Vlag van Lesotho

Vlag van Lesotho

Vlag van Lesotho
Gebruik	Nasionale vlag en vaandel
Verhouding	2:3
Goedgekeur	4 Oktober 2006
Ontwerp	’n Horisontale driekleur in blou, wit en groen met ’n Basothohoed in die middel van die wit baan.

Die nasionale vlag van Lesotho is op 4 Oktober 2006 amptelik in gebruik geneem. Die vlag vertoon ’n horisontale driekleur in blou-wit-groen met ’n Basothohoed in die middel van die wit baan (dit oorskry nie die grense van die wit baan nie).

Simboliek

’n Tradisionele mokorotlo

Die ontwerp stel voor dat Lesotho vrede met homself en sy bure het. Wit stel vrede voor, blou stel reën voor en groen stel rykdom asook die vermoë om self voedsel te produseer, voor. Die embleem stel die tradisionele Basothohoed voor, die sogenaamde mokorotlo. Dit is ’n nasionale simbool; die nuwe parlementsgebou in Maseru is ook in die vorm van so ’n hoedjie.

Die betekenisse van die kleure is soos volg:

Kleur	Betekenis
Blou	verteenwoordig die hemel of reën.
Groen	verteenwoordig voorspoed.
Wit	verteenwoordig vrede. Lesotho het die ideologie van vrede sedert die tye van Koning Moshoeshoe I gehad.

Ontwerp

Die middelste (wit) baan is groter as die ander twee; die verhouding is 3:4:3. Die hoedmotief neem 92% van die hoogte van die wit baan in beslag. Die Suid-Afrikaanse heraldikus Frederick Brownell het heraldiese advies aan die ontwerper van die vlag van Lesotho verleen.

Ander vlae

• 
  2:3Basotho National Party
• 
  2:3 Nasionale vlag, 1966 tot 1987
• 
  2:3
  Nasionale vlag, 1987 tot 2006

Koninklike standaarde

Die huidige vlag is die derde vlag van die land. Die eerste vlag is op 4 Oktober 1966 in gebruik gestel; dit is die dag wat Lesotho onafhanklikheid van die Verenigde Koninkryk verkry het. Hierdie vlag toon, net soos die huidige vlag, die Basothohoed, maar dit is wit, en teen ’n blou agtergrond. Die blou simboliseer reën en die lug en die wit hoed stel vrede voor. Aan die linkerkant van die vlag is twee vertikale bane in groen en rooi. Die oorspronklike idee van die ontwerper Peter Hancock om geel tot die vlag toe te voeg is afgeskiet omdat die Basotho Congress Party wou hê dat die kleure op die nasionale vlag moes ooreenstem met die kleure van die partyvlag.

Die tweede vlag is in 1987 aanvaar nadat die Basotho National Party deur middel van ’n staatsgreep aan bewind gekom het. Hierdie vlag toon die tradisionele Sotho-skild, wat beskerming van vrede simboliseer. Die kleure blou, wit en groen op die tweede vlag het dieselfde betekenis as op die huidige vlag.

In 1993 het die militariste die mag aan ’n burgerlike regering oorgedra, maar die vlag van 1987 het steeds in gebruik gebly. Vanweë die militêre verbintenis van die vlag het vele Basotho’s gehoop op ’n nuwe vlag; dit het in 2006 ’n werklikheid geword.

• 
  2:3 Koninklike standaard, 1966 tot 1987
• 
  2:3 Koninklike standaard, 1987 tot 2006
• 
  2:3 Koninklike standaard, sedert 2006

Eksterne skakels

• (en) Lesotho by Flags of the World
• (en) Lesotho News: Senators give new flag green light Geargiveer 8 Desember 2008 op Wayback Machine
• (en) "Flag of Lesotho". Encyclopædia Britannica. Besoek op 14 Mei 2019.

Hierdie artikel is in sy geheel of gedeeltelik vanuit die Nederlandse Wikipedia vertaal.