伏見宮博恭王
伏見宮博恭王（日文：ふしみのみや ひろやすおうFushimi Hiroyasu，1875年10月16號—1946年8月16號）係伏見宮第二十五代當主，同時係元帥海軍大將。原名愛賢（日文：なるかた ），花名「長面君」。
經歷
[編輯]佢係伏見宮貞愛親王大仔，但係因為佢係庶出，而細佬邦芳就係正室所生，所以佢唔可以繼承伏見宮。咁啱，華頂宮博經親王嘅獨仔博厚突然死咗，一下子華頂宮就冇咗繼承人，所以佢就畀人派去做華頂宮繼承人。後嚟，由正室所生嘅細佬邦芳身體轉差，而另一個細佬昭德又早死，所以佢響1904年以貞愛親王大仔嘅身份回歸伏見宮，改名叫博恭。
佢曾經參加日俄戰爭黃海海戰，做聯合艦隊旗艦三笠號嘅分隊長，不過佢響爾場仗入面受咗輕傷。響1910年，佢先後做朝日號、伊吹號大佐艦長、橫須橫鎮守府少將艦隊司令官、海軍大學校長、第二戰隊司令、第二艦隊中將司令同埋軍事參議官。響1922年以四十七歲之齡升上海軍大將，係當時日本海軍入面升得最快嘅軍人，連其他親王都冇佢升得咁快。
1923年，老豆貞愛親王死咗，佢正式繼承伏見宮當主一位。
響1924年，佢出任佐世保鎮守府司令長官（第22任）。1932年，佢接任海軍軍令部長同埋將官會議議員，重做埋元帥，係日本第一對元帥「父子檔」（老豆貞愛係陸軍元帥）。響1933年，佢接替谷口尚真，出任海軍軍令部總長。任內，佢同屬下永野修身一齊，積極強化日本海軍，重一直響度推動日德海軍合作。不過響1945年，日本海軍官制畀人廢除，佢冇嗮所有官職。
博恭王響1946年死咗，終年七十歲，伏見宮當主個位由佢個孫伏見宮博明王繼承。
屋企
[編輯]老婆：德川經子（德川慶喜第九個女）
拎
[編輯]| 上一任 貞愛親王 |
伏見宮當主 1923年 - 1946年 |
下一任 博明王 |
| 上一任 博厚親王 |
華頂宮當主 1923年 - 1946年 |
下一任 博忠王 |
| 上一任 谷口尚真 |
海軍軍令部總長 1932年 - 1941年 |
下一任 永野修身 |
