Artrovament archeològich ëd la sità 'd LibarnaLe rèis ëd Seraval a armonto a la sità 'd Libarna, ch'as trovava an diression d'Arquà. La sità a goernava 'n teritòri popolà da tribù ligurin-e e sota l'ansëgna 'd Roma a l'era n'important sènter aministrativ, produtiv e comercial an sla Via Postumia, la strà che da Génoa a mnava a Torton-a e Piasensa, e peui fin a Aquileia. Antra ij sécoj ch'a fan IV e V, Libarna a va an declin për la fin dl'Imperi Roman e për le invasion barbàriche, e a dven mach un vilagi con na gesia ciama Piev ëd Linvern. Con la dominassion longobarda, un neuv borgh a nass an sël Brich ëd l'Armanin-a. Apress l'età 'd Carl Magn, ël goern dël pais a passa al Vëscovà 'd Torton-a fin al 1122, quand ch'ël vësco a armët ël podèj an man a la Comun-a 'd Torton-a. Dël 1140 a compariss ël nòm ëd Seraval, për via dla posission dël pais ch'a sarava la gòrgia dla Scrivia.
An séguit Seraval a passa da possediment tortonèis a Feod Imperial, goernà prima da la famija Spìnola dal 1313, peui daj Viscont che a na manten-o la giurisdission ma a la rendo andaré a jë Spìnola dël 1482. Dal Sinchsent a ven istituì la Comun-a 'd Seraval, ch'a l'é pì nen considerà feod ma a passa sota al Ducà 'd Milan, controlà da j'ëspagneuj. D'apress a la Guèra 'd Sucession Ëspagneula, dël 1713 Seraval a passa a j'austrìach e dal 1738 al Regn ëd Sardëgna dij Savòja. A la fin dël Setsent, le guère 'd Napoleon Bon-a-part a pòrto àutri cambiament: ël pais a passa a la Repùblica Lìgure e peui diretament a l'Imperi Fransèis. La Colegià dij Sant Martin e StéoNapoleon a fa campé giù 'l castel ëd Seraval dòp la Bataja ëd Marengh. Tornà ai Savòja, dal 1819 al 1859 Seraval a l'é comprèisa ant la Provinsa ëd Neuve, sota la Division ëd Génoa e a cap d'un mandament ch'a comprendìa Arquà, Borghet Borbaja, Vigneule, Stassan e Grondòuna. Dal 1859, an séguit a la riorganisassion aministrativa dël Decret Rattazzi (Lèj n.3702, 23 otóber 1859) a passa ansema a tut ël Circondari ëd Neuve a la Provinsa ëd Lissandria e al Piemont.
L'Eutsent a l'é 'dcò ël sécol ëd l'espansion econòmica dël pais: dël 1821 a ven completà la strà dël Pass dij Giov ch'a colega Génoa con la pian-a e con Turin, dël 1851 an Arquà a riva la ferovìa Turin-Génoa. Ëd j'agn Trenta dël Neuvsent a l'é la costrussion ëd la Camional Génoa-Val dël Pò, che da Génoa a términava a nòrd pròpi a Seraval e ch'a costituiss ël prim tòch ëd la futura Autostrà A7 Milan-Génoa (ancora ancheuj ciamà Milan-Seraval).
Seraval a l'é 'dcò arnomà për ël Serravalle Designer Outlet, duvert dël 2000 an diression ëd Neuve. Con pì che 250 negossi 'd marca, a l'é un ëd j'outlet pì grand d'Euròpa.
