有續集《東京喵喵part II》（日文：東京ミュウミュウあ・ら・もーど），單行本2冊。

佢喺2002年出咗電視動畫，喺東京電視網首播，有52集。喺香港亞洲電視首播嗰陣叫《貓貓戰隊》，重播就改名做《東京喵喵》，香港有線電視播嗰陣叫《東京Mew Mew》。

2020年宣佈將會重新動畫化。新動畫叫《東京喵喵New》，第一期喺2022年7月至9月響東京電視網播，共12集，第二期喺2023年4月開始播。

故事簡介

外星人嘅祖先喺三億年前響地球度住，後尾因為環境惡化而被迫搬去其它星球度住，但嗰度啲環境仲差過地球，佢哋想返去地球但係做唔到，依家佢哋有幾個人嚟咗地球度，打算消滅啲人類，畀啲同胞返嚟地球住。「喵喵咖啡屋」嘅主人白金稜同朋友赤坂圭一郎為咗阻止外星人嘅行動，就實行「喵計劃」，將Red Data Animals嘅DNA注入五個女仔度，令佢哋喺變身之後有神奇嘅力量可以對抗啲外星人。呢五個女仔組成「東京喵喵」，同啲外星人戰鬥，為地球嘅未來而努力。最後「東京喵喵」成功保衛咗地球，外星人亦都搵到改善自己星球環境嘅方法。