昭和天皇
| 裕仁 | |
|---|---|
 | |
| 在位 | 1926年至1989年 |
| 前任 | 老豆大正天皇 |
| 繼任 | 大仔明仁 |
| 私人明細 | |
| 配偶 | 香淳皇后 |
| 仔女 | 東久邇成子 久宮祐子內親王 鷹司和子 池田厚子 明仁 常陸宮正仁親王 島津貴子 |
| 年號 | 昭和 |
| 父 | 大正天皇 |
| 母 | 貞明皇后 |
 | |
昭和天皇（日文：昭和天皇／しょうわてんのう Shōwa Tennō；1901年4月29號—1989年1月7號），原名裕仁（日文：ひろひと Hirohito ），徽印印號為若竹，乳名迪宮，係日本第124代天皇（1926年－1989年在位），在位年號昭和，係大正天皇大仔、上皇明仁老豆。在位期間經歷二戰，戰敗後依照新憲法冇咗實權。佢係在位時間最長同埋最長命嘅天皇。
經歷
[編輯]早年
[編輯]
佢響東京赤坂區東宮御所出世，老豆係嘉仁（當時重係皇太子）。唔知點解，聽講爺爺明治天皇特別鍾意佢，重響佢出世當日即刻改佢個名叫裕仁，乳名迪宮，「裕仁」嘅靈感嚟自易經嘅「益德之裕也」同埋詩經嘅「此令兄弟綽綽有裕」，而「迪宮」嘅靈感就嚟自書經嘅「允迪厥德謨明弼諧」。佢出咗世70日左右，就畀屋企送去海軍中將川村純義到住，重住咗四年。
由於老豆嘉仁身體唔係幾好，所以佢細個嗰陣身體都係麻麻哋[1] 。響1908年，佢入讀學習院嘅時候，發覺自己右手唔可以好似正常人咁活動，所以佢唔可以讀視藝同埋音樂；另外，裕仁仲有先天性近視。
因為當時學習院院長係有份參加日俄戰爭嘅陸軍大將乃木希典，而佢兩個仔乃木勝典、乃木保典都先後響日俄戰爭入面陣亡，所以導致佢好受當時天皇睇起，天皇重命令佢要教裕仁成為一個「質實剛健」嘅人。因為乃木，所以裕仁佢自細就崇尚武力，重好尊敬乃木，叫佢做「院長閣下」。由呢個時候開始，裕仁開始努力咁改善自己畀人睇落「病弱」嘅印象。
皇太子時代
[編輯]
響1912年，爺爺明治天皇駕崩，由老豆嘉仁繼位，而裕仁就升上做皇太子。響爺爺嘅葬禮前兩日，乃木突然拜見嘉仁，重將山鹿素行作嘅《中朝事實》同埋三宅觀瀾作嘅《中興鑑言》送畀裕仁。兩日之後，乃木就同佢老婆靜子響屋企自殺，話要同明治天皇一齊死。呢件事對裕仁嘅打擊好大，再加埋爺爺嘅死，令到佢變得有啲自閉。佢決定捨棄所有隨從，自己單獨行動。
響1914年，佢走去「東宮御學問所」道讀咗七年書，而當時嘅總裁係海軍大將東鄉平八郎，佢嘅軍國主義諗法係重勁過乃木希典，導致裕仁更加崇尚武力。
響1918年，久邇宮邦彥王三女良子女王（即香淳皇后）畀人立為裕仁嘅未來老婆。響1921年，裕仁出訪歐洲半年，期間主要係去英、法、比、荷、意五個國家。佢最先去英國，英王佐治五世重親自去倫敦火車站迎接佢。後嚟裕仁佢話「當時嘅英國王室，好多都同我同輩，簡直就令我有『第二個屋企』呢種感覺。特別係英王佐治五世，佢經常過嚟同我傾計，同我講有關君主立憲之下嘅概念。」
響巴黎嘅時候，裕仁佢著住便服一個人搭巴黎地鐵，係佢人生第一次自己買車飛搭地鐵。但係佢唔知要點做，所以佢響入閘嗰時都一直揸住張車飛唔放，驗票員叫佢放手都唔肯，搞到兩個人拉扯咗幾分鐘，最後激到個驗票員勁嬲。經過呢次之後，裕仁佢知道咗佢入閘嗰陣應該要點做，而佢就一直留住佢人生第一次嗰張車飛。
響訪問期間，裕仁唔單止學咗西方嘅政治結構，對軍事嘅興趣越嚟越大，仲特登攞咗個拿破崙半身像返嚟，後嚟擺咗喺自己書房。當時法國軍人對於裕仁嘅表現好震驚。響佢返嚟日本兩個月之後，老豆嘉仁病得好緊要，於是佢開始攝政。
響1923年4月16號，裕仁應時任臺灣總督田健治郎邀請，嚟臺灣訪問十二日[2]，以台鐵花車作為遊台灣嘅交通工具，去咗好多地方，如基隆、臺北、新竹、臺中、臺南、高雄、屏東、澎湖等地。
而裕仁呢次訪行畀人寫成書，總共有九本書，分別係《皇太子殿下台灣行啟記念寫真帖》、《東宮殿下行啟實記》、《皇太子殿下台灣行啟寫真帖》、《皇太子殿下奉迎記念寫真帖（臺東廳）》、《皇太子殿下奉迎記念寫真帖（花蓮港廳）》、《行啟記念寫真帖》、《皇太子殿下行啟記念帖》同埋《高雄州行啟記念寫真帖》。
由於1923年9月1號發生關東大地震，佢嘅婚禮延至1924年1月26號先至正式搞。
天皇時代
[編輯]
響1926年12月25號，老豆嘉仁駕崩，裕仁正式登基。因為當時日本正漸漸民主化，所以裕仁根據《尚書》一句「百姓昭明，協和萬邦」改元昭和。但係因為裕仁早年嘅經歷，日本好快就由民主化轉為軍事擴張之路。1928年11月10號，裕仁先至響京都御所搞登基大典。
響1927年，日本發生一場銀行大危機，令到時任日本首相田中義一開始響中國東北一帶擴張日本軍事勢力。不過裕仁致力履行立憲君主制，好少過問內閣政策，但係佢對呢啲政策既唔支持又唔反對。諷刺嘅係，一班極端民族主義者要求天皇要絕對服從首相嘅政策，反對立憲民主制，但裕仁又控制唔到班軍國主義分子，為第日戰爭爆發埋下咗隱患。
響1929年，日本發生經濟大蕭條，導致首相田中越嚟越走向軍國主義同埋土地擴張。響1931年，日本成功侵略中國東北之後，仲建立埋「滿洲國」。
1930年代，極端民族主義人士開始炮製出一系列暗殺事件。1932年1月，極端民族主義者李奉昌響東京櫻田大門外面嘗試狙擊裕仁，不過最後唔小心炸咗裕仁架副車。同年5月，時任日本首相犬養毅畀人暗殺，標誌住內閣日益畀軍隊控制。呢班軍人要求全日本學校教啲學生識愛國主義，仲迫啲大學炒啲有民主思想嘅教授。
響1933年，佢哋第一個仔明仁親王出世，佢哋好開心。
響1936年6月，「皇道派」軍官發動「二二六事件」，最後響裕仁嘅嚴令下被鎮壓，搞到「統制派」成為最大勝出者，而「統制派」控制咗日本政府同埋軍隊。唔單止係咁，日本國內因為二二六事件而開始變得動盪。另外，因為呢件事，裕仁同二細佬雍仁關係轉差（因為雍仁深受「皇道派」軍官支持）。
二戰期間
[編輯]
響1937年，日本發動七七事變，中日戰爭正式開始。日軍因為好大野心，所以好快就佔領咗中國大部分地區。響跟住嘅五年入面，日軍先後佔領東亞同埋東南亞地區，仲將呢啲地區加入「大東亞共榮圈」，而裕仁一直都唔理日軍做嘅嘢，令啲日軍乜都夠膽做，就好似南京大屠殺。
實際響呢段時間入面，裕仁一直處於被動嘅狀態，但又任由日軍咁做，勸都唔勸。
響1940年，日軍參謀本部發聲明，話「如果本年之內都係搞唔掂支那事變，日軍就會響1941年撤兵」（支那事變即係中日戰爭）[3]。同年六月，裕仁批准由參謀本部提出嘅《加速執行南進政策》，仲話「如果英、美干預，日軍會不顧一切地反撃」。響同年7月30號，裕仁正式批准內閣提出嘅「南進」同埋「大東亞共榮圈」呢兩個政策。同年9月，日本同納粹德國、意大利簽訂德意日同盟條約，正式形成德意日軸心國。
1941年12月，日本參謀本部決定正式同英、美兩國開戰，發動「大東亞戰爭」。同月7號，日軍偷襲美國夏威夷珍珠港海軍基地，第二日裕仁頒發《對英美兩國宣戰詔書》，一方面同美國開戰，另一方面又入侵馬來亞、菲律賓、印尼、香港同埋緬甸等隸屬英、美嘅殖民地。1943年，佢同老婆香淳皇后搬去吹上御苑度住。
1945年3月發生東京大空襲，同月裕仁出外視察災情。同年5月，吹上御苑畀美軍空襲，御苑嚴重受損，但裕仁同老婆良子都冇事。同年8月，美軍先後向廣島、長崎投下原子彈，同時之間又爆發蘇日戰爭，而本身屬於日本嘅庫頁島同埋南千島群島畀蘇聯佔領。日本響雙重打擊之下，響8月14號召開戰時最高國務會議特別會議，而裕仁最後決定接受波茨坦公告，並且投降。響8月15號，日本正式無條件投降，二戰結束。同一日，裕仁透過無線電廣播，史無前例咁同國民解釋投降嘅原因，呢次畀人叫做「玉音放送」。
響同年11月，裕仁前往伊勢神宮，又去咗爺爺明治天皇同埋老豆大正天皇嘅墓地，同先人報告有關投降嘅事。
象徵天皇時代
[編輯]1946年1月，裕仁向日本市民發表《人間宣言》，宣言上面裕仁話天皇唔係神，同市民一樣都係普通人，同時佢希望可以重建日本。同年2月，裕仁去神奈川縣横濱市視察戰後災情。
響1945年日本畀盟軍佔領之後，駐日盟軍總司令阿頭麥克阿瑟實際上控制住日本，裕仁只係個傀儡。響麥克阿瑟命令下，裕仁響1947年簽署日本國憲法，取代由1889年開始實施嘅大日本帝國憲法。日本國憲法要求日本最高統治權歸人民擁有，議會要實行真正嘅議會制，而內閣總理大臣（即首相）要係民選出嚟嘅，仲要實權係交畀首相，而原先擁有實權嘅天皇就變為象徵元首（即冇實權，掛名阿頭），5月正式實行。同年10月，首席檢察官約瑟夫紀南（英文：Joseph B. Keenan）宣佈，天皇唔使為二戰負責。
響1951年9月，日本簽署《對日和平條約》，響1952年4月正式實行，同年5月舉行「主權回復記念式典」，慶祝日本有返權力。但係呢個時候突然傳出話裕仁要退位，引嚟日本國內好大恐慌（因為當時明仁未成年，長細佬雍仁病得好嚴重，次細佬宣仁話唔做，而三細佬崇仁係偏左派人士）。同年10月，裕仁同老婆良子去靖國神社參拜，粉碎咗裕仁要退位呢個謠言。同年年尾，佢正式冊立大仔明仁做皇太子。
1958年，大仔明仁打破傳統，宣佈要同平民出身嘅美智子結婚，係日本史上第一次。
響1969年響皇室一般參賀（即開放畀市民參觀皇室）期間，裕仁畀軍人奧崎謙三射鋼珠彈中而受傷，好彩最後傷得唔係好嚴重。後嚟奧崎謙三轉行做演員，將呢件事當成佢嘅自傳電影咁上映。
1971年，裕仁同老婆香淳皇后國事訪問外國，先去歐洲，響1975年再訪問美國，係裕仁第一次以天皇身份訪問外國。響10月佢返嚟日本之後，裕仁響香淳皇后陪同下，響皇居接受日本記者俱樂部嘅訪問，係第一次有天皇接受訪問[4]。
1976年，響東京都立川飛行場舉行「天皇陛下御在位五十年記念事業」，仲喺當地起一個公園紀念裕仁，嗰個公園叫「國營昭和記念公園」。同年12月，日本政府發行記念硬幣，總共發行咗七千幾個。
響1986年，日本政府舉行「天皇陛下御在位六十年記念式典」，慶祝裕仁執政日本六十年。同年，裕仁超越繼體天皇，成為日本史上在位時間最長嘅天皇。
期間，裕仁一直都有研究水產，佢仲出咗唔少書，代表作為《水母の書》（粵譯：水母本書）。
晚年
[編輯]
1987年，裕仁響天長節（即慶祝天皇生日，佢死後已經改名叫天皇誕生日）上面作嘔，身體開始轉差。同年8月，佢響皇居入面嘔得好犀利，畀人送往醫院檢查，證實十二指腸嗰邊有問題，第二日證實係「腸阻塞」，所以裕仁響同年9月22號接受胰臟手術，後嚟證實佢同時患上「慢性胰臓炎」。
1988年，日本陸上自衛隊用直升機車裕仁去出席全國戰歿者追悼式，呢次係裕仁最後一次出席公開活動。同年9月8號，佢坐車出外玩，呢次係裕仁最後一次畀人影到相。
同年9月18號，裕仁去睇相撲比賽，中途突然發高燒，搞到場比賽取消。第二日（即9月19號），裕仁響皇居突然之間嘔血，畀人緊急送往醫院，之後因裕仁失血過多而要接受輸血，手術之後雖然冇死到，但就出現黑色大便，上消化管同時出現問題，另外佢仲證實患上閉塞性黄疸同埋尿毒症。由於身體轉差，大仔明仁開始攝政。同時之間，好多媒體開始報道有關裕仁嘅病情，所以日本國內開始「自肅」，好多人停止一切娛樂活動，又或者縮細啲活動嘅規模。
1988年12月，裕仁超越神代天皇，成為日本史上最長命嘅天皇。
過身
[編輯]響1989年1月7號朝早六點三十三分，裕仁響皇居過身，終年八十七歲，死因係十二指腸乳頭腺癌。同日七點，由小淵惠三響藤森昭一陪同下宣佈呢個消息。
之後，時任首相竹下登向日本市民發表「大行天皇崩御に際しての竹下内閣総理大臣の謹話」嘅演說。響裕仁死咗之後，隨即有唔少人殉死。
同年1月8號，大仔明仁正式登基，改元平成。同月31號，明仁追封裕仁為「昭和天皇」。
同年2月24號，昭和天皇嘅大喪之禮（即天皇嘅喪禮）正式舉行，除咗皇室成員外，仲有唔少外國政客都有出席，就好似哇集拉隆功、喬治布殊、卡爾十六世、卡洛斯一世同埋菲臘親王等等。昭和天皇最後葬響武蔵野陵。
評價
[編輯]二戰嘅責任
[編輯]對於昭和天皇使唔使為二戰負上責任，到依家都仲有好多人爭論。有人話昭和天皇係二戰嘅罪魁禍首，佢應該要為二戰負上責任；但同時又有人認為昭和天皇只不過係個傀儡，真正嘅罪魁禍首係東條英機。
英國
[編輯]響昭和天皇過身之後兩個禮拜，英國大使懷特黑德曾經同上頭表示，話以昭和天皇嘅性格，佢根本就唔係做皇帝嘅料。佢話昭和天皇性格內向，比起做皇帝，昭和天皇更加適合做實驗室研究員。
屋企
[編輯]
老豆：大正天皇
阿媽：貞明皇后
兄弟姐妹：長細佬秩父宮雍仁親王---次細佬高松宮宣仁親王---三細佬三笠宮崇仁親王
老婆：香淳皇后
- 大女：東久邇成子（1925年－1961年）
- 二女：祐子內親王（1927年－1928年）
- 三女：鷹司和子（1929年－1989年）
- 四女：池田厚子（1931年－）
- 大仔（五仔）：皇太子明仁親王（即明仁、1933年－）
- 二仔（六仔）：常陸宮正仁親王（1935年－）
- 細女：島津貴子（1939年－）
系譜
[編輯]| 閑院宮系圖 | 後土御門天皇系 | 伏見宮系圖 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 典仁 | 後桃園天皇 | 貞行 | 邦忠 | 邦賴 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 美仁 | 光格天皇 | 貞敬 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 孝仁 | 仁孝天皇 | 邦家 | 守脩 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 愛仁 | 孝明天皇 | 晃 | 朝彥 | 貞教 | 彰仁 | 能久 | 博經 | 智成 | 貞愛 | 載仁 | 依仁 | 周子 皇籍脫離 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 明治天皇 | 菊麿 | 邦憲 | 邦彥 | 守正 皇籍脫離 | 鳩彥 皇籍脫離 | 稔彥 皇籍脫離 | 恆久 | 成久 | 博厚 | 博恭 | 春仁 皇籍脫離 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 大正天皇 | 武彥 皇籍脫離 | 恆憲 皇籍脫離 | 朝融 皇籍脫離 | 恆德 皇籍脫離 | 永久 | 博義 | 博忠 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 昭和天皇 | 雍仁 | 宣仁 | 崇仁 | 道久 皇籍脫離 | 博明 皇籍脫離 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 明仁 平成天皇 | 正仁 | 寬仁 | 宜仁 | 憲仁 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 德仁 今上天皇 | 文仁 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| 悠仁 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
攷
[編輯]書籍文獻
[編輯]- 《現代史資料·7·滿洲事變》，三鈴書房，1965年，第337頁
- 《天皇的戰爭責任》井上清，商務印書館，1983年，第69頁。
- 《昭和天皇獨白錄》（中譯本），《世界史研究動態》，1991年第8期。
- 《Bergamini, David. Japan's Imperial Conspiracy》. William Morrow. 1971
- 《Factories of Death: Japanese Biological Warfare》.Sheldon H. Harris 1994(第232頁~第238頁)
- 《Khabarovsk War Crime Trials》 日譯(ハバロフスク裁判)1950
- 《Hirohito and the making of modern Japan》. Herbert P.Bix.2001
連出去
[編輯]
| 前任： 大正天皇 |
日本天皇 1926年12月25號－1989年1月7號 |
繼任： 明仁 |
| 台灣最高統治者 1926年12月25號－1945年8月15號 |
繼任： 蔣中正 中華民國國民政府主席 | |
| 朝鮮半島國家元首 1926年12月25號－1945年8月15號 |
繼任： 李承晚 朝鮮人民共和國主席 |
