Francisco Fernández Rei
 (2015)  | |
| Biografía | |
|---|---|
| Nacemento | 30 de novembro de 1952 (72 anos) Fefiñáns, España |
| Educación | Universidade de Santiago de Compostela |
| Actividade | |
| Ocupación | filólogo |
| Membro de | |
| Obra | |
Obras destacables | |
| Familia | |
| Cónxuxe | Carme Hermida |
| Premios | |
    | |
Francisco Fernández Rei, nado en Fefiñáns (Cambados) o 30 de novembro de 1952, é un filólogo galego. Exerce a docencia na USC, sendo catedrático de Filoloxía Románica desde 1992.
Traxectoria
[editar | editar a fonte]Realizou a carreira de Filoloxía Románica na Universidade de Santiago de Compostela onde obtivo a licenciatura en 1974. A súa tese de doutoramento foi O verbo: Contribución á dialectoloxía galega, dirixida por Constantino García (1979)[1] e primeira tese presentada en galego na Facultade de Filoloxía da USC[2].
Desde 1973 forma parte do Instituto da Lingua Galega (ILG), como investigador e membro do equipo de redacción do Atlas Lingüístico Galego e como responsábel do Arquivo do Galego Oral que posúe este centro. Dentro dos eidos de actuación do ILG traballou, así mesmo, como corredactor das Bases prá unificación das normas lingüísticas do galego en 1977, que constituirían os alicerces das que se aprobaron en 1988.
Dirixe os Cursos de lingua e cultura galegas para estranxeiros e españois de fóra de Galicia organizados pola RAG, o ILG e a SXPL da Xunta de Galicia[3]. A parte da súa actividade no ILG, Francisco Fernández Rei colabora tamén con numerosas asociacións e entidades relacionadas con diferentes linguas románicas, especialmente o galego. En 1978 participou na fundación de Escola Aberta e en 1984 contribuíu á creación da Asociación de Tradutores Galegos. É membro, así mesmo, do comité científico da Sociedade Internacional de Limba Sarda, do plenario do Consello da Cultura Galega en representación do ILG, do Padroado da Fundación Sotelo Blanco, do Museo de Antropoloxía, do Museo do Pobo Galego e da comisión da Mesa prá Defensa del Galego de Asturias.
Tamén hai que destacar a súa participación en distintos encontros e congresos sobre o galego e outras linguas románicas minorizadas e ten publicado artigos en diferentes revistas culturais galegas, como A Trabe de Ouro, Revista da Filoloxía Románica, Cadernos da Lingua ou Grial. Ademais participou na fundación de Escola Aberta, Redes Escarlata e ProLingua.
Fernández Rei é conselleiro do Consello d'a Fabla Aragonesa e membro numerario da Real Academia Galega, na que ingresou o 25 de setembro de 1999 co discurso Ramón Cabanillas, Manuel Antonio e o mar de Arousa: dúas singraduras na construcción dun idioma para unha patria, respondido por Antón Santamarina[4].
Obra
[editar | editar a fonte]Ensaio
[editar | editar a fonte]- O verbo: contribución á dialectoloxia galega, Universidade de Santiago de Compostela, 1979. ISBN 84-7191-134-5
- Lingua galega (1985), manual para COU.
- Dialectoloxía da lingua galega (1990, Xerais). ISBN 978-84-7507-472-6
- Ramón Cabanillas, Cambados e o mar da Arousa (2015, Xerais). ISBN 84-87987-18-4
Obras colectivas
[editar | editar a fonte]- Homenaxe ó profesor Constantino García (1991), coa profesora Mercedes Brea e realizado polo departamento de Filoloxía Galega da universidade compostelá.
- Lingua e cultura galega de Asturias (1994, Xerais). ISBN 84-7507-803-6
- Estudios de socio-lingüística galega. Sobre a norma do galego culto (1995, Galaxia).
- A nosa fala: bloques e áreas lingüísticas do galego (1996), audio-libro publicado xunto a Carme Hermida.
- Estudios de sociolingüística románica: linguas e variedades minorizadas (1999), publicado xunto a Antón Santamarina Fernández.
- Carlos Casares: a semente aquecida da palabra (2003), Consello da Cultura Galega.
- A memoria de Cambados (2005), con Carlos Díaz Martínez, Xerais. ISBN 84-9782-326-5
- 55 mentiras sobre a lingua galega (2009), Laiovento.
- Xosé Chao Rego: renacer galego. (Actas do Simposio-Homenaxe) (2010), Fundación Bautista Álvarez de Estudos Nacionalistas.
- Á beira de Beiras. Homenaxe nacional (2011, Galaxia).
- Arredor das Irmandades da Fala (2016, Xerais).
Premios
[editar | editar a fonte]- Premio Antón Losada Diéguez de investigación no 1991, por Dialectoloxía da lingua galega.
- Premio xornalístico Manuel Reimóndez Portela (2006) no Concello da Estrada
Notas
[editar | editar a fonte]- ↑ "O verbo: Contribución á dialectoloxía galega". frontespo.org. Arquivado dende o orixinal o 31/07/2021. Consultado o 19/11/2018.
- ↑ "Membros da Academia. Francisco Fernández Rei". RAG. Consultado o 19/11/2018.
- ↑ "Homenaxe aos filólogos Francisco Fernández Rei e Manuel González González". Galicia Confidencial. 16/11/2018.
- ↑ Fernández Rei, F. (1999). Ramón Cabanillas, Manuel Antonio e o mar de Arousa. RAG.
Véxase tamén
[editar | editar a fonte]Ligazóns externas
[editar | editar a fonte]| Predecesor: Salvador García-Bodaño |
 Vicesecretario da Real Academia Galega 2010-2013 |
Sucesor: Andrés Torres Queiruga |
