煤氣燈效應

2021 年响蘇黎世影到嘅一盞煤氣燈

點煤氣燈（粵拼：dim2 mui4 hei3 dang1）係心理操縱嘅一種手法，指操縱者做啲嘢嚟令到目標質疑自己嘅感知，從而令目標做操縱者想佢做嘅嘢。點煤氣燈嘅簡單例子有操縱者質疑目標嘅記憶—「你記錯喇，我根本冇講過 X，係你記性唔好」（但查實操縱者真係講過 X），操縱者可能會理直氣壯噉講出呢啲說話，令到佢嘅操縱目標真係質疑自己係咪有能力做正確判斷，於是就會產生煤氣燈效應，操縱者可以進一步作出「你記性唔好，等我幫你做判斷啦」噉嘅「勸告」。

點煤氣燈呢種舉動係一種頗嚴重嘅心理操縱，甚至可以構成虐待，而且喺各種嘅人際關係—包括屋企人、朋友同埋親密伴侶之間—都有可能發生。

個名點來

内文：恨鎖瓊樓

點煤氣燈取自英文字詞

Gaslighting

當中 gaslight（IPA：/ˈɡaslʌɪt/）係名詞指煤氣燈，而隻字詞加咗 -ing 尾表示當咗佢係動詞噉嚟用。一般認為，呢隻字詞出自 1944 年嘅美國電影《恨鎖瓊樓》—套戲嘅英文名叫 Gaslight，套戲講到女主角畀佢老公操縱佢，佢老公多次噉同佢講話佢個腦有問題（或者類似嘅說話），從而誘使佢聽話。打後心理學家就採用咗 gaslighting 呢隻字詞嚟指「眨低對方做判斷嘅能力，從而操縱對方」噉嘅行為。

基本招數

睇埋：黑暗三角特質同心理操縱

點煤氣燈嘅重點，係要令操縱嘅目標質疑自己嘅理智、記憶甚至智力，再令目標信操縱者嘅判斷多過自己嘅判斷，最後操縱者就達致趁機會「引導」操縱目標做判斷。操縱者可能仲會配合以下嘅招數：

• 操作周圍嘅環境，例如暗中將操縱目標嘅物品收埋，等操縱目標以為自己成日唔記得啲嘢擺咗去邊，更大機會會開始質疑自己嘅記性。
• 嘗試減低操縱目標對自己以外嘅人嘅信任，甚至想操縱目標切斷其他關係，等操縱目標淨係聽佢講。

心理學家指出，同輩之間出現以下呢啲對話，都係點煤氣燈嘅跡象：

• 操縱目標作出咗一樣指控，操縱者講：「你記錯喇。你知自己記性不溜都差㗎啦。」
• 操縱目標講返起操縱者以前做過嘅錯事，操縱者講：「我從來都冇噉做過。」
• 操縱目標表達咗不滿，操縱者講：「你份人敏感得滯。」
• 「你竟然咁小事就喺度喊，反應太大喇啩？」
• 「你應該為你所做嘅事道歉！」
• 「你一定係癲鬼咗。」

—呢啲說話嘅重點，都係在於要貶低操縱目標嘅觀點。如果操縱者具有某啲權威或者操縱目標明顯自我肯定冇咁高（唔信自己嘅能力），點煤氣燈嘅情況就特別大機會會發生。因此，點煤氣燈呢種手法被指係自戀嘅人零舍鍾意用。

心理影響

一個人如果有意又重複噉對佢嘅目標點煤氣燈，會對受操縱者造成各種嘅負面影響。首先，如果受操縱者真係信咗操縱者講嘅嘢，操縱者往往會喺段關係當中得到相當大嘅主導權，即係想像

「嗱，你知你自己唔識做決定㗎啦，等我幫你做啦。我都係為咗你好啫。」

噉嘅說話。噉嘅情況亦都傾向會令受操縱者更加依賴操縱者，仲會對受操縱者造成以下嘅影響：

• 極度優柔寡斷，唔能夠自己做決定；
• 硬係覺得自己做錯咗嘢；
• 成日都喺度道歉；
• 焦慮；
• 同屋企人、朋友或者伴侶少咗交流；
• 唔鍾意同操縱者以外嘅人建立關係；

一般認為，點煤氣燈呢種行為存在，就表示操縱者同受操縱者之間嗰段關係非常唔健康。而好多心理學家都主張，一個人如果發覺自己身邊嘅屋企人或者朋友畀人點煤氣燈，應該要考慮幫佢哋尋求協助或者心理輔導。

睇埋

• 謬論：事實表明，好多人都會將啲謬論聲大夾惡噉講出嚟，彷彿好似「我深信呢個諗法」就等如係證據噉。
• 大話
• 信任
• 家庭暴力
• 決策

連結

• （香港繁體） 愛情系列-「煤氣燈效應」(gaslighting)（局部粵文），香港青年協會
• （香港繁體） Gaslighting 如何對付「點煤氣燈」的人？（局部粵文），晴報
• （英文） 哈佛心理學家分享 9 句「點煤氣燈嘅人」實會用嘅有毒語句—同埋要點樣畀反應，CNBC Make It