Sliedrecht

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Sliedrecht (Hollands: Slierech) is 'n plaots en 'n gemeinte in de Nederlandse provincie Zuid-Holland, in de Alblasserweerd, aon de reveer de Beneden Merwede, mèt op 1 januari 2006 23.803 inwoeners en 'n oppervlak vaan 13,47 km². Binne de gemeinte ligke gein ander kerne; 't weste vaan de aw lintbebouwing (in de riechting vaan Papendrecht) steit evels bekind es Baanhoek. Sliedrecht is 'n veurstad vaan Dordrech en huurt bij de Drechtsteden.

Sliedrecht is roond 1277 es bediek stuk land oontstande. In 1421 struimde mèt de Elisabethsvlood 't ajdste deil vaan 't dörp eweg. Vaanajds waor Sliedrecht verdeild euver drei hierlekhede: Oversliedrecht of Lockhorst, Naaldwijk (neet te verwarre mèt Naaldwijk in 't Wesland) en Niemandsvriend. In 1759 woorte Oversliedrecht en Naaldwijk vereineg, in 1819 woort Niemandsvriend (es hierlekheid allaank in personeel unie mèt de res) es gemeinte opgeheve en bij Sliedrecht geveug.

Sliedrecht is laank neet mie es e dörp gewees. Vaanaof de achtiende iew begós me ziech hei mèt baggere bezeg te hawwe en in de negentiende iew woort Sliedrecht hei wereldbereump door. In 1864 woort hei veur 't iers de stoumbaggermeule touwgepas. Aon dit verleie herinnert 't baggermuseum nog. Nao d'n Twiede Wereldoorlog woort Sliedrecht veural 'n forenzeplaots veur Dordrech. D'n aonlègk vaan e groet bedrieveterrein bij 't dörp, boe-op ziech oonder mie 't allerierste Nederlands warehoes vaan IKEA vestegde, brach evels ouch nui wèrkgelegeheid.