墨
 |
想搵第二個意思嘅話，請睇墨 (搞清楚)。
墨係中國古代書寫同繪畫用到嘅墨錠，主要原料有炭黑、松煙、膠等，係碳元素以非晶質型態嘅存在。將墨放喺墨硯度用水研磨，就可以産生用嚟寫毛筆字或畫水墨畫用嘅墨汁。呢啲墨汁，係碳喺水入面以膠體嘅溶液存在。
墨嘅水分及膠嘅成分唔同，會影響到墨嘅黏度。喺唔同場合使用嘅墨，佢嘅黏度都唔一樣。另外，初初整好啲墨嘅水分亦都比較多。另外有啲存放時間比較長嘅墨，佢哋嘅緻密度較高，並且經過長年累月嘅乾燥，令到墨色嘅立體感更高。呢種墨喺日本被稱為「古墨」。
史
[編輯]
喺中國考古發掘出來，可以上溯到西元前14世紀嘅骨器同石器上面，已經有墨迹。掘出嚟殷商嗰時嘅龜甲卜骨上面，除咗刻咗文字之外，亦都有見到用墨同埋朱墨寫嘅字；喺湖北雲夢縣亦都有掘到戰國時代嘅墨塊。《莊子》中有句『舔筆和墨』，話喺春秋戰國時代，已經開始用毛筆同埋墨水。喺文字之外，墨亦有用喺紋身度。漢朝時有一種叫做「黥面」嘅懲罰，就係用一種由墨丸磨出嚟嘅墨紋喺犯人塊面上面。
製造
[編輯]明代宋應星寫嘅《天工開物》一書卷十六《丹青》篇嘅《墨》章，對於用油煙、松煙製墨嘅方法有好詳細嘅敘述。墨煙嘅原料包括有：桐油、菜油、豆油、豬油同埋松木；其中以松木佔十分之九，其餘佔十分之一。
燒油取煙法
[編輯]- 宋趙彥衛《雲麓漫鈔》引蘇東坡詩《歐陽季默以油煙墨二丸見餉各長寸許戲作小詩》『書窗拾輕煤，拂帳掃餘馥。辛勤破千夜，收此一寸玉』，話係掃燈煙制墨。
- 宋朝趙彥衛《雲麓漫鈔》有一段文記載燒桐油制墨法：『邇來墨工以水槽盛水，中列盆碗，燃以桐油，上覆以一碗，專人掃媒，和以牛膠，揉成之，其法甚快便，謂之油煙。或訝其太堅，少以松節油或漆油同取媒，尤佳。』（《雲麓漫鈔》卷第十）。
- 大明《天工開物》記載嘅燒油取煙法：將桐油、清油或豬油放入油燈中燃點，油燈上方有鐵蓋收集油煙。每個熟練嘅工人可以掌管兩百盞油燈，動作要敏捷，否則油煙老過頭。然後用鵝毛刷輕輕將鐵蓋表明層嘅油煙刷入紙片上，就係上等油煙，造出嘅墨精美有光澤。鐵蓋裏層油煙，必須用力刮下嘅係次等油煙。每斤油可刮取約一兩上等油煙。
燒松木取煙法
[編輯]地上搭十幾丈（1丈有 3.3米）長嘅竹棚，用紙同草席密封，竹棚同地面聯接嘅地方，用泥密封。竹棚上每隔一段開一個窿出煙，竹棚內用磚鋪通煙道。
斬取松木必須將松樹幹底部鑽窿，點火烤樹幹，畀松香流淨，即使殘留一點松香，燒出嘅松煙，質量唔好。將松木斬塊堆入竹棚，從竹棚前端點火，連燒幾日，松煙從竹棚前端向竹棚後端彌漫，冷卻之後就可以入竹棚刮取松煙。從竹棚後段刮取嘅松煙叫清煙質量最好，供優質墨料，中段刮取嘅係二等松煙，叫『混煙』，用做普通墨；前段刮取嘅松煙叫『煙子』，供印刷用。
墨煙處理
[編輯]明代文獻中通用嘅有兩個方法：
- 篩選法：用細絹篩將油煙或松煙篩選出細淨均勻嘅墨煙。
- 沈澱法：油煙或松煙放入水池中，久浸沈澱，上層細而勻是精料。
配料
[編輯]制墨嘅配料各家都唔同，常常秘而不宣。通常包括雞蛋白、魚皮膠、牛皮膠同各種香料、藥材丁香、紫草、秦皮、蘇木、白檀、蘇合香、珍珠等等。各種配料有成一千種。
搗練
[編輯]將煙料、配料、成煙料團，放入鐵臼中「搗練」三萬次，或用鐵錘𢱕（dap）煙料團一萬次就成爲墨團。
墨錠
[編輯]將墨分成細塊放入銅模或木頭模度，壓成墨錠。墨錠形狀有：長方形、圓形、橢圓形、半月形、圓柱形、鳥獸型等；圖案有彌勒佛、十二生肖、松、鳳、鶴、魚、鳥、花乜都有。
傳播
[編輯]西元2世紀墨傳入日本，喺奈良時期連製墨嘅方法都傳入。喺西方，製墨方法傳到印度之後，演變成為劃畫用嘅印度墨，係西方畫師最鐘意嘅黑色顏料。
制墨名家
[編輯]
李廷珪本姓奚，因爲南唐後主制墨，賜李姓。李廷珪墨以松煙、珍珠、龍腦、白檀、魚膠爲原料，製成嘅墨堅如玉，宮中用來畫眉毛。到明代李廷珪墨貴如珍寶。
墨汁
[編輯]墨汁係墨嘅膠體溶液，用來寫毛筆字用嘅，唔使用墨硯磨墨、預先已經入樽，倒出來就可以即刻用。
參考
[編輯]- 《雲麓漫鈔》宋趙彥衛著。
- 《天工開物》明宋應星著 蘭州大學出版社 ISBN 7-311-02414-5
- 《中國紙和印刷文化史》美 錢存訓著 廣西師範大學出版社, 2004 ISBN 7-5633-4472-1
- 《長物志》明文震亨著 山東畫報出版社 ISBN 7-8603-779-9