糖

  想搵零食嘅話，請睇糖 (零食)。

糖

典型糖放大圖。

糖（音「堂」；粵拼：tong4）係甜味嘅嘢食，亦係調味品，化學成份係醣，諸如葡萄醣、菓醣、蔗醣等。

一般聯想起糖，就係蔗汁提煉出蔗糖，但亦有其他如蜜糖等等。

飲食

睇埋：癡肥同體重管理

攝取太多糖份會引致癡肥等嘅問題，提升好多種嚴重疾病嘅機會率。有見及此，有唔少研究者都著力研究點樣先可以鼓勵人唔好飲同食太多糖份，希望幫佢哋取得個平衡。

根據世衞喺 2015 年出嘅指引，無論係乜嘢年紀同性別，一個人每日攝取嘅卡路里當中應該要有少過 10% 嘅源自額外糖—額外糖包括加落食物同飲品嗰度嘅單醣同雙醣，以及蜜糖同果汁入邊自然存在嘅糖。

具體啲噉講，一個普通大人一日大約要食起馬 2,000 - 3,000 卡路里，一個每日食 2,000 卡路里嘅大人，每日只可以食 200 卡路里嘅額外糖，呢個數值大約相當於 12 茶羹嘅糖。

簡史

遠古人最已知蜜、生果、稻米等，係有甜味。最早嘅糖，係飴糖，卽麥芽糖，由米同麥芽而成。所以糖字跟米部，亦有其源。

語文

糖係文獻中，亦寫餹。

粵語小知識

糖呢隻漢字喺粵語裡邊有兩種讀法，用唔同讀法意思可以幾唔同：

• 粵拼：tong4 / 「唐」—又或者叫糖份，調味料一種，通常以白雪雪嘅粉末或者方塊嘅形式出現，可以加落食物度提供甜味。
• 粵拼：tong2 / 「躺」—零食一種，以糖份做主要成份，通常會加啲色素落去，令佢哋望落五顏六色噉，更加受細路仔歡迎。

睇埋

• 甜味
• 糖 (零食)
• 代糖
• 糖精
• 糖水
• 蜜糖
• 糖果屋